បើយោងតាមការចុះផ្សាយរបស់សារព័ត៌មានម៉ាឡេស៊ី The Edge តម្លៃក្នុងកិច្ចសន្យាទិញកាកាវដ៏សកម្មបំផុតនាពេលអនាគតបានកើនឡើង៣,៤% ដោយឡើងដល់ជាង១ម៉ឺន២ពាន់ដុល្លារក្នុងមួយតោនមានការកើនឡើងជិត៣ដង បើធៀបនឹងឆ្នាំ២០២៤ នេះ។ កត្តាដែលជំរុញឱ្យតម្លៃកាកាវកើនឡើងនេះ គឺដោយសារការធ្លាក់ចុះទិន្នផលកាកាវនៅតាមបណ្ដាប្រទេសផលិតកាកាវមួយចំនួននៅតំបន់អាហ្រ្វិកខាងលិច ធ្វើឱ្យមានឱនភាពដ៏អាក្រក់បំផុតមិនធ្លាប់មានពីមុន និងធ្វើឱ្យក្រុមហ៊ុនមួយចំនួនអស់កាកាវពីក្នុងស្តុកទៀតផង។ តើប្រទេសណាខ្លះដែលដាំ និងនាំចេញកាកាវច្រើនជាងគេបំផុតលើពិភពលោក?
ប្រទេសដែលផលិត និងនាំចេញកាកាវច្រើនជាងគេបំផុតភាគច្រើននៅតំបន់អាហ្វ្រិកខាងលិច ដូចជាប្រទេសកូតឌីវ័រ ហ្គាណា និងអេក្វាឌ័រជាដើម ហើយតំបន់អាស៊ីមានប្រទេសឥណ្ឌូនេស៊ី។ ចំណែកនៅតំបន់អឺរ៉ុប មិនមានរបាយការណ៍អំពីការដាំដំណាំកាកាវនេះទេ ពួកគេភាគច្រើន គឺជាអ្នកនាំចូលផលិតផលមួយនេះប៉ុណ្ណោះ។
គិតត្រឹមឆ្នាំ២០២២ ប្រទេសកូតឌីវ័រ គឺជាអ្នកដាំ និងនាំចេញគ្រាប់កាកាវច្រើនជាងគេបំផុត ដែលមានតម្លៃនាំចេញរហូតដល់ជាង៣,៣ពាន់លានដុល្លារ។ បន្ទាប់មកគឺប្រទេសហ្គាណា ដែលបាននាំចេញកាកាវក្នុងតម្លៃសរុបជាង១ពាន់លានដុល្លារ។ បន្ទាប់មក គឺប្រទេសអេក្វាឌ័រ ដែលបាននាំចេញគ្រាប់កាកាវក្នុងតម្លៃ៩៣៧លានដុល្លារ។
ចំណែកប្រទេសឥណ្ឌូនេស៊ី នៅក្នុងតំបន់អាស៊ានឯណោះវិញ បានជាប់ចំណាត់ថ្នាក់លេខ១៣ក្នុងការដាំ និងនាំចេញកាកាវនៅលើពិភពលោក។ ប្រទេសឥណ្ឌូនេស៊ី បានដាំកាកាវលើផ្ទៃដីប្រហែល១,៥លានហិកតានៅទូទាំងប្រទេស ហើយនៅឆ្នាំ២០២២ ប្រទេសនេះ បាននាំចេញគ្រាប់កាកាវក្នុងតម្លៃសរុបជាង៨២លានដុល្លារ ភាគច្រើននាំចេញទៅប្រទេសម៉ាឡេស៊ី សិង្ហបុរី សហរដ្ឋអាម៉េរិក ហ្វីលីពីន និងហូឡង់៕
អត្ថបទ៖ សុខ មង្គល
