ការលាឈប់ពីតំណែងរបស់មន្ត្រីកំពូលៗនៅវៀតណាម ត្រូវបានគេអះអាងថា កំពុងធ្វើឱ្យខាតបង់ដល់សេដ្ឋកិច្ច

ប្រព័ន្ធផ្សព្វផ្សាយរដ្ឋរបស់វៀតណាម បានប្រកាសកាលពីថ្ងៃសុក្រ សប្ដាហ៍មុនថា ប្រធានសភាជាតិលោក វួង ឌីញ ហ៊ូ (Vuong Dinh Hue) ជាសមាជិកថ្នាក់ទីបួននៃបក្សកុម្មុយនីស្ត​វៀតណាម បានលាលែងពីតំណែង ជាអ្វីដែលអ្នកសង្កេតការណ៍ទូទៅមើលឃើញថា នេះគឺជាការបណ្តេញចេញយ៉ាងពិតប្រាកដ។ ការប្រកាសនេះបានធ្វើឡើងបន្ទាប់ពីគណបក្សកុម្មុយនីស្ត បានបើកកិច្ចប្រជុំគណៈកម្មាធិការប្រតិបត្តិមជ្ឈិម ដើម្បីអនុម័តការលាលែងពីតំណែងរបស់លោក ហ៊ូ ក្រោយពីគេបានរកឃើញថា លោកបានបំពានច្បាប់របស់បក្ស និងជាប់ពាក់ព័ន្ធនឹងអំពើពុករលួយ និងរឿងអាស្រូវមួយចំនួន។

ការលាលែងពីតំណែងរបស់ប្រធានសភាជាតិនេះ បានធ្វើឡើងបន្ទាប់ពីប្រធានាធិបតី វៀតណាម លោក វ៉ូ វ៉ាន ថួង (Vo Van Thuong) ជាមន្ត្រីថ្នាក់លេខពីរបានដាក់ពាក្យលាឈប់ពីតំណែងក្នុងខែមីនា ទៅកាន់អគ្គលេខាធិការបក្សលោក ង្វៀន ភូ ត្រុង (Nguyen Phu Trong) ដោយគេសង្ស័យថា មានការពាក់ព័ន្ធនឹងអំពើពុករលួយយ៉ាងទូលំទូលាយផងដែរ។

អ្នកសង្កេតការណ៍ខ្លះបានកត់សម្គាល់ថា ការដឹកនាំបក្សខ្វះមន្ត្រីជំនាញសេដ្ឋកិច្ច។ លោក ត្រុង គឺជាអ្នកអភិរក្សដែលមានការប្រុងប្រយ័ត្នខ្ពស់ចំពោះការបើកទីផ្សារទូលាយ ហើយអាចងាកទៅរកកម្លាំងរបស់អតីតនាយករដ្ឋមន្ត្រីលោក ង្វៀន តានឌុង និងបក្សពួកជំនាញខាងទីផ្សារផ្សេងទៀត ដោយលើកឡើងពីការប្រយុទ្ធប្រឆាំងអំពើពុករលួយ ហើយលោក ហ៊ូ គឺជាបណ្ឌិតខាងសេដ្ឋកិច្ច។

សេដ្ឋកិច្ចរបស់វៀតណាម កំពុងប្រឈមមុខនឹងបញ្ហាជាច្រើន ខណៈដែលការខ្វះខាតអគ្គិសនីនៅតំបន់ភាគខាងជើងកំពុងមានសភាពធ្ងន់ធ្ងរ។ ការពន្យារពេលនីតិវិធី ក៏ជាការគួរឱ្យកត់សម្គាល់ផងដែរ ហើយមន្ត្រីមិនចង់ពាក់ព័ន្ធនឹងការសម្រេចចិត្តផ្នែករដ្ឋបាលទេ ដោយសារពួកគេខ្លាចពាក់ព័ន្ធក្នុងការតស៊ូអំណាច​។

លោក អ៊ីស៊ីហ្ស៊ូកា (Ishizuka) បាននិយាយថា វាជៀសមិនរួចទេ ដែលថារដ្ឋាភិបាលបរទេស និងអ្នក វិនិយោគបរទេសនឹងមានការព្រួយបារម្ភកាន់តែខ្លាំងឡើងជុំវិញការលាលែងពីតំណែងជាបន្តបន្ទាប់របស់មន្ត្រីកំពូលបែបនេះ ដែលវាបានធ្វើឱ្យប្រទេសនេះមានការខាតបង់សេដ្ឋកិច្ច។

ការតស៊ូអំណាចរបស់បក្សកុម្មុយនីស្ត​ ក៏បានបង្កការព្រួយបារម្ភយ៉ាងខ្លាំងចំពោះសាធារណជនផងដែរ។ ជាក់ស្ដែងនៅក្នុងទីក្រុងហាណូយ មានពាក្យចចាមអារ៉ាមពីការដួលរលំមន្ត្រីបក្សមានការពាក់ព័ន្ធនឹងអំពើពុករលួយពេញមួយឆ្នាំ ហើយវីដេអូអនាមិក ស្ដីពី អ្នកមានឥទ្ធិពលមានរឿងអាស្រូវត្រូវបានផ្សព្វ ផ្សាយតាមបណ្តាញសង្គមផងដែរ៕