កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នឹងចុះហត្ថលេខានៅថ្ងៃទី២៦ តុលា ខាងមុខនេះហើយ

កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នឹងក្លាយជាកិច្ចព្រមព្រៀងពាណិជ្ជកម្មសេរីទី២ បន្ទាប់ពីកិច្ចព្រមព្រៀងពាណិជ្ជកម្មសេរីរវាងកម្ពុជា-ចិន ដែលគ្រោងចូលជាធរមាននៅដើមឆ្នាំ២០២២។

កម្ពុជានិងកូរ៉េបានកំណត់ពេលវេលាជាក់លាក់រួចហើយ ក្នុងការចុះហត្ថលេខាលើកិច្ចព្រមព្រៀងពាណិជ្ជកម្មសេរីរវាងប្រទេសទាំងពីរ។ ឯកឧត្តម ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យឆ្លាស់វេនក្រសួងពាណិជ្ជកម្មបានបញ្ជាក់ប្រាប់ខេមបូណូមីសថា បើគ្មានអ្វីប្រែប្រួលទេភាគីទាំងពីរកម្ពុជា-កូរ៉េ នឹងចុះហត្ថលេខាលើកិច្ចព្រមព្រៀងពាណិជ្ជកម្មសេរីរវាងប្រទេសទាំងពីរនៅថ្ងៃទី២៦ ខែតុលា ឆ្នាំ២០២១។ ឯកឧត្តមបានគូសបញ្ជាក់ថា ដោយសារស្ថានភាពកូវីដ-១៩ នៅប្រទេសទាំងពីរមិនអំណោយផល ដូច្នេះការចុះហត្ថលេខារវាងភាគីទាំងពីរនឹងប្រព្រឹត្តទៅតាមប្រព័ន្ធអនឡាញ។

បើតាមឯកឧត្តម ប៉ែន សុវិជាតិ កិច្ចព្រមព្រៀងនេះ អាចនឹងចូលជាធរមាននៅត្រីមាសទី១ក្នុងឆ្នាំ២០២២ ដែលវានឹងក្លាយជាកិច្ចព្រមព្រៀងទីពីរ បន្ទាប់ពីកិច្ចព្រមព្រៀងពាណិជ្ជកម្មសេរីកម្ពុជា-ចិន ដែលនឹងចូលជាធរមាននៅដើមឆ្នាំ២០២២។ កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ត្រូវបានភាគីទាំងពីរចុះហត្ថលេខាបិទបញ្ចប់កិច្ចចរចា កាលពីអំឡុងខែកុម្ភៈ ឆ្នាំ២០២១ ដោយកាលនោះការចុះហត្ថលេខាក៏ធ្វើឡើងតាមប្រព័ន្ធអនឡាញដែរ។

ក្រៅពីកិច្ចព្រមព្រៀងពាណិជ្ជកម្មសេរីទាំងពីរ កម្ពុជា ក៏មានកិច្ចព្រមព្រៀងភាពជាដៃគូគ្រប់ជ្រុងជ្រោយថ្នាក់តំបន់ ឬហៅកាត់ថា RCEP និងច្បាប់ស្តីពីការប្រកួតប្រជែងពីរបន្ថែមទៀតផងដែរ ដែលគ្រោងចូលជាធរមាននៅដើមឆ្នាំ២០២២។ ក្រោមកិច្ចព្រមព្រៀង CKFTA និងកិច្ចព្រមព្រៀង RCEP កម្ពុជានឹងលើកលែងពន្ធប្រមាណ ៩៣.៨% នៃផលិតផលនាំចូលពីកូរ៉េខាងត្បូង ហើយកូរ៉េខាងត្បូងនឹងលើកលែងពន្ធប្រមាណ៩៥.៦% លើផលិផលរបស់កម្ពុជា។

បើតាមរបាយការណ៍របស់ក្រសួងពាណិជ្ជកម្ម ទំហំពាណិជ្ជកម្មទ្វេភាគីកម្ពុជា-កូរ៉េ នៅឆ្នាំ២០២០ សម្រេចបានជិត៩រយលានដុល្លារអាមេរិក ថយចុះប្រមាណ១៨% បើធៀបនឹងឆ្នាំ២០១៩ ដែលមានជាង១ពាន់លានដុល្លារអាមេរិក។

ទន្ទឺមនឹងនេះ ក្រោមកិច្ចព្រមព្រៀងពាណិជ្ជកម្មសេរីកម្ពុជា-ចិន កម្ពុជាអាចនាំចេញទំនិញជាង៣០០មុខទៅកាន់ទីផ្សារចិនដោយមិនចាំបាច់បង់ពន្ធ។ ហើយតាមរយៈកិច្ចព្រមព្រៀងនេះកម្ពុជារំពឹងថា វានឹងជួយជំរុញការនាំចេញទំនិញរបស់កម្ពុជាទៅកាន់ទីផ្សារចិនកើនឡើង២៥% បន្ថែមទៀត។ ពាណិជ្ជកម្មទ្វេភាគីកម្ពុជា-ចិនកាលពីឆ្នាំ២០២០ មានទំហំជាង៨ពាន់លានដុល្លារអាមេរិក ខណៈនៅ៩ខែក្នុងឆ្នាំ២០២១ ទំហំពាណិជ្ជកម្មរវាងប្រទេសទាំងពីរមានជិត៨ពាន់លានដុល្លារអាមេរិក៕