តើកម្ពុជា មានសមត្ថភាពអាចផ្គត់ផ្គង់ប្រេងកម្រិតណា ក្រោយបិទការនាំចូលប្រេងពីប្រទេសថៃ?

លោកបណ្ឌិត ហុង វណ្ណៈ អ្នកសិក្សាស្រាវជ្រាវសេដ្ឋកិច្ចនៅរាជបណ្ឌិត្យសភាកម្ពុជា យល់ឃើញថា ការបិទការនាំចូលប្រេងពីប្រទេសថៃ នឹងមិនអាចធ្វើឱ្យប៉ះពាល់ដល់ការផ្គត់ផ្គង់ប្រេងលើទីផ្សារកម្ពុជា នោះទេ ដោយសារកម្ពុជា មានកិច្ចសហការក្នុងការទិញប្រេងពីបណ្ដាប្រទេសមួយចំនួនក្នុងតំបន់ ហើយក៏អាចទិញប្រេងពីប្រទេសផ្សេងនៅក្រៅតំបន់ផងដែរ។ ការបិទលែងឱ្យនាំចូលប្រេងពីប្រទេសថៃនេះ ត្រូវបានអ្នកជំនាញរូបនេះលើកឡើងថា នឹងធ្វើឱ្យប្រទេសថៃ មានការបាត់បង់ប្រាក់ចំណូលរាប់សិបលានដុល្លារដែលបានពីការនាំចេញ។ សម្រាប់អ្នកជំនាញរូបនេះការបិទការនាំចូលប្រេងឥន្ធនៈពីថៃនឹងមិនអាចជំរុញឱ្យតម្លៃប្រេងនៅកម្ពុជា មានការប្រែប្រួលនោះទេ ពោលគឺតម្លៃប្រេងវាឡើងចុះអាស្រ័យលើទីផ្សារអន្តរជាតិ។

​ដោយឡែកឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានគូសបញ្ជាក់ថា បន្ទាប់ពីបិទការនាំចូលប្រេងពីប្រទេសថៃ កម្ពុជានឹងបង្កើនការនាំចូលប្រេងពីប្រទេសវៀតណាម និងប្រទេសសិង្ហបុរី ជាដើម ដើម្បីយកមកបំពេញតម្រូវការប្រើប្រាស់ក្នុងស្រុក។ កត្តានេះបានជំរុញឱ្យ ឯកឧត្តម ហ៊ានអះអាងថា ការបិទការនាំចូលប្រេងពីប្រទេសថៃនឹងមិនប៉ះពាល់ដល់ការផ្គត់ផ្គង់ប្រេងនៅកម្ពុជា នោះទេ។

​សូមបញ្ជាក់ថា សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជាបានសម្រេចបិទការនាំចូលប្រេងឥន្ធនៈ និងឧស្ម័នគ្រប់ប្រភេទពីប្រទេសថៃចាប់ពីថ្ងៃទី២៣ ខែមិថុនា ឆ្នាំ២០២៥ តទៅ។ ជាមួយគ្នានេះ សម្តេចធិបតី បានសង្កត់ធ្ងន់ថា បណ្ដាក្រុមហ៊ុនចែកចាយប្រេងឥន្ធនៈនៅកម្ពុជា មានលទ្ធភាពនាំចូលប្រេងឥន្ធនៈ និងឧស្ម័នពីប្រភពផ្សេងគ្រប់គ្រាន់ ដើម្បីផ្គត់ផ្គង់តម្រូវការប្រើប្រាស់ក្នុងស្រុក និងមិនមានការប្រឈមនោះទេ៕

អត្ថបទ៖ បូ ដូឡា​