តើក្រុមហ៊ុនអឺរ៉ុបណាខ្លះអាចទទួលបានផល និងបាត់ផលប្រយោជន៍ក្រោមវិធានការពន្ធរបស់លោក ត្រាំ?

ក្រោយរងគំនាបពន្ធបន្ថែម២០%ពីរដ្ឋបាលលោក ដូណាល់ ត្រាំ សហភាពអឺរ៉ុបកំពុងវាយតម្លៃពីផលប៉ះពាល់ និងរៀបចំយុទ្ធសាស្ត្រ ដើម្បីឆ្លើយតបនឹងគោលនយោបាយពន្ធរបស់អាម៉េរិក ដែលបានដាក់ចេញកាលពីថ្ងៃទី២ ខែមេសា ឆ្នាំ២០២៥។ តាមការសិក្សាស្រាវជ្រាវ ក្រុមហ៊ុនអ្នកវិភាគបានវាយតម្លៃថា ក្រោមសម្ពាធពន្ធថ្មីរបស់អាម៉េរិក ក្រុមហ៊ុននៅអឺរ៉ុបដែលអាចបន្តប្រតិបត្តិការ និងមានសក្តានុពលក្នុងការធ្វើពាណិជ្ជកម្មជាមួយសហរដ្ឋអាម៉េរិក អាចជាក្រុមហ៊ុនផលិតឧបករណ៍ប្រើប្រាស់ផ្សេងៗ និងឱសថ។

ទោះបីទីផ្សារពិភពលោកមានស្ថានភាពពិបាកវាយតម្លៃ ប៉ុន្តែសម្រាប់ក្រុមហ៊ុនផលិតឧបករណ៍ប្រើប្រាស់ហាក់មានកំណើន និងកម្រើកឡើងដល់ទៅ២,៦% ស្របពេលក្រុមហ៊ុនផលិតឱសថដូចជា GSK និង AstraZeneca ក៏បានសញ្ញានៃការកើនឡើងផងដែរ។ ផ្ទុយទៅវិញ ក្រុមហ៊ុនផលិតរថយន្ត និងម៉ាកប្រណីតៗនៅអាល្លឺម៉ង់ និងអ៊ីតាលីសុទ្ធតែជាក្រុមហ៊ុន ដែលត្រូវបានគេប៉ាន់ប្រមាណថា អាចប្រឈមមុខនឹងការខាតបង់ ដោយសារការដាក់ពន្ធថ្មីរបស់អាម៉េរិក។

ជាក់ស្តែងក្រុមហ៊ុនផលិតរថយន្តយក្សរបស់អាល្លឺម៉ង់ដូចជា BMW និង Mercedes សុទ្ធតែរងគ្រោះដោយសារគោលនយោបាយថ្មីរបស់លោក ដូណាល់ ត្រាំ ខណៈទីផ្សារផលិតផលប្រើប្រាស់ទូទៅល្បីៗដូចជា Burberry ធ្លាក់ចុះ៨% LVMH ថយចុះជិត៥% ដោយសារពន្ធឡើងថ្លៃ ហើយពលរដ្ឋអាម៉េរិកធ្លាក់ចុះប្រាក់ចំណូល។

អ្នកវិភាគបានលើកឡើងថា ការសម្រេចដាក់ចេញគោយនយោបាយពន្ធថ្មីរបស់សហរដ្ឋអាម៉េរិកកាលពីពេលថ្មីៗបានបង្កឱ្យទីផ្សារមានការប្រែប្រួល ហើយបានបង្កើនការភ័យខ្លាចនៃការធ្លាក់ចុះពាណិជ្ជកម្មសកលកាន់តែទូលំទូលាយ៕

ដោយៈ សរ សុជាតិ