លោកស្រី ស៊ូ ស៊ូយួន (Xu Xueyuan) ភារធារីនៅស្ថានទូតចិនប្រចាំសហរដ្ឋអាមេរិកបានព្រមាននៅពេលលោកស្រី សៃ អ៊ីងវេនបានធ្វើដំណើរទៅដល់អាមេរិកកាលពីថ្ងៃពុធទី២៩មីនាថា ដំណើរទស្សនកិច្ចក្រៅប្រទេសរបស់មេដឹកនាំតៃវ៉ាន់ ដោយឈប់សំចតនៅលើទឹកដីអាមេរិកនៅពេលនេះគឺជា«កំហុស»មួយដែលនឹងមិនអាចរារាំងចិនមិនឱ្យឆ្លើយតបចំពោះទង្វើនេះបានឡើយ។
លោកស្រី Xu Xueyuan ក៏បានប្រកាសព្រមានពី«ការប្រឈមមុខដាក់គ្នាយ៉ាងធ្ងន់ធ្ងរ»ផ្សេងទៀតនៅក្នុងទំនាក់ទំនងរបស់មហាអំណាចជាគូប្រជែងនឹងគ្នានេះ ប្រសិនបើលោកស្រី សៃ អ៊ីងវេន មានការជួបប្រជុំជាមួយប្រធានសភាអាមេរិកលោក ខេវិន ម៉េកខាធី តាមការគ្រោងទុកមែននោះ។
លោកស្រី Xu បានផ្ញើសារទាំងនេះតាមរយៈសន្និសីទសារព័ត៌មានមួយកាលពីថ្ងៃពុធនៅពេលប៉ុន្មាននាទីប៉ុណ្ណោះបន្ទាប់ពីលោកស្រី សៃ អ៊ីងវេន បានចុះចតនៅញូវយ៉កជាកន្លែងឈប់សំចតសម្រាប់ការធ្វើដំណើរ រយៈពេល ១០ ថ្ងៃរបស់លោកស្រីទៅកាន់តំបន់អាមេរិកកណ្តាល។ មេដឹកនាំតៃវ៉ាន់រូបនេះ ត្រូវបានគេរំពឹងថានឹងធ្វើដំណើរទៅកាន់ទីក្រុង Los Angeles នៅពេលលោកស្រីត្រឡប់មកពីតំបន់នេះវិញនៅសប្តាហ៍ក្រោយនេះគឺនៅទីនោះហើយ ដែលគេរំពឹងថាលោកស្រីនឹងជួបលោក ម៉េកខាធី។
ចំណែកសហរដ្ឋអាមេរិកវិញក៏មិនបាននៅស្ងៀមដែរ ចំពោះការព្រមានរបស់ចិននេះ ដោយសេតវិមានបានធ្វើការព្រមានតបទៅទីក្រុងប៉េកាំងវិញថា ប្រទេសចិនមិនគួរប្រើដំណើរទស្សនកិច្ចរបស់មេដឹកនាំតៃវ៉ាន់នេះធ្វើជាលេស ដើម្បីបង្កើនសកម្មភាពគគ្លើនរបស់ខ្លួនប្រឆាំងទៅលើកោះតៃវ៉ាន់នោះទេ។
អត្ថបទគួរអាន
លោក ចន ឃើប៊ី (John Kirby) អ្នកនាំពាក្យសន្តិសុខជាតិរបស់សេតវិមានបានប្រាប់អ្នកយកព័ត៌មានថា ការធ្វើដំណើររបស់លោកស្រី សៃ អ៊ីងវេន នៅក្នុងទឹកដីអាមេរិកនេះ គឺជាដំណើរទស្សនកិច្ចថ្មីបំផុតនៅក្នុងដំណើរឆ្លងកាត់ទឹកដីអាមេរិក ដែលជាទម្លាប់ទៅហើយនោះ។
អ្នកនាំពាក្យសេតវិមានរូបនេះបានបញ្ជាក់ថា សាធារណរដ្ឋប្រជាមានិតចិនមិនគួរណាប្រើដំណើរឆ្លងកាត់ទឹកដីអាមេរិកនេះ ធ្វើជាលេសដើម្បីជំរុញឱ្យមានសកម្មភាពណាមួយនៅជុំវិញច្រកសមុទ្រតៃវ៉ាន់នោះឡើយ ហើយអាមេរិកគិតថា អ្វីៗហាក់ដូចជាមានភាពតានតឹងនៅពេលនេះរវាងអាមេរិក និងចិនមែន ក៏ប៉ុន្តែលោកបានជំរុញឱ្យទីក្រុងប៉េកាំងរក្សាបន្ទាត់ទំនាក់ទំនងបើកចំហ។
នៅថ្ងៃទី៣០មីនានេះ លោក សៃ មីងយិន (Tsai Ming-yen) អគ្គនាយកការិយាល័យសន្តិសុខជាតិតៃវ៉ាន់បាននិយាយនៅក្នុងទីក្រុងតៃប៉ិកោះតៃវ៉ាន់ថា មេដឹកនាំតៃវ៉ាន់តែងតែធ្វើដំណើរឆ្លងកាត់បែបនេះ អស់រយៈពេលជាច្រើនឆ្នាំមកហើយ។
លោក មីងយិន បានប្រាប់អ្នកយកព័ត៌មានថា តៃវ៉ាន់មានសិទ្ធិធ្វើទំនាក់ទំនងជាមួយសហគមន៍អន្តរជាតិក្នុងអំឡុងពេលដំណើរការនេះ ហើយលោកសង្ឃឹមថា ក្រុមបក្សកុម្មុយនិស្តចិននឹងមិនបញ្ចេញប្រតិកម្មខ្លាំងពេកនោះទេ៕
