ប្រធានាធិបតី Zelensky បានសរសេរនៅលើ Twitter របស់លោកថា ការជជែកគ្នាលើកនេះ ជាផ្នែកមួយនៃការសន្ទនារវាងអ៊ុយក្រែននិងអាមេរិក ដើម្បីស្វែងការគាំទ្របន្ថែម ដើម្បីច្បាំងតទល់នឹងរុស្ស៊ីស្របពេលដែលការវាយប្រហារគ្នា បានឈានចូលដល់ថ្ងៃទី១២។
នាជំនួបតាមទូរសព្ទរវាងប្រមុខដឹកនាំនៃប្រទេសទាំងពីរ លោកហ្សេលេនស្គីបញ្ជាក់ថា ការសន្ទនានោះ គឺផ្ដោតលើបញ្ហាសន្តិសុខ ការគាំទ្រផ្នែកហិរញ្ញវត្ថុសម្រាប់អ៊ុយក្រែន និងទណ្ឌកម្មបន្ថែមទៀតប្រឆាំងនឹងរុស្ស៊ី។
គួរជម្រាបថា កាលពីសប្ដាហ៍មុន ពេលរុស្ស៊ី ផ្ដើមប្រតិបត្តិការយោធារបស់ខ្លួនលើអ៊ុយក្រែន ទីក្រុងវ៉ាស៊ីនតោនបានប្រកាសផ្ដល់កញ្ចប់ថវិកា និងគ្រឿងបរិក្ខាយោធាក្នុងតម្លៃ ៣៥០លានដុល្លារ ដែលជាជំនួយធំបំផុតមិនធ្លាប់មានរបស់អាម៉េរិកសម្រាប់បរទេស។ សហភាពអឺរ៉ុប និងសម្ព័ន្ធមិត្តណាតូផ្សេងទៀត ក៏បានផ្ដល់ជំនួយសព្វាវុធបន្តបន្ទាប់ដល់អ៊ុយក្រែនផងដែរ។
ក្នុងសេចក្ដីប្រកាសព័ត៌មានរបស់សេតវិមានឯណោះវិញ ប្រធានាធិបតីចូ បៃឌិន ក៏ធ្វើការជាមួយសភាដើម្បីធានាឱ្យបានប្រភពហិរញ្ញវត្ថុបន្ថែមទៀតទៅឲ្យអ៊ុយក្រែន។ សេតវិមានបន្តថា លោកបៃឌិន ស្វាគមន៍ការសម្រេចចិត្តរបស់ក្រុមហ៊ុន Visa និង Mastercard ក្នុងការផ្អាកប្រតិបត្តិការរបស់ពួកគេនៅក្នុងប្រទេសរុស្ស៊ី ទុកជាការដាក់ទណ្ឌកម្មនិងសម្ពាធបន្ថែម។
ប៉ុន្ដែ ប្រធានធិបតីរុស្ស៊ី លោក ពូទីន បានចេញមុខឆ្លើយតបថា ការដាក់ទណ្ឌកម្មពីសំណាក់ប្រទេសលោកខាងលិច មកលើរុស្ស៊ី គឺដូចជាការប្រកាសសង្គ្រាមជាមួយនឹងរុស្ស៊ីអ៊ីចឹងដែរ។
អត្ថបទគួរអាន
បន្ថែមពីនេះ នៅចំពោះមុខការបន្តផ្តល់ជំនួយសព្វាវុធ និងកម្លាំងមនុស្សពីលោកខាងលិចដល់អ៊ុយក្រែន ភាគីរុស្ស៊ីបានបង្ហាញការប្រឆាំងយ៉ាងដាច់ណាត់ជុំវិញបញ្ហានេះ។
ជាក់ស្តែង ក្រសួងការបរទេសរុស្ស៊ីបានអំពាវនាវឱ្យសហភាពអឺរ៉ុប និងប្រទេសនៃរដ្ឋសមាជិកណាតូឱ្យ បញ្ឈប់ការផ្តល់អាវុធទៅកាន់អ៊ុយក្រែនជាបន្ទាន់។ នេះបើតាមការចុះផ្សាយពីសារព័ត៌មានរដ្ឋរុស្ស៊ី។
