អតីតរដ្ឋមន្ត្រីហិរញ្ញវត្ថុអង់គ្លេសលោក Rishi Sunak, លោក Nadhim Zahawi រដ្ឋមន្ត្រីហិរញ្ញវត្ថុ, លោកស្រី Liz Truss រដ្ឋមន្ត្រីការបរទេស, លោកស្រី Penny Mordaunt អតីតរដ្ឋមន្ត្រីការពារជាតិ និងអតីតរដ្ឋមន្ត្រីសុខាភិបាលលោកJeremy Hunt គឺសុទ្ធសឹងជាអ្នកដែលទទួលបានការគាំទ្រពីសមាជិកសភាជាង ២០ នាក់ ដែលជាកម្រិតមួយតម្រូវមាន ដើម្បីចូលក្នុងការប្រកួតយកតំណែងនាយករដ្ឋមន្ត្រី។
ទន្ទឹមនេះដែរក៏មានការចូលរួមពីបេក្ខជនខាងក្រៅមួយចំនួនផងដែរ មានដូចជាលោកស្រី Kemi Badenoch លោក Suella Braverman និងលោក Tom Tugendhat នៅក្នុងការបោះឆ្នោតជុំទីមួយនៅថ្ងៃពុធនេះ ដែលយ៉ាងហោចណាស់ត្រូវមានបេក្ខជនម្នាក់នឹងត្រូវលុបចោល។
លោក Sunak វ័យ ៤២ ឆ្នាំ និងរដ្ឋមន្ត្រីសុខាភិបាលលោក Sajid Javid គឺសុទ្ធតែជាអ្នកបានលាលែងពីតំណែងកាលពីសប្តាហ៍មុនក្នុងការតវ៉ាប្រឆាំងរដ្ឋបាល ដែលរងភាពអាស្រូវរបស់លោក ចនសុន ហើយក៏បានបង្ខំឱ្យលោក ចនសុន ចុះចេញពីតំណែងជាមេដឹកនាំគណបក្សអភិរក្សនិយមផងដែរ។
លោក Javid បានប្រកាសថា លោកនឹងចូលរួមប្រកួតយកតំណែងនេះ ប៉ុន្តែបានដកខ្លួនចេញទៅវិញកាលពីថ្ងៃអង្គារនៅពេលមិនមានការគាំទ្រគ្រប់គ្រាន់ពីសមាជិកសភាក្នុងបក្សនេះ។
លោក ចនសុន កំពុងតែបន្តស្ថិតនៅក្នុងការិយាល័យនៅផ្លូវ Downing Street ក្នុងឋានៈជានាយករដ្ឋមន្ត្រីរហូតដល់ការប្រកួតប្រជែងផ្ទៃក្នុង ដើម្បីស្វែងរកអ្នកស្នងតំណែងពីលោក ហើយលទ្ធផលនេះនឹងប្រកាសឱ្យដឹងនៅថ្ងៃទី០៥ ខែកញ្ញា។
ក៏ប៉ុន្តែគណបក្សការងារ ដែលជាបក្សប្រឆាំងដ៏ធំរបស់អង់គ្លេស បាននិយាយថា ខ្លួននឹងព្យាយាមបង្ខំឱ្យធ្វើការបោះឆ្នោតសម្ដែងការមិនទំនុកចិត្តលើរដ្ឋាភិបាល ដើម្បីព្យាយាមដកលោក ចនសុន ចេញពីតំណែងឱ្យបានឆាប់តាមដែលអាចធ្វើទៅបាន។
អត្ថបទគួរអាន
មេដឹកនាំគណបក្សការងារលោក Keir Starmer បាននិយាយថា តាមសកម្មភាពរបស់ពួកគេកាលពីសប្តាហ៍មុន គណៈកម្មាធិការរៀបចំការបោះឆ្នោតសភាបាន «សន្និដ្ឋានថា នាយករដ្ឋ មន្ត្រី(លោក ចនសុន) មិនស័ក្តិសមសម្រាប់តំណែងនេះទេ»។ គណបក្សការងារចង់បានការបោះឆ្នោតនៅថ្ងៃពុធនេះ ប៉ុន្តែកាសែត Daily Telegraph បានរាយការណ៍ថា រដ្ឋាភិបាលបានបដិសេធពេលវេលា ដើម្បីពិភាក្សាពីសំណើនេះ៕
