ប្រភពដែលនិយាយក្នុងលក្ខខណ្ឌមិនបញ្ចេញឈ្មោះបញ្ជាក់ថា កម្រិតតម្លៃប្រេងដែលត្រូវបានគេពិភាក្សានោះ នៅមិនទាន់ត្រូវបានកំណត់នៅឡើយទេ ប៉ុន្តែគេគ្រាន់តែដឹងថា វានឹងត្រូវស្ថិតក្នុងតម្លៃមួយសមរម្យ មិនឱ្យខ្ពស់ពេក ឬទាបពេកឡើយ ធ្វើយ៉ាងណាផ្តល់ការលើកទឹកចិត្តខ្លះ ដល់ប្រទេសរុស្ស៊ីក្នុងការបន្តផលិតប្រេងរបស់ខ្លួន។
មេដឹកនាំក្រុមប្រទេស G7 កាលពីថ្ងៃអង្គារក៏បានព្រមព្រៀងគ្នាក្នុងការបន្តស្វែងរកវិធី ដាក់បម្រាមលើការដឹកជញ្ជូនប្រេងរបស់រុស្ស៊ី ដែលត្រូវបានលក់មិនត្រូវតាមតម្លៃជាក់លាក់។ ទាំងនេះសុទ្ធសឹងជាកិច្ចខិតខំប្រឹងប្រែងដើម្បីកាត់បន្ថយប្រាក់ចំណូលរបស់ទីក្រុងមូស្គូ និងធ្វើយ៉ាងឱ្យរុស្ស៊ីអស់ធនធានសម្រាប់ការធ្វើសង្គ្រាមនៅអ៊ុយក្រែន។ ជាមួយគ្នានេះ សហភាពអឺរ៉ុបកំពុងរៀបចំដាក់ទណ្ឌកម្មដំណាក់កាលបន្ទាប់ផងដែរ លើប្រេងរុស្ស៊ីនៅចុងឆ្នាំនេះ។
ប្រភពដដែលបានបញ្ជាក់បន្ថែមថា មេដឹកនាំនៃក្រុមប្រទេស G7 កំពុងកំណត់ឱ្យបានច្បាស់ ថាតើសេវាកម្មដឹកជញ្ជូនប្រេងណាមួយរបស់រុស្ស៊ី នឹងត្រូវដាក់បម្រាម ហើយគេក៏កំពុងពិចារណាការហាមឃាត់ដោយផ្ទាល់ផងដែរ លើការធានារ៉ាប់រងដឹកជញ្ជូន ហិរញ្ញវត្ថុពាណិជ្ជកម្ម ឈ្មួញកណ្តាលដែលទិញប្រេងពីរុស្ស៊ី និងសេវាកម្មផ្សេងៗទៀត។
បច្ចុប្បន្ន ប្រេងរុស្ស៊ី មានការលក់បញ្ចុះតម្លៃពី៣០ ទៅ៤០ដុល្លារអាមេរិក ក្នុងមួយធុងបារ៉ែល ធៀបនឹងតម្លៃប្រេងដែលកំណត់នៅក្នុងទីផ្សារអង់គ្លេសវិញ គឺមានដល់ទៅ១១០ ទៅ១២០ដុល្លារក្នុងមួយធុងបារ៉ែល។
អត្ថបទគួរអាន
ក្នុងន័យនេះ ប្រសិនបើគេកំណត់តម្លៃប្រេងរុស្ស៊ី និងដាក់សម្ពាធលើការដឹកជញ្ជូន និងឈ្មួញកណ្តាលបានជោគជ័យ នោះរុស្ស៊ីត្រូវតែបង្ខំចិត្តលក់ប្រេងក្នុងតម្លៃមួយខ្ពស់ជាងមុន ពោលគឺ ទីក្រុងម៉ូស្គូលែងអាចលក់ប្រេងបញ្ចុះថ្លៃដូចមុនបានទៀតហើយ ខណៈចំនួនដែលលក់ចេញក៏ត្រូវតិចជាងមុន។ ជាមួយនឹងការលក់មានកំណត់ រុស្ស៊ីនឹងត្រូវបន្ថយផលិតកម្មប្រេង ហើយវានឹងឈានទៅ កាត់បន្ថយលំហូរសាច់ប្រាក់ និងបង្កប៉ះពាល់បន្ថែមទៀតដល់វិស័យថាមពលរបស់ម៉ូស្គូ ពីលើទណ្ឌកម្មដែលមានស្រាប់។
