យោងតាមការចេញផ្សាយរបស់សារព័ត៌មាន The Straits Times វិធានការក្តៅគគុក និងម៉ឺងម៉ាត់របស់សេតវិមានក្នុងការផាត់កាណាដា ចេញពីសិទ្ធិដេញថ្លៃលើកិច្ចសន្យារដ្ឋបានកើតឡើងភ្លាមៗ បន្ទាប់ពីប្រធានគណៈកម្មការអឺរ៉ុប លោកស្រី អ៊ើស៊ូឡា វ៉ុន ឌើ ឡេយេន (Ursula von der Leyen) បានប្រកាសក្នុងសុន្ទរកថាបើកផ្លូវឱ្យកាណាដា អាចចូលជាសមាជិកវិសាមញ្ញរបស់សហភាពអឺរ៉ុប។ លោក ត្រាំ បានចោទប្រកាន់សំណើនេះថា ជាទង្វើអរិភាពចំពោះអាម៉េរិក ហើយបានព្រមានថា នឹងដំឡើងពន្ធទណ្ឌកម្មបន្ថែម ឬអាចឈានដល់ការផ្តាច់ការធ្វើពាណិជ្ជកម្មលើមុខទំនិញជាច្រើនជាមួយអឺរ៉ុបតែម្តង។
ជម្លោះពាណិជ្ជកម្មដ៏ក្ដៅគគុកនេះ បានជំរុញឱ្យកាណាដា ត្រូវខិតខំពន្លឿនការធ្វើពិពិធកម្មសេដ្ឋកិច្ច ដកខ្លួនចេញពីអន្ទាក់ នៃការពឹងផ្អែកលើទីផ្សារអាម៉េរិក បន្ទាប់ពីការចរចាទ្វេភាគីបានទទួលបរាជ័យយ៉ាងធ្ងន់ធ្ងរ។ កន្លងមកលោក ត្រាំ បានដាក់ពន្ធ៥០% លើទំនិញកាណាដា ហើយថ្មីៗនេះបានចេញបញ្ជាហាមឃាត់ការនាំចូលផលិតផលទឹកដោះគោ គ្រឿងស្រវឹង និងរថយន្តពីកាណាដា ថែមទៀត ដែលបង្ខំឱ្យរដ្ឋាភិបាលក្រុងអូតាវ៉ា ចាត់វិធានការវាយបកវិញដូចគ្នាដែរ។
ការគំរាមកំហែងសាជាថ្មីរបស់លោក ត្រាំ ទៅលើសហភាពអឺរ៉ុប កំពុងក្លាយជាការសាកល្បងលើកិច្ចព្រមព្រៀងពាណិជ្ជកម្មរវាងក្រុងវ៉ាស៊ីនតោន និងអឺរ៉ុប ដែលធ្លាប់បានកំណត់ពិដានពន្ធគយអតិបរមាត្រឹម ១៥% លើទំនិញភាគច្រើន។ បច្ចុប្បន្នសហភាពអឺរ៉ុប មិនទាន់បញ្ជាក់ជំហរផ្លូវការថា តើនឹងបន្តផែនការសមាជិកសហការជាមួយកាណាដាទៀតឬយ៉ាងណានោះទេ ខណៈប្រទេសសមាជិកមួយចំនួនសម្តែងការភ្ញាក់ផ្អើលយ៉ាងខ្លាំងចំពោះកំហឹងរបស់លោក ត្រាំ។
មិនខុសពីកាណាដានោះទេ សម្ពាធពាណិជ្ជកម្ម និងគោលនយោបាយពន្ធប្រែប្រួលដូចរលកធាតុអាកាសក្រោមរដ្ឋបាលលោក ដូណាល់ ត្រាំ ក៏កំពុងបង្ខំឱ្យសម្ព័ន្ធមិត្តចាស់ដូចជាអូស្ត្រាលី រត់រកផ្លូវរំដោះខ្លួនតាមរយៈការបង្កើនសម្ពន្ធភាពសេដ្ឋកិច្ចជាមួយប្លុកអឺរ៉ុប ដើម្បីការពារស្ថិរភាព និងសន្តិសុខជាតិរ
អត្ថបទៈ សួន ឡង់ទី
