បន្ទាប់ពីមានកំណើនដល់ទៅពីរខ្ទង់ក្នុងអត្រា១៥,២% កាលពីត្រីមាសទី២ឆ្នាំនេះ សេដ្ឋកិច្ចឥណ្ឌាត្រូវបានគេព្យាករណ៍ថា នឹងមានកំណើន ថយចុះពីអត្រាពីរខ្ទង់មកនៅត្រឹម ៦,២% ក្នុងត្រីមាសទី៣ និងបន្តធ្លាក់មកត្រឹមកំណើន ៤,៥%នៅត្រីមាសចុងក្រោយនៃឆ្នាំ២០២២។ បើយោងតាមការស្ទង់មតិពីថ្ងៃទី២២-២៦ខែសីហារបស់ Reuters ការរំពឹងទុកជាមធ្យមសម្រាប់កំណើនពេញមួយឆ្នាំ២០២២ គឺរបស់ឥណ្ឌាគឺមានប្រហែល ៧,១%។
ក្រៅពីនេះ អតិផរណាត្រូវបានគេរំពឹងថា នឹងមានជាមធ្យម ៦,៩%នៅត្រីមាសទី៣ និង៦,២% នៅត្រីមាសទី៤ ឆ្នាំនេះ មុនពេលវាធ្លាក់ចុះមកត្រឹម ៥,៨% នៅក្នុងត្រីមាសទី១ឆ្នាំ២០២៣។ ចំនួននេះគឺប្រហាក់ប្រហែលនឹងការព្យាកររបស់ធនាគារកណ្តាលឥណ្ឌាដែរ។
ដោយឡែក បើតាមសេដ្ឋវិទូឥណ្ឌា ទោះបីប្រទេសនេះនៅតែជាសេដ្ឋកិច្ចធំដែលរីកលូតលាស់លឿនបំផុតក៏ដោយ ការចំណាយការប្រើប្រាស់ក្នុងស្រុកប្រហែលជាមិនរឹងមាំគ្រប់គ្រាន់ដើម្បីជំរុញកំណើនបន្ថែមទៀតទេ ដោយសារភាពអត់ការងារធ្វើនៅតែមានខ្ពស់ ហើយប្រាក់ឈ្នួល មានកម្រិតទាបបំផុត។
អត្ថបទគួរអាន
តាមរយៈការគាំទ្រកំណើនសេដ្ឋកិច្ចដោយការវិនិយោគ រដ្ឋាភិបាលក្រុងញូដេលីបានគិតគូរតែរឿងម្ខាង ដោយភ្លេចគិតអំពីកម្លាំងរុញច្រានដ៏សំខាន់ គឺការចំណាយការប្រើប្រាស់ក្នុងស្រុក។ នេះជាមូលហេតុដែលកំណើនប្រចាំឆ្នាំរបស់ប្រទេសឥណ្ឌានៅតែស្ថិតក្រោមអត្រាមុនមានការរាតត្បាតកូវីដ១៩។ ទន្ទឹមនេះ សេដ្ឋកិច្ចឥណ្ឌាមិនទាន់មានការរីកចម្រើនគ្រប់គ្រាន់ ដើម្បីទទួលយកកម្លាំងពលកម្មថ្មីៗប្រមាណ ១២លាននាក់ចូលក្នុងទីផ្សារការងារក្នុងមួយឆ្នាំៗនោះទេ។
សូមជម្រាបថា យោងតាមតារាងរបស់ធនាគារពិភពលោក បច្ចុប្បន្ននេះ ចំណូលជាតិសរុបសម្រាប់ប្រជាជនម្នាក់ៗរបស់ឥណ្ឌា ចន្លោះពី១ ០៨៦ ដល់ ៤២៥៥ដុល្លារ។ តាមការព្យាការណ៍របស់ World Bank សេដកិច្ចឥណ្ឌាឆ្នាំ២០២៣ខាងមុខ អាចមានកំណើនដល់ទៅ៧% ដែលជាកំណើនខ្ពស់បំផុត ប្រៀបធៀបទៅប្រទេសសេដ្ឋកិច្ចនាំមុខទាំងអស់៕
