លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកប្រចាំនៅកម្ពុជា យល់ឃើញថា ដើម្បីអាចធ្វើឱ្យវិស័យទេសចរណ៍របស់កម្ពុជា កាន់តែមានភាពទាក់ទាញ កម្ពុជាគួរមានការផ្លោស់ប្តូរក្នុងផ្សព្វផ្សាយដោយងាកទៅផ្តោតសំខាន់លើការផ្សព្វផ្សាយតាមប្រព័ន្ធបច្ចេកវិទ្យា និងបង្កើតព្រឹត្តិការណ៍ទេសចរណ៍ឱ្យបានច្រើនបន្ថែមទៀត។ បើតាមអ្នកជំនាញរូបនេះ កម្ពុជាគួរផ្លាស់ប្ដូរទម្លាប់ពីការផ្សព្វផ្សាយផលិតផលទេសចរណ៍មកផ្សព្វផ្សាយគោលដៅទេសចរណ៍វិញ ព្រោះការផ្សព្វផ្សាយនេះមិនត្រឹមតែធ្វើឱ្យមានផលចំណេញនូវគោលដៅទេសចរណ៍ប៉ុណ្ណោះទេ ប៉ុន្តែក៏នឹងធ្វើឱ្យមានផលចំណេញយ៉ាងច្រើនដល់ផលិតផលទេសចរណ៍ផងដែរ។
ប្រធានសមាគមទេសចរណ៍អាស៊ីប៉ាស៊ីហ្វិកប្រចាំនៅកម្ពុជា រូបនេះ បានគូសបញ្ជាក់បន្ថែមថា ការផ្លាស់ប្ដូរទម្លាប់ផ្សព្វផ្សាយក្នុងវិស័យទេសចរណ៍នេះ គឺទាមទារឱ្យមានការចូលរួមពីគ្រប់ភាគីពាក់ព័ន្ធ។ អ្នកជំនាញរូបនេះសង្កេតឃើញថា ការរៀបចំបណ្ដុះបណ្ដាលមួយចំនួនកន្លងមក ហាក់ខ្វះការចូលរួមពីភាគីពាក់ព័ន្ធមួយចំនួនដូចជាម្ចាស់សណ្ឋាគារ ភោជនីយដ្ឋាន និងម្ចាស់អាជីវកម្មជាដើម ដោយពួកគេបានបញ្ជូនបុគ្គលិកដែលពុំសូវមានការយល់ដឹងលើកិច្ចការនេះមកចូលរួមជំនួសទៅវិញ ដែលបញ្ហានេះ គឺជាកត្តាមួយធ្វើឱ្យដើរមិនទាន់សភាពការណ៍។
សូមបញ្ជាក់ថា នៅក្នុងរយៈពេល៩ខែឆ្នាំ២០២៤នេះ កម្ពុជាទទួលភ្ញៀវទេសចរអន្តរជាតិ៤,៨លាននាក់ កើនឡើង២២,២% បើធៀបនឹងរយៈពេលដូចគ្នាកាលពីឆ្នាំ២០២៣ ។ នេះបើតាមស្ថិតិរបស់ក្រសួងទេសចរណ៍៕
អត្ថបទ៖ បូ ដូឡា
