វៀតណាម ដែលជាអ្នកភូមិផងរបងជាមួយកម្ពុជា ស្ថិតក្នុងចំណោមប្រទេសចំនួន៦ ដែលសហរដ្ឋអាម៉េរិក បានផ្តល់អាទិភាពខ្ពស់ក្នុងការចរចាលើបញ្ហាពន្ធបដិការ ដែលរដ្ឋបាលប្រធានាធិបតីអាម៉េរិក ដូណាល់ ត្រាំ បានដាក់លើប្រទេសផ្សេងៗរួមទាំងវៀតណាម កាលពីថ្ងៃទី២ ខែមេសា ឆ្នាំ២០២៥។ ក្រៅពីវៀតណាម ប្រទេសឥណ្ឌូនេស៊ី ចក្រភពអង់គ្លេស ឥណ្ឌា កូរ៉េខាងត្បូង និងជប៉ុន ដែលសុទ្ធសឹងជាប្រទេសមានសេដ្ឋកិច្ចធំៗ ក៏ទទួលបានឱកាសសម្រាប់ការចរចាលើបញ្ហានេះផងដែរ។
ពាក់ព័ន្ធដំណើការចរចាលើបញ្ហាពន្ធនេះ នាយករដ្ឋមន្ត្រីវៀតណាម លោក ផាម មិញជិញ (Pham Minh Chinh) បានអះអាងនៅក្នុងសម័យប្រជុំរដ្ឋសភា នៅដើមសប្តាហ៍នេះថា វៀតណាមនឹងបើកការចរចាជាមួយសហរដ្ឋអាម៉េរិក លើបញ្ហាការធ្វើពាណិជ្ជកម្មទ្វេភាគីនៅថ្ងៃទី៧ ខែឧសភា ឆ្នាំ២០២៥។
នៅក្នុងរបាយការណ៍ ស្តីពី ស្ថានភាពសេដ្ឋកិច្ចនៅដើមឆ្នាំ២០២៥ លោកនាយករដ្ឋមន្រ្តីវៀតណាម បានកត់សម្គាល់ថា ចាប់តាំងពីដើមឆ្នាំមកស្ថានភាពពិភពលោកមើលឃើញពីការអភិវឌ្ឍន៍យ៉ាងស្មុគស្មាញ និងមិនអាចទាយទុកជាមុនបាន ជាពិសេសការប្រកាសដែលមិននឹកស្មានដល់របស់សហរដ្ឋអាម៉េរិក ពាក់ព័ន្ធបញ្ហាពន្ធបដិការ ដែលបានជះឥទ្ធិពលយ៉ាងធ្ងន់ធ្ងរដល់កំណើនសេដ្ឋកិច្ចពិភពលោក និងខ្សែច្រវាក់ផ្គត់ផ្គង់សកលធ្ងន់ធ្ងរ និងរំខានដល់លំហូរពាណិជ្ជកម្ម និងការវិនិយោគអន្តរជាតិ។
គួររំលឹកថា ក្រោយការប្រកាសដាក់ពន្ធបដិការនេះបានមួយសប្តាហ៍ លោក ត្រាំ ក៏បានពន្យារពេលអនុវត្តពន្ធនេះចំនួន៩០ថ្ងៃ ដើម្បីទុកពេលឱ្យប្រទេសនានាដាក់សំណើសុំចរចារ ដែលមកដល់ពេលនេះប្រទេសដែលរងគំនាបពន្ធទាំងជាង១៨០ទាំងនោះ កំពុងមមាញឹកនឹងកិច្ចការនេះ រួមទាំងកម្ពុជាផងដែរ។
ក្រៅពីកម្ពុជា វៀតណាម និងឥណ្ឌូនេស៊ី ប្រទេសផ្សេងៗក៏កំពុងមមាញឹកធ្វើកិច្ចការលើបញ្ហានេះដែរ ខណៈប្រទេសខ្លះ ក៏បានបង្ហើបពីការប្រើប្រាស់យន្តការតំបន់ ដើម្បីចរចាជាមួយនឹងសហរដ្ឋអាម៉េរិក។ តាមស្ថិតិពីការិយាល័យតំណាងពាណិជ្ជកម្មសហរដ្ឋអាម៉េរិក បានឲ្យដឹងថា សហរដ្ឋអាម៉េរិក ជាប្រទេសដែលធ្វើពាណិជ្ជកម្មធំលំដាប់ទី២ នៅលើពិភពលោកបន្ទាប់ពីចិន។ ប្រទេសនេះ មានទំហំពាណិជ្ជកម្មសរុបជាមួយប្រទេសផ្សេងៗប្រមាណ៧ទ្រីលានដុល្លារ ក្នុងនោះអាម៉េរិក នាំចូលមានទំហំជាង៣ទ្រីលានដុល្លារ៕
ដោយៈ សរ សុជាតិ
