លោក តាគេស៊ី
កាសៃ (Takeshi Kasai) នាយកអង្គការសុខភាពពិភពលោកប្រចាំតំបន់ប៉ាស៊ីហ្វិកខាងលិច
បានកត់សម្គាល់ថា ចំនួនករណីឆ្លងក្នុងប្រទេសនៃ តំបន់អាស៊ីប៉ាស៊ីហ្វិក
កំពុងកើនឡើងយ៉ាងឆាប់រហ័ស ដែលភាគច្រើនបណ្តាលមកពីមេរោគកូវីដ១៩បំប្លែងខ្លួនប្រភេទ
ឌែលតា។
បើតាមទិន្នន័យរបស់ WHO ប្រចាំតំបន់បានបង្ហាញថា នៅ៣សប្តាហ៍ដំបូងក្នុងខែសីហា ករណីឆ្លងនៅតាមប្រទេស នៃតំបន់អាស៊ីប៉ាស៊ីហ្វិកមានប្រមាណ ១០% នៃករណីឆ្លងសរុបនៅទូទាំងសកលលោក ខណៈចំនួនអ្នកស្លាប់វិញបានតំណាងឲ្យប្រមាណ ៨%នៃករណីស្លាប់ក្នុងលោក។
លោក កាសៃបាននិយាយនៅក្នុងសន្និសារព័ត៌មានមួយថា៖ នៅក្នុងដំណាក់ដ៏លំបាកនេះ សូមឱ្យយើងទាំងអស់បន្តដំណើរទៅមុខទៀត ហើយសូមធ្វើការជាមួយគ្នា ទៅតាមលទ្ធភាពរៀងៗខ្លួន ដើម្បីកាត់បន្ថយការគំរាមកំហែងនៃមេរោគកូវីដ១៩ទាំងនៅក្នុងប្រទេស និងក្នុងតំបន់។
មន្ត្រី WHO រូបនេះ បានបន្តលើកឡើងថា ជាមួយនឹងការកើនឡើងនៅចំពោះមុខនៃករណីឆ្លង ដែលប្រទេសជាច្រើនកំពុងជួបប្រទះ មានសេណារីយ៉ូចំនួនពីរ ដែលអាចកើតមានឡើងនៅក្នុងរយៈពេលប៉ុន្មានខែខាងមុខនេះ។
អត្ថបទគួរអាន
សេណារីយ៉ូទីមួយគឺ ការចាក់វ៉ាក់សាំងក្នុងល្បឿនលឿន និងវិធានការបង្ការការឆ្លងនានា ដែលនឹងឈានទៅធ្វើឲ្យហានិភ័យនៃជំងឺកូវីដ-១៩ ត្រូវបានកាត់បន្ថយ និងអាចគ្រប់គ្រងបាន។
ផ្ទុយទៅវិញ សេណារីយ៉ូទី ២ដែលអាចកើតឡើងដែរនោះគឺ ការឆ្លងរាលដាលកាន់តែធ្ងន់ធ្ងរទៅៗ នៃមេរោគកូវីដ១៩ឌែលតា ព្រមទាំងការឈានទៅបំប្លែងខ្លួនជាមេរោគប្រភេទថ្មីៗទៀត ដែលអាចមានភាពធន់នឹងវ៉ាក់សាំងដែលគេផលិតបានក្នុងពេលបច្ចុប្បន្ន។
សូមជម្រាបថា នៅរយៈពេល២៤ម៉ោងចុងក្រោយនេះ មានប្រទេសចំនួន៦នៅក្នុងតំបន់អាស៊ីប៉ាស៊ីហ្វិក រួមមាន ប្រទេសជប៉ុន ម៉ាឡេស៊ី ហ្វីលីពីន ឥណ្ឌូនេស៊ី ថែ និងវៀតណាម សុទ្ធសឹងជាប្រទេសដែលមានករណីឆ្លងកូវីដ១៩ ខ្ពស់បំផុត។ បន្ថែមពីលើនេះ ប្រទេសទាំង៦ សុទ្ធសឹងជាប្រទេសដែលមានអត្រាចាក់វ៉ាក់សាំងទាបនៅឡើយ ស្របពេល ដែលមេរោគឌែលតាកំពុងរាតត្បាតខ្លាំងថែមទៀត។ ជាក់ស្ដែង ករណីឆ្លងថ្មីនៅថៃនាពេលបច្ចុប្បន្នមាន៩៣% ជាករណីឆ្លងមេរោគបំប្លែងថ្មី ឌែលតា។ នេះបើតាមរបាយការណ៍ពី នាយកដ្ឋានវិទ្យាសាស្ត្រវេជ្ជសាស្ត្រថៃ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
