សង្គ្រាមនៅលើសមរភូមិស្ងប់ស្ងាត់ហើយ នៅឡើយតែសង្គ្រាមព័ត៌មាន តើពលរដ្ឋគួរធ្វើដូចម្តេច ដើម្បីកុំឱ្យចាញ់សង្គ្រាមចិត្តសាស្ត្រ?

តែយ៉ាងណាអ្នកជំនាញទទួលស្គាល់ថា ពលរដ្ឋហាក់មានការលំបាកក្នុងការបែងចែកឱ្យដាច់រវាងព័ត៌មានពិត និងព័ត៌មានក្លែង ដែលបង្កើតឡើងដោយបច្ចេកវិទ្យាបញ្ញាសិប្បនិម្មិត(AI)។ យ៉ាងណាមិញក្រសួងព័ត៌មាន បន្តអំពាវនាវឱ្យពលរដ្ឋតាមដានព័ត៌មានចេញពីប្រភពជួររដ្ឋាភិបាល និងសារព័ត៌មានមានវិជ្ជាជីវៈ ចៀសវាងកើតមានការភន់ច្រឡំណាមួយ។

លោកបណ្ឌិត ឈត ប៊ុនថង អ្នកជំនាញទស្សនវិជ្ជា និងជាអ្នកតាមដានហេតុការណ៍សង្គម សង្កេតឃើញថា ព័ត៌មានក្លែងក្លាយកំពុងរីករាលដាល និងវាយលុកខ្លាំងនៅលើបណ្តាញសង្គមទាំងនៅប្រទេសកម្ពុជា និងប្រទេសថៃ ជាពិសេសសង្គ្រាមព័ត៌មានពាក់ព័ន្ធជម្លោះព្រំដែនកម្ពុជា និងថៃ តែម្តង។ ជាការកត់សម្គាល់របស់អ្នកជំនាញរូបនេះ ទោះបីការប្រយុទ្ធគ្នានៅលើសមរភូមិបានស្ងប់ស្ងាត់ក៏ពិតមែន តែសង្គ្រាមព័ត៌មានមិនទាន់ស្ងប់ស្ងាត់នោះទេ ដែលបញ្ហានេះកំពុងជះផលប៉ពាល់ដល់បញ្ហាផ្លូវចិត្តទាំងពលរដ្ឋកម្ពុជា និងពលរដ្ឋថៃ និងកំពុងដុតបញ្ឆេះឱ្យប្រជាជននៃប្រទេសទាំងពីរជះកំហឹងដាក់គ្នាផងដែរ។ យ៉ាងណាមិញអ្នកជំនាញរូបនេះ លើកទឹកចិត្តឱ្យពលរដ្ឋត្រូវមានការគិតពិចារណាឱ្យបានខ្ពស់ ហើយត្រូវចាំថា ព័ត៌មានដែលផ្សាយទាំងនោះមិនសុទ្ធតែជាការពិតនោះទេ ដើម្បីជៀសវាងចាញ់សង្គ្រាមចិត្តសាស្រ្តរបស់ថៃ។

​​ជាមួយគ្នានេះ លោកបណ្ឌិត ធួន ស៊ីណាន អ្នកតាមដានស្ថានការណ៍សង្គម បានបង្ហោះសារនៅលើទំព័រហ្វេសប៊ុកផ្ទាល់ខ្លួននៅថ្ងៃទី៣០ ខែធ្នូ ឆ្នាំ២០២៥ នេះ ថា សង្គ្រាមដែលកំពុងគ្រោះថ្នាក់បំផុតសម្រាប់កម្ពុជា ក្នុងកាលៈទេសៈដ៏លំបាកនេះ គឺសង្គ្រាមព័ត៌មានវិជ្ជា ឬហៅជាភាសាអង់គ្លេសថា Digitalization War ដែលកំពុងកើតមានឡើង ហើយតម្រូវឱ្យទប់ស្កាត់ឱ្យបាន ប្រសិនជាភាគីពាក់ព័ន្ធទាំងអស់មិនអាចទប់ស្កាត់បានទេ នោះនឹងប្រឈមការចាញ់សង្គ្រាមផ្នែកព័ត៌ទាំងអស់នេះ។

ដើម្បីកុំឱ្យធ្លាក់ក្នុងអន្ទាក់បោកប្រាស់ និងចាញ់ក្នុងសង្គ្រាមចិត្តសាស្ត្រ ឯកឧត្តម ទេព អស្នារិទ្ធ អនុរដ្ឋលេខាធិការ និងអ្នកនាំពាក្យក្រសួងព័ត៌មាន អំពាវនាវដល់ពលរដ្ឋបន្តតាមដានប្រភពព័ត៌មានច្បាស់ការចេញពីរដ្ឋាភិបាល និងប្រព័ន្ធផ្សព្វផ្សាយជាតិ និងឯកជន ដែលមានវិជ្ជាជីវៈក្នុងការផ្សព្វផ្សាយព័ត៌មានជុំវិញស្ថានភាពព្រំដែនកម្ពុជា ជាមួយថៃ ជាពិសេសក្រសួងការពារជាតិ ក្រសួងការបរទេស ក្រសួងព័ត៌មាន និងក្រុមអ្នកនាំពាក្យក្នុងជួររដ្ឋាភិបាល រួមទាំងថ្នាក់ដឹកនាំកំពូលៗ និងស្ថាប័នពាក់ព័ន្ធផ្សេងទៀត។

​បើតាមអ្នកនាំពាក្យរូបនេះ បច្ចុប្បន្នភាគីថៃ កំពុងប្រើសង្គ្រាមសតិអារម្មណ៍តាមរយៈការបង្កើតព័ត៌មានក្លែងក្លាយ និងប្រឌិតរឿងខុសពីការពិត ដើម្បីបំពុលបរិយាកាសព័ត៌មាន បង្កភាពច្របូកច្របល់ និងការភាន់ច្រឡំក្នុងសាធារណមតិកម្ពុជា និងអន្តរជាតិ ជុំវិញស្ថានការណ៍ពិត ដែលបាន និងកំពុងកើតមានឡើងទាក់ទងនឹងជម្លោះព្រំដែននេះ។ ជាមួយគ្នានេះ រដ្ឋាភិបាលរួមទាំងក្រសួងព័ត៌មាន កំពុងចាត់វិធាននានា ដើម្បីទប់ស្កាត់ព័ត៌មានក្លែងក្លាយ និងការផ្សាយព័ត៌មានបែបបំពុលផ្សេងៗ មិនឱ្យរីកសាយភាយ ធ្វើឱ្យប៉ះពាល់ដល់ការគ្រប់គ្រងស្ថានភាពបច្ចុប្បន្ន និងការទទួលព័ត៌មានរបស់ប្រជាពលរដ្ឋ៕

អត្ថបទ​៖ ជា ម៉ារ៉ា