សហប្រធានវេទិកាសេដ្ឋកិច្ចពិភពលោកទាំង៦រូប៖ កម្ពុជាតូច តែខ្លាំង!

វេទិកាសេដ្ឋកិច្ចពិភពលោកនៅកម្ពុជាឆ្នាំនេះ បានស្ថិតនៅក្រោមក្រសែភ្នែកតាមដានយ៉ាងយកចិត្តទុកដាក់បំផុត ពីសំណាក់អ្នកវិនិយោគិនជាតិនិងអន្តរជាតិល្បីៗ និងថ្នាក់ដឹកនាំកំពូលៗនៅក្នុងតំបន់ និង លើពិភពលោក។

កម្ពុជាធ្វើជាម្ចាស់ផ្ទះវេទិកាសេដ្ឋកិច្ចពិភពលោក ស្ដីពីអាស៊ាន ពីថ្ងៃទី១០-១២ ឧសភា ឆ្នាំ២០១៧។ រូបភាព៖ ហេង ភារម្យ

មានសំណួរចោទសួរជាច្រើនទៅកាន់ថ្នាក់ដឹកនាំអ្នករៀបចំវេទិកាសេដ្ឋកិច្ចពិភពលោកនេះ ថា តើកម្ពុជាមានអ្វីពិសេសដើម្បីទាក់ទាញវិនិយោគិនបរទេស ហើយវេទិកានេះ កម្ពុជាយើងចំណេញអ្វីខ្លះ?

ពាក់ព័ន្ធទៅនឹងសំណួរនេះ ត្រូវបកស្រាយដោយសហប្រធានដឹកនាំរៀបចំវេទិកាសេដ្ឋកិច្ចពិភពលោក អ្នកវិនិយោគក៏ដូចជាពាណិជ្ជករល្បីៗ និងមេដឹកនាំមកពីប្រទេសក្នុងតំបន់ និង ពិភពលោកថា ពិតណាស់កម្ពុជាទទួលបានប្រយោជន៍កាន់តែច្រើនពីកេរ្តិ៍ឈ្មោះរបស់ប្រទេសកម្ពុជាទៅកាន់ពិភពលោក និងធ្វើឲ្យអន្តរជាតិស្គាល់កាន់តែច្បាស់ពីកម្ពុជា។

លោក John Rice អនុប្រធានក្រុមប្រឹក្សាភិបាលក្រុមហ៊ុនផលិតថាមពល GE លោក Tan Vongvanich អគ្គនាយកប្រតិបត្តិ ក្រុមហ៊ុនរុករកនិងផលិតប្រេងរបស់ថៃ PTT លោក Wolfgang Jamann អគ្គលេខាធិការនិងនាយកប្រតិបត្តិអង្គការ CARE International លោក Jamaludin Ibrahim ប្រធានអគ្គនាយក ក្រុមហ៊ុន Axiata Group ដែលជាក្រុមហ៊ុនទូរគមនាគមន៍ដ៏ធំរបស់ម៉ាឡេស៊ី លោកស្រី Tan Hooi Ling Tevin សហប្រធានក្រុមហ៊ុន Grab សិង្ហបុរី (អ្នកដឹកនាំវ័យក្មេងសកល) សុទ្ធតែបានចាប់អារម្មណ៍ខ្លាំងពីប្រទេសកម្ពុជាថា ថ្វីត្បិតតែប្រទេសនេះតូច ប៉ុន្តែពោរពេញទៅដោយសក្តានុពលសម្រាប់វិនិយោគ ដោយសារកំណើនសេដ្ឋកិច្ចប្រទេសកម្ពុជាមានការរីកចម្រើនយ៉ាងឆាប់រហ័ស បើធៀបនឹងបណ្តាប្រទេសក្នុងតំបន់។

លោក Jamaludin Ibrahim ប្រធានអគ្គនាយក ក្រុមហ៊ុន Axiata Group ដែលជាក្រុមហ៊ុនទូរគមនាគមន៍ដ៏ធំរបស់ម៉ាឡេស៊ី បានឲ្យដឹងថា ពិតជាមានអារម្មណ៍ភ្ញាក់ផ្អើលនៅពេលដែលបាន មកដល់ប្រទេសកម្ពុជា។ លោកនិយាយថា ប្រទេសកម្ពុជាតូច តែរីកចម្រើនខ្លាំង ដែលមានកំណើនសេដ្ឋកិច្ចកើនឡើង ៧ភាគរយជារៀងរាល់ឆ្នាំ។

