ឥណ្ឌាវ៉ាដាច់ហុងកុងក្លាយជាទីផ្សារភាគហ៊ុនធំទី៧របស់ពិភពលោក

បើយោងតាមទិន្នន័យពីសហព័ន្ធពិភពលោកនៃទីផ្សារភាគហ៊ុនបានឱ្យដឹងថា នៅចុងខែវិច្ឆិកា មូលធននីយកម្មទីផ្សារសរុបនៃផ្សារហ៊ុនជាតិ របស់ប្រទេសឥណ្ឌា បានឡើងដល់ជាង៣ពាន់៩៨៩ទ្រីលានដុល្លារ បើធៀបនឹងផ្សារហ៊ុនរបស់ហុងកុង មានត្រឹម៣ពាន់៩៨៤ទ្រីលានដុល្លារប៉ុណ្ណោះ។

ផ្សារហ៊ុនជាតិនៃប្រទេសឥណ្ឌា NIFTY 50 បានឈានដល់កម្រិតខ្ពស់មួយទៀតកាលពីថ្ងៃអង្គារ ដោយបានហក់ឡើង១៦%មកទល់ពេលនេះ ហើយកំពុងឆ្ពោះទៅរកប្រាក់ចំណេញប្រាំបីឆ្នាំជាប់ៗគ្នា។ ផ្ទុយទៅវិញ សន្ទស្សន៍ផ្សារហ៊ុន Hang Seng របស់ហុងកុងវិញបានធ្លាក់ចុះ១៧%។

ឥណ្ឌាត្រូវបានគេដឹងថា គឺជាប្រទេសដែលលេចធ្លោបំផុតក្នុងផ្សារហ៊ុននៅឆ្នាំនេះ ក្នុងតំបន់អាស៊ីប៉ាស៊ីហ្វិក​។ ការកើនឡើងនៃសាច់ប្រាក់ងាយស្រួល ការចូលរួមក្នុងស្រុកកាន់តែច្រើន និងការកែលម្អសក្ដានុពលនៅក្នុងបរិយាកាសម៉ាក្រូពិភពលោកក្នុងទម្រង់ នៃការធ្លាក់ចុះ នៃទិន្នផលរតនាគារសហរដ្ឋអាម៉េរិក បានជំរុញឱ្យទីផ្សារភាគហ៊ុនរបស់ប្រទេសនេះកើនឡើង។

ហើយប្រទេសដែលមានប្រជាជនច្រើនជាងគេលើពិភពលោកមួយនេះ ក៏នឹងឈានទៅរកការបោះឆ្នោតសកលនៅឆ្នាំក្រោយផងដែរ ដែលអ្នកវិភាគព្យាករថា អាចជាជ័យជម្នះមួយផ្សេងទៀតសម្រាប់គណបក្សជាតិនិយម Bharatiya Janata ដែលជាគណបក្សកាន់អំណាចនាពេលបច្ចុប្បន្នដឹកនាំដោយលោក ណារិនដ្រា ម៉ូឌី។

បើតាមអ្នកយុទ្ធសាស្ត្រជាច្រើននៅធនាគារ HSBC បាននិយាយថា សម្រាប់ការបោះជាតិនៅឆ្នាំក្រោយ ការស្ទង់មតិ និងការបោះឆ្នោតរដ្ឋនាពេលថ្មីៗនេះបង្ហាញថា រដ្ឋាភិបាលដឹកនាំដោយលោក ម៉ូឌី ដែលកំពុងកាន់អំណាចបច្ចុប្បន្ន អាចនឹងទទួលបានជ័យជម្នះមួយអាណត្តិទៀត ដើម្បីបន្តអនុវត្តគោលនយោបាយរបស់គណបក្សនេះ។

អ្នកជំនាញទាំងនោះបានឱ្យដឹងថា វិស័យធនាគារ ការថែទាំសុខភាព និងថាមពល គឺជាវិស័យដែលកំពុងស្ថិតក្នុងទីតាំងដ៏ល្អបំផុតសម្រាប់ឆ្នាំក្រោយ។ ខណៈវិស័យផ្សេងទៀត ដូចជារថយន្ត ការលក់រាយ អចលនទ្រព្យ និងទូរគមនាគមន៍ ក៏មានទីតាំងល្អផងដែរ។

ទន្ទឹមគ្នានេះ បើយោងតាមមូលនិធិរូបិយវត្ថុអន្តរជាតិ (IMF) បាននិយាយនៅក្នុងទស្សនវិស័យសេដ្ឋកិច្ចពិភពលោកកាលពីខែតុលា ថា ផលិតផលក្នុងស្រុកសរុបពិតប្រាកដរបស់ប្រទេសឥណ្ឌា ត្រូវបានព្យាករណថា នឹងកើនឡើងជាង៦%ទាំងនៅក្នុងឆ្នាំនេះ និងឆ្នាំ២០២៤ ដែលកំណើននេះនឹងលឿនជាងប្រទេសចិនបន្តិចក្នុងកំណើន៤,៥% លឿនជាងសេដ្ឋកិច្ចពិភពលោកពីរដង ដែលមាន៣% និងលឿនជាងប្រទេសដែលមានសេដ្ឋកិច្ចជឿនលឿន៤ដងឯណោះ។

ទោះជាយ៉ាងណា ឥណ្ឌាកំពុងឈានចូលដល់ការដំណាក់កាលដកថយយ៉ាងឆាប់រហ័ស នៅពេលដែលនគរូបនីយកម្ម ឧស្សាហូបនីយកម្ម ចំណូលក្នុងគ្រួសារ និងការប្រើប្រាស់ថាមពលកើនឡើងយ៉ាងឆាប់រហ័សក្នុងរយៈពេលជាច្រើនទសវត្សរ៍ខាងមុខ៕