ទីប្រឹក្សាសន្តិសុខជាតិអាមេរិក លោក Jake Sullivan បាននិយាយថា គេកំពុងស៊ើបអង្កេតឱ្យបានច្បាស់ថាតើ អ៊ីរ៉ង់បានផ្តល់ប្រព័ន្ធយន្តហោះគ្មានមនុស្សបើកប្រភេទណាមួយទៅឱ្យរុស្ស៊ីរួចហើយឬនៅ ប៉ុន្តែព័ត៌មានដែលសហរដ្ឋអាមេរិកមានច្បាស់នៅពេលនេះគឺ អ៊ីរ៉ង់កំពុងរៀបចំបណ្តុះបណ្តាលកងកម្លាំងរុស្ស៊ី ដើម្បីចេញប្រើប្រាស់ដ្រូនទាំងនេះឱ្យបានឆាប់បំផុត ត្រឹមខែកក្កដានេះ។
លោក Jake Sullivan ប្រាប់អ្នកយកព័ត៌មានថា៖ ការណ៍សម្ងាត់របស់យើងបង្ហាញថា រដ្ឋាភិបាលអ៊ីរ៉ង់កំពុងរៀបចំផ្តល់ឱ្យរុស្ស៊ីនូវដ្រូនជាច្រើនរយគ្រឿង រួមទាំងដ្រូនដែលមានសមត្ថភាពបំពាក់សព្វាវុធថែមទៀត ទន្ទឹមនោះអ៊ីរ៉ង់បានកំណត់ពេលវេលាធ្វើយ៉ាងណាឱ្យបានកាន់តែឆាប់រហ័សថែមទៀតផង។
បើតាមសេតវិមានអាមេរិក ដោយសារតែរុស្ស៊ីបង្កើនការវាយប្រហារខ្លាំងលើភាគខាងកើតអ៊ុយក្រែន តំបន់ដុនបាស ហេតុនេះរុស្ស៊ីត្រូវការសព្វាវុធច្រើនទៀត ដើម្បីឆាប់សម្រេចគោលដៅដណ្តើមកាន់កាប់យកខេត្តដូណេកមួយទៀត បន្ទាប់ពីជោគជ័យលើខេត្តលូកហាន់។
អត្ថបទគួរអាន
គួរជម្រាបថា ការលាតត្រដាងរបស់អាមេរិកកើតឡើងនៅមុនតែប៉ុន្មានថ្ងៃប៉ុណ្ណោះនៃដំណើរទស្សនកិច្ចរបស់លោកប្រធានាធិបតី Joe Biden ទៅកាន់ប្រទេសអ៊ីស្រាអែល និងអារ៉ាប៊ីសាអូឌីត ហើយដែលក្នុងនោះ កម្មវិធីអាវុធនុយក្លេអ៊ែរអ៊ីរ៉ង់ និងសកម្មភាពបង្កហេតុនៅក្នុងតំបន់នឹងក្លាយជារបៀបវីរសំខាន់នៃកិច្ចពិភាក្សា។ ម្យ៉ាងវិញទៀត ការដែលលោកបៃឌិន ទៅទស្សនកិច្ចប្រទេសទាំងពីរ គឺស្របពេលដែលទាំងអ៊ីស្រាអែល និងអារ៉ាប៊ីសាអូឌីតបានប្រឆាំងនឹងការចូលរួម ក្នុងកិច្ចខិតខំប្រឹងប្រែងជាសកល ដើម្បីដាក់ទណ្ឌកម្មរុស្ស៊ី ចំពោះការលុកលុយលើអ៊ុយក្រែនដោយសារតែផលប្រយោជន៍ជាតិរបស់ពួកគេ។
គួរំឭកថា រដ្ឋមន្ត្រីការបរទេសរុស្ស៊ីទើបបានទស្សនកិច្ចទៅអ៊ីរ៉ង់កាលពីចុងខែមុន ដើម្បីជំរុញកិច្ចសហប្រតិបត្តិការទ្វេភាគី ទាំងនយោបាយ យោធា និងថាមពល ស្របពេលដែល ប្រទេសទាំងពីរ គឺកំពុងស្ថិតនៅក្រោមការដាក់ទណ្ឌកម្មរបស់លោកខាងលិច និងសហរដ្ឋអាមេរិករៀងៗខ្លួន។
ដោយឡែក នៅក្នុងប្រទេសរុស្ស៊ីឯណេះវិញ ប្រធានាធិបតីរុស្ស៊ី លោកពូទីន បានចុះហត្ថលេខាលើក្រឹត្យមួយកាលពីថ្ងៃចន្ទដើមសប្ដាហ៍នេះ ដើម្បីបើកផ្លូវ និងពង្រីកដំណើរនិតិវិធីចូលជាសញ្ជាតិ ដល់ពលរដ្ឋអ៊ុយក្រែនទាំងអស់ដែលចង់ចូលសញ្ជាតិរុស្ស៊ី។
ទន្ទឹមនេះ សភាជាន់ទាបរុស្ស៊ីក៏នឹងប្រមូលផ្តុំគ្នាសម្រាប់សម័យប្រជុំវិសាមញ្ញមួយ នៅថ្ងៃទី១៥ខែកក្កដាខាងមុខ។ ការបើកសម័យប្រជុំវិសាមញ្ញនេះធ្វើឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីប្រធានាធិបតីពូទីន បានព្រមានទៅអាមេរិក និងលោកខាងលិចថាថា រុស្ស៊ីនៅមិនទាន់ចាប់ផ្តើមអ្វីៗមែនទែននៅឡើយទេ ក្នុងសង្គ្រាមនៅអ៊ុយក្រែន។
បើតាមប្រភពពីសភាជាន់ទាបរុស្ស៊ី សម័យប្រជុំនឹងពិភាក្សាលើរបៀបរីរចំនួន៦០ ប៉ុន្តែគេមិនបានបង្ហាញថាជាបញ្ហាអ្វីខ្លះនោះទេ៕