ទីក្រុងម៉ូស្គូអំពាវនាវបែបនេះ ដោយសំអាងថា ពួកគេមានការព្រួយបារម្ភ ថាកាំជ្រួចប្រឆាំងរថក្រោះ និងយន្តហោះប្រភេទ Stinger ដែលបស្ចឹមលោកផ្តល់ឲ្យអ៊ុយក្រែន អាចធ្លាក់ក្នុងដៃរបស់ក្រុមភេរវករ ហើយដែលអាចបង្កការគំរាមកំហែងដល់ក្រុមហ៊ុនអាកាសចរណ៍។
គួរជម្រាបថា កាំជ្រួចប្រឆាំងរថក្រោះ និងយន្តហោះប្រភេទ Stingerនេះជាអាវុធមានប្រសិទ្ធមួយខ្លាំងណាស់ ពិសេសកម្លាំងរបស់វាដែលអាចប្រើកំទេចរថក្រោះបាន។ កន្លងមកយោធាអ៊ុយក្រែន បានប្រើអាវុធប្រភេទនេះ កំទេចរថក្រោះរបស់រុស្ស៊ីអស់ជាច្រើនមកហើយ។
ទោះយ៉ាងណា ការផ្គត់ផ្គង់ជំនួយពីលោកខាងលិច ទៅឲ្យអ៊ុយក្រែន គឺនៅតែបន្ដមានដដែល។ ជាក់ស្ដែង ក្រោយមានការប្រកាសពីសំណាក់ប្រធានាធិបតីអ៊ុយក្រែន ទទួលយកអ្នកស្មគ្រចិត្តចូលរួមជាមួយកងទ័ពអ៊ុយក្រែន ដើម្បីប្រយុទ្ធជាមួយនឹងសង្គ្រាមឈ្លានពានរុស្ស៊ីរួចមក ឃើញថា មានជនបរទេសមួយចំនួន បានស្មគ្រចិត្តចួលរួមជាមួយទាហានអ៊ុយក្រែន ដោយនៅប៉ុន្មានថ្ងៃមុននេះ លោក ហ្សេឡេស្គីន បានប៉ាន់ប្រមាណថា មានជនបរទេសប្រហែល១ម៉ឺន៦ពាន់នាក់ បានស្មគ្រចិត្តចូលរួមប្រយុទ្ធនៅអ៊ុយក្រែន។ ក្នុងនោះដែរ បើតាមការរាយការណ៍ពីសារព័ត៌មានសំឡេងសហរដ្ឋអាមេរិក មានពលរដ្ឋអាមេរិកាំងប្រមាណ ៣ពាន់នាក់ ក៏បានឆ្លើយតបថា ពួកគេស្មគ្រចិត្តចូលរួមជួយអ៊ុយក្រែនប្រយុទ្ធជាមួយរុស្ស៊ីផងដែរ។
សូមបញ្ជាក់ដែរថា នៅងចុងសប្ដាហ៍មុននេះ ប្រធានាធិបតីរុស្ស៊ី ក៏បានជំទាស់ការលើកឡើងរបស់ប្រធានាធិបតីអ៊ុយក្រែន ដែលអំពាវនាវសម្ព័ន្ធមិត្តលោកខាងលិចប្រកាសដាក់ចេញ ការហាមឃាត់ការហោះហើរលើអ៊ុយក្រែន (No-Fly Zone) ក្នុងគោលបំណងហាមឃាត់យន្ដហោះរុស្ស៊ីហោះហើរក្នុងប្រទេសអ៊ុយក្រែន។ ប៉ុន្ដែ លោកពូទីនព្រមានថា បើមានការចូលរួមដាក់ការហាមឃាត់យន្ដហោះ ហោះហើរនៅលើទឹកដីអ៊ុយក្រែនពីសំណាក់លោកខាងលិចមែន នោះរុស្ស៊ីចាត់ទុកថា លោកខាងលិច ក៏មានការចូលរួមនៅក្នុងជម្លោះប្រដាប់អាវុធជាមួយរុស្ស៊ីដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
