បើតាមមន្ត្រីអន្តោប្រវេសន៍ស្រីលង្កាបានប្រាប់អ្នកសារព័ត៌មានយ៉ាងដូច្នេះថា «លោក Rajapaksa និងភរិយា រួមជាមួយអង្គរក្សពីរនាក់ទៀត បានចាកចេញភ្លាមៗពីប្រទេសតាមយន្តហោះរបស់កងទ័ពអាកាសស្រីលង្កា»។
ប្រភពរដ្ឋាភិបាលបាននិយាយថា លោកបានចាកចេញពីប្រទេស្រីលង្កា ទៅរដ្ឋធានី ម៉ាល (Male) នៃប្រទេសម៉ាល់ឌីវ (Maldives)។ ប្រភពបានបន្តថា ប្រធានាធិបតីរូបនេះទំនងជានឹងបន្តដំណើរទៅកាន់ប្រទេសអាស៊ីមួយផ្សេងទៀត បន្ទាប់ពីចាកចេញពីកោះម៉ាល់ឌីវនោះ។
ទោះបីជាយ៉ាងណា មន្ត្រីអន្តោប្រវេសន៍ស្រីសង្កាបានប្រាប់ថា៖ «អាជ្ញាធរគ្មានសមត្ថកិច្ចក្នុងការហាមឃាត់ប្រធានាធិបតីក្នុងតំណែងមិនឱ្យចាកចេញពីប្រទេសនោះទេ»។
មួយវិញទៀត ប្រភពជិតស្និទ្ធនឹងលោកម៉ាហីនដា (Mahinda Yapa Abeywardena) ដែលជាប្រធានសភាស្រីលង្កាបានបង្ហើបឲ្យដឹងថា មកទល់នឹងពេលនេះ លោកមិនទាន់ទទួលបានលិខិតលាលែងពីតំណែងរបស់ប្រធានាធិបតីលោក Rajapaksa នៅឡើយទេ ទោះបីជាលោកបានភៀសខ្លួនចេញពីប្រទេសក៏ដោយ។
ការណ៍នេះនឹងជំរុញឲ្យនាយករដ្ឋមន្ត្រី លោករ៉ានីល វីក្រេមស៊ីងហី (Ranil Wickremesinghe) ក្លាយជាប្រធានាធិបតីស្តីទី ទោះបីជារូបលោកបានស្នើសុំលាលែងពីតំណែងរួចទៅហើយក្តី។ បើមិនដូច្នោះទេ អ្នកនាំពាក្យប្រធានាធិបតីនឹងក្លាយជាប្រធានាធិបតីស្តីទី រហូតដល់ប្រធានាធិបតីថ្មីត្រូវបានបោះឆ្នោតជ្រើសតាំងតាមរដ្ឋធម្មនុញ្ញ។
ទោះយ៉ាងណាក៏ដោយ សេចក្តីថ្លែងការណ៍មួយពីមេដឹកនាំបាតុកម្មបានព្រមានចំៗថា៖ «ក្រុមបាតុករនឹងធ្វើការទាមទារយ៉ាងម៉ឺងម៉ាត់» ប្រសិនបើនាយករដ្ឋមន្ត្រីលោករ៉ានីល មិនព្រមលាលែងពីតំណែងនៅរសៀលថ្ងៃពុធនេះ តាមការសន្យារបស់ខ្លួនទេនោះ។
អត្ថបទគួរអាន
ទោះយ៉ាងណាលោកលោកម៉ាហីនដា (Mahinda Yapa Abeywardena) បានគូសបញ្ជាក់ថាសភានឹងកោះប្រជុំឡើងវិញនៅថ្ងៃសុក្រសប្ដាហ៍នេះ ហើយនឹងបោះឆ្នោតជ្រើសរើសប្រធានាធិបតីថ្មីនៅប្រាំថ្ងៃក្រោយ។
បើទោះបីជាប្រធានាធិបតេយ្យស្រីសង្កាបានភៀសខ្លួនចេញពីប្រទេសមែន តែប្រភពនៃជំនួយការរបស់រដ្ឋាភិបាលបានប្រាប់ឲ្យដឹងថា បងប្អូនរបស់លោកប្រធានាធិបតី គឺអតីតនាយករដ្ឋមន្ត្រីស្រីលង្កា លោកម៉ាហីនដា រ៉ាចាបាស្កា (Mahinda Rajapaksa) និងអតីតរដ្ឋមន្ត្រីហិរញ្ញវត្ថុ លោកបាស៊ីល (Basil Rajapaksa) កំពុងនៅស្ថិតក្នុងប្រទេសស្រីលង្កានៅឡើយទេ។
គួររំលឹកឡើងវិញថា កាលពីខែឧសភាកន្លងទៅ រដ្ឋាភិបាលលោកប្រធានាធិបតី Rajapaksa បានតែងតាំងលោកម៉ូហាមេត ណាស៊ីត (Mohammed Nasheed) ដែលជាប្រធានសភានៃប្រទេសម៉ាល់ឌីវ និងជាអតីតប្រធានាធិបតីផងនោះ ឲ្យជួយសម្របសម្រួលសម្រាប់ការកៀរគរជំនួយដល់ប្រទេសស្រីលង្កា ក្នុងការដោះស្រាយវិបត្តិសេដ្ឋកិច្ច។
ទន្ទឹមនឹងនោះ នៅខែដដែលលោក Nasheed បានបដិសេធជាសាធារណៈចំពោះការចោទប្រកាន់ថា លោកបាននឹងកំពុងជួយលោក Mahinda Rajapaksa ជាពិសេសខ្សែស្រឡាយត្រកូលរ៉ាចាបាសា ឱ្យទទួលបានកន្លែងជ្រកកោននៅក្នុងប្រទេសកោះម៉ាល់ឌីវ ពេលភាសខ្លួនពីប្រទេសនៅពេលណាមួយ។
ទោះជាបែបនោះក្តី កាលពីថ្ងៃអង្គារសប្តាហ៍នេះ មន្ត្រីអន្តោប្រវេសន៍ប្រទេសស្រីលង្កាបានរារាំងលោក Basil Rajapaksa ដែលជាអតីតរដ្ឋមន្ត្រីហិរញ្ញវត្ថុស្រីលង្កា ពីការហោះហើរចាកចេញពីប្រទេស ក្រោយលោកលាលែងពីតំណែងកាលពីខែមេសាកន្លងទៅផងដែរ៕
