សហរដ្ឋអាម៉េរិក ដែលជាមហាសេដ្ឋកិច្ចលេខ១លើពិភពលោក សម្រេចបានកំណើនផលិតផលក្នុងស្រុកសរុប១,៦% នៅត្រីមាសទី១ឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន។ តែយ៉ាងណាកំណើននេះទាបជាងការព្យាករកាលពីពេលកន្លងទៅ ដែលរំពឹងសម្រេចបានកំណើន២,៥%។ កំណើននេះមានកម្រិតទាបជាងកំណើន ដែលសម្រេចបានក្នុងត្រីមាសចុងក្រោយនៃឆ្នាំ២០២៣ ដោយពេលនោះសម្រេចបាន៣,៤%។
ទោះបីសេដ្ឋកិច្ចអាម៉េរិក មានការកើនឡើងក៏ដោយ តែពលរដ្ឋអាម៉េរិក ភាគច្រើន នៅមិនទាន់ពេញចិត្តចំពោះភាពល្អប្រសើរនៃសេដ្ឋកិច្ចនេះនៅឡើយទេ បន្ទាប់ពីធនាគារកណ្ដាលអាម៉េរិក នៅតែមិនទាន់សម្រេចបានគោលដៅអតិផរណា២% របស់ខ្លួន ខណៈអតិផរណាកាលពីខែមេសា មានក្នុងកម្រិត៣,៤%។ ហេតុផលដែលពលរដ្ឋអាម៉េរិក មិនទាន់មានភាពកក់ក្ដៅចំពោះអតិផរណានោះ គឺដោយសារកម្រិតអតិផរណានេះ វាបានធ្វើឱ្យប៉ះពាល់ដល់អំណាចទិញ និងការចំណាយសម្រាប់ទ្រទ្រង់ជីវិតរបស់ពួកគេ ក៏ដូចជាធ្វើឱ្យប៉ះពាល់ផ្សេងទៀតដូចជាបង្ខំចិត្តឱ្យពួកគេប្រើប្រាស់ផលិតផលគ្មានគុណភាពជាដើម។
អត្តបទគួរអាន
បើតាមការស្ទង់មតិរបស់សេដ្ឋវិទូអាម៉េរិកម្នាក់ គឺលោកស្រី ស្តេហ្វេនី ស្តេនឆេវ៉ា (Stefanie Stantcheva) បានបង្ហាញថា ៣ភាគ៤ នៃអ្នកឆ្លើយសំណួរជឿថា អតិផរណាបានបំផ្លាញអំណាចទិញរបស់ពួកគេ ហើយ៨០% គិតថា តម្លៃទំនិញកំពុងកើនឡើងលឿនជាងប្រាក់ឈ្នួលរបស់ពួកគេ ទោះបីជាកំណើនប្រាក់ឈ្នួលប្រចាំម៉ោងបានកើនលើសពីអតិផរណាតាំងពីខែកុម្ភៈ ឆ្នាំ២០២០ ក៏ដោយ។
ការស្ទង់មតិរបស់លោកស្រី Stantcheva នេះក៏បានបង្ហាញដែរថា ពលរដ្ឋអាម៉េរិក ច្រានចោលនូវគំនិតវិជ្ជមានណាមួយ ដែលទាក់ទងនឹងអតិផរណានេះផងដែរ ដោយអ្នកឆ្លើយសំណួរ ៧០% និយាយថា អតិផរណាកើនខ្ពស់បានបង្ហាញពីស្ថានភាពសេដ្ឋកិច្ចមិនល្អ។ ការស្ទង់មតិនេះ បានបង្ហាញថា ជាមធ្យមភាគពលរដ្ឋអាម៉េរិក ចង់បានអត្រាអតិផរណាប្រចាំឆ្នាំ០,២% ជាកម្រិតមួយទាបជាងការកំណត់របស់ធនាគារកណ្ដាលអាម៉េរិក និងទាបជាងឆ្ងាយពីកម្រិតអតិផរណាបច្ចុប្បន្នដែលមានក្នុងងកម្រិត៣,៤%៕
អត្ថបទ៖ សុខ មង្គល
None
