បច្ចុប្បន្នប្រធានាធិបតីអាម៉េរិក លោក ដូណាល់ ត្រាំ កំពុងយកពន្ធ២៥% លើការនាំចូលដែកថែប និងអាលុយមីញ៉ូមបរទេស ដោយសង្ឃឹមថា ពន្ធនេះនឹងផ្តល់ឱ្យអ្នកផលិតក្នុងស្រុកធូរចិត្តពីការប្រកួតប្រជែងជាសកលដ៏ខ្លាំងក្លា ដែលអនុញ្ញាតឱ្យពួកគេអាចដំឡើងថ្លៃកាន់តែខ្ពស់។
អនុប្រធានគណៈកម្មាការអឺរ៉ុប លោក ម៉ារ៉ូស សេហ្វកូវិក (Maroš Šefčovič) បានចាត់ទុកការដំឡើងពន្ធ២៥% របស់អាម៉េរិកនេះ គឺប្រឆាំងនឹងផលិតភាពសេដ្ឋកិច្ចសកល ដោយសារខ្សែច្រវាក់ផលិតកម្មមានការប្រទាក់ក្រឡាគ្នាយ៉ាងស៊ីជម្រៅរវាងទំនាក់ទំនងពាណិជ្ជកម្ម និងវិនិយោគឆ្លងដែនដ៏ទូលំទូលាយរបស់សហភាពអឺរ៉ុប។
ជាមួយគ្នានេះ ប្រធានគណៈកម្មការអឺរ៉ុប លោកស្រី យូស៊ូឡា វ៉ុនឌឺ ឡេយែន (Ursula von der Leyen) បានបញ្ចេញប្រតិកម្មចំពោះការដាក់ពន្ធរបស់លោក ត្រាំ នេះ ហើយថា សហភាពអឺរ៉ុបនឹងធ្វើសកម្មភាពដើម្បីការពារផលប្រយោជន៍សេដ្ឋកិច្ចរបស់ប្លុកនេះ។ លោកស្រីបានសង្កតធ្ងន់ថា សង្គ្រាមពន្ធគយ ក៏ដូចជាពន្ធដារដែរ វាមិនល្អសម្រាប់អាជីវកម្មនោះទេ ហើយវាកាន់តែអាក្រក់ទៀតសម្រាប់អ្នកប្រើប្រាស់។ ដូច្នេះហើយរាល់ការយកពន្ធមិនសមហេតុផលលើសហភាពអឺរ៉ុប នឹងមានតបតវិញដោយប្លុកនេះយ៉ាងរឹងមាំ និងមានសមាមាត្របំផុត។
លោក ប៊ឺន ឡាញ (Bernd Lange) ប្រធានគណៈកម្មាធិការពាណិជ្ជកម្មរបស់សភាអឺរ៉ុប បានព្រមានថា ឱ្យតែលោក ត្រាំ ចាប់ផ្តើមអនុវត្តពន្ធលើដែកថែបភ្លាម សហភាពអឺរ៉ុប ក៏នឹងចាប់ផ្តើមវិធានការតបតវិញផងដែរ ដោយផ្ដោតសំខាន់លើផលិតផលរបស់អាម៉េរិកសំខាន់ៗដូចជាស្រា ម៉ូតូ សម្លៀកបំពាក់ សណ្ដែកសៀង ស្រាវីស្គី និងផលិតផលជាច្រើនទៀត ដែលវានឹងធ្វើឱ្យប៉ះពាល់ដល់អ្នកនាំចេញរបស់អាម៉េរិកជាក់ជាមិនខានឡើយ៕
អត្ថបទ៖ សុខ មង្គល