យ៉ាងណាក៏ដោយ បើតាមការវិភាគរបស់អ្នកកាសែតជាន់ខ្ពស់ មានជំនាញខាងទីផ្សារពិភពលោក និងអាជីវកម្ម របស់សារព័ត៌មាន CNN បានឱ្យដឹងថា ការកំរិតតម្លៃលើប្រេងរុស្ស៊ី ទោះបានកាត់បន្ថយចំណូលរបស់ប្រទេសនេះក៏ពិតមែន តែវានឹងធ្វើឱ្យរង្គោះរង្គើទីផ្សារប្រេងសកលកាន់តែខ្លាំងជាងមុនទៀត។
បច្ចុប្បន្នចិន និងឥណ្ឌាកំពុងរីករាយក្នុងការទិញប្រេងតម្លៃថោកពីរុស្ស៊ី ហើយរុស្ស៊ីក៏កំពុងសប្បាយចិត្តនឹងចំណូលដែលបានពីការលក់ដ៏សន្ធឹកសន្ធាប់ពីប្រទេសទាំងពីរផងដែរ។ ស្របពេលដែលប្រេងឆៅសកលកំពុងឡើងថ្លៃ ទោះបីការកំណត់តម្លៃលើប្រេងរុស្ស៊ីត្រូវបានដាក់ចេញ ហើយចិននិងឥណ្ឌា បន្ថយការនាំចូលពីរុស្ស៊ីក៏ដោយចុះ ក៏ទីផ្សារសកលមិនអាចខ្វះប្រេងរុស្ស៊ីបានដែរ ពោលគឺប្រេងរុស្ស៊ីទោះក្នុងចំនួនតិចឬច្រើន ត្រូវតែលក់មានលក់នៅក្នុងទីផ្សារ។ ទន្ទឹមនឹងនោះ ទោះច្រើន ឬតិច ទីក្រុងម៉ូស្គូនៅតែអាចរកចំណូលបានពីការលក់ថាមពលដដែល។
ប្រភពអ្នកវិភាគពីសារព័ត៌មាន CNN បានឲ្យដឹងទៀតថា ពេលនោះចិន និងឥណ្ឌាត្រូវបង្ខំចិត្តរកប្រភពផ្សេងសម្រាប់ផ្គត់ផ្គង់តម្រូវការប្រេងរបស់ខ្លួន ជំនួសឱ្យប្រេងរុស្ស៊ីមួយចំនួន ដែលទាំងអស់នេះហើយ នឹងអាចធ្វើឱ្យតម្លៃប្រេងឆៅសកលហក់ឡើងដល់ ២០០ដុល្លារក្នុងមួយធុងបារ៉ែល ដោយហេតុថា ចិននិងឥណ្ឌា ត្រូវការប្រើប្រាស់ប្រេងច្រើនណាស់ សម្រាប់ប្រជាជនរាប់ពាន់លាននាក់របស់ខ្លួន។ បច្ចុប្បន្នតម្លៃប្រេងជួញដូរលើទីផ្សារមានដល់ ១១២ដុល្លារអាមេរិកហើយក្នុងមួយធុងបារ៉ែល។
សរុបមកវិធានការដាក់សម្ពាធលើតម្លៃប្រេងរុស្ស៊ីនៅម្ខាង ទំនងជាអាចកាត់បន្ថយប្រាក់ចំណូលសម្រាប់ទីក្រុងម៉ូស្គូពិតមែន តែនៅម្ខាងទៀតវានឹងជះឥទ្ធិពលមិនល្អដល់និន្នាការប្រេងសកលដែលកំពុងឡើងថ្លៃខ្លាំងស្រាប់ទៅហើយនោះ៕