វេទិកាសេដ្ឋកិច្ចពិភពលោកនេះដែរ អាចនិយាយបានថា ជាមេដែកឆក់ស្រូបទាញអ្នកវិនិយោគបរទេសជាច្រើនឲ្យចាប់អារម្មណ៍និងឈានទៅរកការបោះទុនវិនិយោគនៅក្នុងប្រទេសកម្ពុជា។ មិនតែប៉ុណ្ណោះ វេទិកាដ៏ធំមួយនេះ ក៏ជាឱកាសមាសសម្រាប់បង្ហាញពីសក្តានុពលរបស់ប្រទេសកម្ពុជាទៅកាន់ពិភពលោកផងដែរ។ វេទិកាសេដ្ឋកិច្ចពិភពលោកនៅកម្ពុជា ធ្វើឲ្យពិភពលោកកាន់តែជ្រាបច្បាស់ពីប្រទេសកម្ពុជា។

លោក ជីន លីហ្គន់ ប្រធានធនាគារវិនិយោគហេដ្ឋារចនាសម្ព័ន្ធអាស៊ី បានលើកឡើងនៅក្នុងសន្និសីទសារព័ត៌មានថា ការពង្រីកវិស័យហេដ្ឋារចនាសម្ព័ន្ធ តភា្ជប់បណ្តាញដឹកជញ្ជូន នឹងធ្វើឲ្យប្រទេសនៅក្នុងតំបន់មានការអភិវឌ្ឍសេដ្ឋកិច្ចខ្លាំងក្លា ក្នុងនោះរួមទាំងប្រទេសកម្ពុជា។

ជាមួយគ្នានេះដែរ លោក ជីន លីហ្គន់ បានបន្តថា កម្ពុជាត្រូវកសាងហេដ្ឋារចនាសម្ព័ន្ធទាំងផ្នែក រឹង និងទន់ ដើម្បីសម្រួលដល់ការវិនិយោគនិងពាណិជ្ជកម្ម ដែលកំពុងតែមានការរីកលូតលាស់។ ហើយកម្ពុជានឹងទទួលបានផលប្រយោជន៍ពីធនាគារ អេ អាយ អាយ ប៊ី (AIIB)។

ដោយឡែក ក្រុមអ្នកសេដ្ឋកិច្ច វិនិយោគិនជាតិ និងអន្តរជាតិល្បីៗ សុទ្ធតែមានជំនឿយ៉ាងមុតមាំថា តាមរយៈព្រឹត្តការណ៍សំខាន់ៗនៅកម្ពុជាក្នុងឆ្នាំនេះ បានចូលរួមចំណែកគោលនយោបាយបើកចំហរបស់រាជរដ្ឋាភិបាលកម្ពុជា ក្នុងការជំរុញឲ្យកម្ពុជាមានការអភិវឌ្ឍខ្លាំងក្លា។

មេដឹកនាំប្រទេសនៅក្នុងតំបន់អាស៊ានចំនួន៤ មានកម្ពុជា វៀតណាម ឡាវ ហ្វីលីពីន បានថ្លែងនៅក្នុងពិធីបើកវេទិកាសេដ្ឋកិច្ចពិភពលោកថា នឹងរួបរួមគ្នាជំរុញការអភិវឌ្ឍសេដ្ឋកិច្ចប្រទេសក្នុងតំបន់ឲ្យកាន់តែមានការរីកចម្រើន។ ហើយដើម្បីជំរុញការវិនិយោគ និងធ្វើឲ្យកំណើនសេដ្ឋកិច្ចជាតិកាន់តែមានភាពរឹងមាំ រាជរដ្ឋាភិបាលកម្ពុជាបាននិងកំពុងខិតខំជំរុញនូវវិស័យសំខាន់ៗមួយចំនួន ដូចជា វិស័យកសិកម្ម វិស័យឧស្សាហកម្ម វិស័យអប់រំ វិស័យបច្ចេកវិទ្យា និងវិស័យបដិសណ្ឋារកិច្ច។

សូមបញ្ជាក់ថា កម្ពុជាបានធ្វើជាម្ចាស់ផ្ទះក្នុងការរៀបចំវេទិកាសេដ្ឋកិច្ចពិភពលោក ស្ដីពីអាស៊ាន រយៈពេល ៣ថ្ងៃក្នុងរាជធានីភ្នំពេញ ពីថ្ងៃទី១០ ដល់ថ្ងៃទី១២ ខែឧសភា ឆ្នាំ២០១៧ ក្រោមប្រធានបទ «យុវជន បច្ចេកវិទ្យា និងការរីកចម្រើន» ដែលមានការចូលរួមពីមេដឹកនាំនិងវិនិយោគិនកំពូលៗ ប្រមាណជាង ៧០០នាក់៕