រដ្ឋមន្ត្រីការពារជាតិអាមេរិក លោក ឡយ អូស្ទីន (Lloyd Austin)នៅសប្ដាហ៍នេះ បានប្រកាសឡើងនូវការរៀបចំកិច្ចប្រជុំមួយ ដែលជាកិច្ចប្រជុំនាយកជាន់ខ្ពស់ផ្នែកសព្វាវុធជាតិមកពីបណ្ដាប្រទេសសម្ព័ន្ធមិត្តអាមេរិក ដើម្បីរៀបចំផែនការរយៈពេលវែង សម្រាប់ការផ្គត់ផ្គង់អាវុធទៅឲ្យអ៊ុយក្រែន និងការផលិតអាវុធរបស់ពួកគេឡើងវិញសម្រាប់ការស្ដុកទុកផងដែរ។
លោក ឡយ អូស្ទីនអះអាងថា មន្ត្រីជាន់ខ្ពស់ផ្នែកសព្វាវុធជាតិនៃបណ្ដាប្រទេសសម្ព័ន្ធមិត្តអាមេរិកទាំងអស់នឹងពិភាក្សាគ្នាអំពីរបៀបដែលមូលដ្ឋានឧស្សាហកម្មការពារជាតិ អាចជួយគាំទ្រក៏ដូចជាបំពាក់អាវុធដល់កងកម្លាំងនាពេលអនាគតរបស់អ៊ុយក្រែនបានយ៉ាងល្អបំផុត ជាមួយនឹងសមត្ថភាពដែលពួកគេត្រូវការ។
បើតាមប្រធានផ្នែកទទួលបន្ទុកអាវុធរបស់មន្ទីបញ្ចកោណអាមេរិក លោក Bill LaPlante បានអះអាងថា កិច្ចប្រជុំនាយកជាន់ខ្ពស់ផ្នែកសព្វាវុធជាតិមកពីបណ្ដាប្រទេសសម្ព័ន្ធមិត្តអាមេរិកនេះ នឹងប្រព្រឹត្តទៅនៅថ្ងៃទី ២៨ខែ កញ្ញានៅក្នុងទីក្រុងព្រុចសែល។
អត្ថបទគួរអាន
លោក Bill បន្ថែមថា គោលដៅនៃកិច្ចប្រជុំនេះ គឺដើម្បីកំណត់អំពីរបៀបដែលប្រទេសទាំងនោះអាចបន្ដធ្វើការជាមួយគ្នាក្នុងការបង្កើនផលិតកម្ម សម្រាប់សមត្ថភាពសំខាន់ៗ និងដោះស្រាយបញ្ហាខ្សែចង្វាក់ផ្គត់ផ្គង់ និងបង្កើនអន្តរប្រតិបត្តិការ និងលទ្ធភាពផ្លាស់ប្ដូរគ្នាជាប្រព័ន្ធ។
សូមបញ្ជាក់ថា កាលពីខែកក្កដា សហភាពអឺរ៉ុបបានប្រកាសផ្ដល់ប្រាក់ប្រហែល៥០០លានអឺរ៉ូ សម្រាប់ការចូលរួមបញ្ជាទិញអាវុធរួមគ្នានៅរយៈពេល២ឆ្នាំខាងមុខ ដើម្បីបំពេញបន្ថែមនូវសព្វាវុធទៅឲ្យអ៊ុយក្រែន។
ដោយឡែក សម្រាប់សហរដ្ឋអាមេរិកវិញ ចាប់តាំងពីផ្ទុះសង្គ្រាមរុស្ស៊ីចូលឈ្លានពាននៅអ៊ុយក្រែនមក ទីក្រុងវ៉ាស៊ិនតោនបានសន្យាផ្ដល់សព្វាវុធដល់ទីក្រុងកៀវ គិតជាតម្លៃទឹកប្រាក់ប្រហែលជាង១៥ពាន់លានដុល្លារអាមេរិកហើយមកទល់ពេលនេះ៕
