ទិន្នន័យដែលចងក្រងដោយស្ថាប័នស្ថិតិកូរ៉េ (Statistics Korea) បានឱ្យដឹងថា ការងារសម្រាប់ក្រុមមនុស្សក្នុងវ័យ៤០ឆ្នាំបាននិងកំពុងធ្លាក់ចុះជាបន្តបន្ទាប់ចាប់តាំងពីខែកក្កដាឆ្នាំមុន ខណៈដែលមានការថយចុះការងារចំនួន ២២ ពាន់កន្លែងកាលពីខែមេសា បើធៀបនឹងពេលដូចគ្នាកាលពីឆ្នាំមុន។
ប្រទេសកូរ៉េខាងត្បូងបានបន្ថែមការងារប្រចាំឆ្នាំចំនួន ៨១៦ ពាន់កន្លែងក្នុងឆ្នាំ២០២២ ហើយជាមួយនឹងការបន្ថែមការងារនេះ ប្រទេសកូរ៉េបានជួយរក្សាកំណើនសេដ្ឋកិច្ចបន្តរហូតដល់ខែមេសា ក្នុងការងើបឡើងវិញនៃសេដ្ឋកិច្ចក្រោយជំងឺរាតត្បាតកូវីដ១៩។
ការធ្លាក់ចុះចំនួនការងារសម្រាប់មនុស្សក្នុងវ័យ ៤០ ឆ្នាំនៅកូរ៉េខាងត្បូងនេះ បានកើតឡើងចំពេលមានការធ្លាក់ចុះនៃផ្នែកផលិតកម្ម ដែលឆ្លុះបញ្ចាំងឱ្យឃើញអំពីការនាំចេញដ៏លំបាករបស់ប្រទេសនេះ នៅពេលមានភាពមិនប្រាកដប្រជានៃសេដ្ឋកិច្ចពិភពលោក។
កាលពីខែមេសា ចំនួនការងារនៅផ្នែកផលិតកម្មបានធ្លាក់ចុះ ៩៧ ពាន់កន្លែង ដោយពង្រីកការធ្លាក់ចុះរហូតដល់ ៣ ខែជាប់ៗគ្នា នៅឆ្នាំនេះ ហើយវាក៏បានកត់សម្គាល់ឱ្យឃើញការធ្លាក់ចុះខ្លាំងបំផុតចាប់តាំងពីការធ្លាក់ចុះការងារសរុបចំនួន ១១ ម៉ឺនកន្លែងនៅខែធ្នូ ឆ្នាំ២០២០ ដែរ។
អត្ថបទគួរអាន
ការនាំចេញទៅក្រៅប្រទេសសរុបរបស់កូរ៉េខាងត្បូងបានធ្លាក់ចុះជាង ១៤% បើធៀបនឹងឆ្នាំមុន ដោយធ្លាក់មកត្រឹមទំហំជិត ៥០ ប៊ីលានដុល្លារ នៅក្នុងខែមេសា ដោយសារការនាំចេញគ្រឿងអេឡិចត្រូនិកដែលជាទំនិញនាំចេញដ៏សំខាន់របស់ប្រទេសនេះបានធ្លាក់ចុះ ៤១% បើធៀបនឹងឆ្នាំមុន។ នេះជាលើកដំបូងចាប់តាំងពីឆ្នាំ២០២០ ដែលការនាំចេញបានធ្លាក់ចុះអស់រយៈពេល ៧ ខែជាប់ៗគ្នា។
អ្នកជំនាញនិយាយថា ការថយចុះនៃចំនួនការងារសម្រាប់មនុស្សក្នុងវ័យ ៤០ ឆ្នាំ ជាពិសេសអ្នកដែលធ្វើការក្នុងវិស័យផលិតកម្មដែលចាត់ទុកថាជាការងារប្រកួតប្រជែងមួយនោះ អាចជះឥទ្ធិពលអាក្រក់ដល់សេដ្ឋកិច្ចកូរ៉េខាងត្បូងនាពេលអនាគត។
លោក គីម ជុង ស៊ិក សាស្ត្រាចារ្យកិត្តិយសផ្នែកសេដ្ឋកិច្ចនៅសាកលវិទ្យាល័យ យ៉ុនសី បាននិយាយថា ការបាត់បង់ការងារសម្រាប់មនុស្សវ័យ ៤០ ឆ្នាំ ដែលជាអ្នកផ្គត់ផ្គង់គ្រួសារ អាចជះឥទ្ធិពលអវិជ្ជមានដល់គ្រួសារ និងបង្កបញ្ហាសង្គមផ្សេងៗទៀត៕
អត្ថបទ ៖ សុខ ជា
