ធនាគារពិភពលោកជំរុញឱ្យមានតម្លាភាពលើការគ្រប់គ្រង និងចាត់ចែងលើបំណុលសម្រាប់ប្រទេសកំពុងអភិវឌ្ឍន៍

ធនាគារពិភពលោកបានហៅដំណើរការនេះថា ប្រព័ន្ធតម្លាភាពបំណុលរ៉ាឌីកាល  (Radical debt transparency)។

ធនាគារពិភពលោកកំពុងជំរុញឱ្យមាននូវប្រព័ន្ធ តម្លាភាពបំណុលរ៉ាឌីកាលនេះ សម្រាប់ប្រទេស កំពុងអភិវឌ្ឍន៍ និងអ្នកផ្តល់ប្រាក់កម្ចី ដើម្បីងាយស្រួលទប់ទល់នឹងវិបត្តិនាពេលអនាគត។ នេះបើតាមសេចក្តីរាយការណ៍របស់ទីភ្នាក់ងារព័ត៌មានរ៉យទ័រ។

ប្រភពដដែលបានរាយការណ៍ថា ធនាគារពិភពលោកចង់ពង្រីកភាពស៊ីជម្រៅ និងលម្អិតនៃអ្វីដែលប្រទេសអធិបតេយ្យ បង្ហាញទាក់ទងនឹងដំណើរការគ្រប់គ្រងនិងចាត់ចែងប្រាក់កម្ចីថ្មី ដោយសារតែមកដល់ពេលនេះ មានប្រទេសកាន់តែច្រើនបានកំពុងតែធ្លាក់ចូលទៅក្នុងកិច្ចព្រមព្រៀងឥណទាន ឬ ប្រាក់កម្ចី ដែលមានលក្ខខណ្ឌ និងតម្រូវការស្មុគស្មាញ ដោយសារតែភាពចលាចលទីផ្សារពិភពលោក។

នាយកគ្រប់គ្រងជាន់ខ្ពស់របស់ធនាគារពិភពលោក លោក អាសែល  វាន់ ត្រូតសេនបឺក (Axel van Trotsenburg) បាននិយាយនៅក្នុងសេចក្តីថ្លែងការណ៍មួយថា នៅពេលដែលស្ថានភាពបំណុលត្រូវបានលាក់កំបាំង ហើយប្រភពហិរញ្ញប្បទានកាន់តែរីងស្ងួត លក្ខខណ្ឌនៃបំណុល គឺអាចកាន់តែអាក្រក់ទៅៗ ដូច្នេះប្រព័ន្ធដែលហៅថា "តម្លាភាពបំណុលរ៉ាឌីកាល”  គឺវាអាចផ្តល់ព័ត៌មានទាន់ពេលវេលា និងអាចជឿទុកចិត្តបាន ដើម្បីងាយស្រួលនៅក្នុងបំបែកវដ្តនៃបញ្ហា ។

ធនាគារពិភពលោកចង់ឱ្យប្រទេសនានា ធ្វើកំណែទម្រង់ច្បាប់ និងបទប្បញ្ញត្តិ ដែលកំណត់ឱ្យមានតម្លាភាពនៅពេលចុះហត្ថលេខាលើកិច្ចសន្យាប្រាក់កម្ចីថ្មី និងចែករំលែកទិន្នន័យបំណុលបន្ថែម៕

ដោយៈ សរ សុជាតិ