លោក បានហ្គា ដែលជាអតីតនាយកប្រតិបត្តិក្រុមហ៊ុនម៉ាស្ទើខាដ (Mastercard) ដែលបានចូលកាន់តំណែងជាប្រធានធនាគារពិភពលោកនៅថ្ងៃទី២ ខែមិថុនាកន្លងទៅនេះបានប្រកាសសំណើថ្មីមួយចំនួនដើម្បី «ធ្វើឱ្យតារាងតុល្យការរបស់ធនាគារនេះកាន់តែសកម្មជាងមុន» ដោយការប្រកាសនេះ ធ្វើឡើងនៅក្នុងអំឡុងពេលកិច្ចប្រជុំមន្ត្រីហិរញ្ញវត្ថុមកពីក្រុមប្រទេសសេដ្ឋកិច្ចជឿនលឿនទាំង២០ ឬហៅថា G20 នៅទីក្រុងហ្គានធីណាហ្គា (Gandhinagar) ប្រទេសឥណ្ឌា។
ជំហានថ្មីទាំងនេះគឺត្រូវការពិភាក្សាបន្ថែមទៀតជាមួយបណ្តាប្រទេសម្ចាស់ភាគហ៊ុន ហើយវាក៏ជាការបន្ថែមពីលើជំហានដំបូងមួយចំនួនទៀតដែលបានអនុម័តកាល ពីខែមេសា ដើម្បីជំរុញការផ្តល់ប្រាក់កម្ចីរបស់ធនាគារពិភពលោករហូតដល់ ៥០ពាន់លានដុល្លារ នៅក្នុងរយៈពេលមួយទសវត្សរ៍ខាងមុខទៀតផងដែរ។
អត្ថបទគួរអាន
សហរដ្ឋអាមេរិកជាម្ចាស់ភាគហ៊ុនធំជាងគេរបស់ធនាគារពិភពលោកបានចាប់ផ្តើមការជំរុញឱ្យមានកំណែទម្រង់កាលពីខែតុលា ហើយក្រោយមកបានតែងតាំងលោក បានហ្គា ជំនួសលោក ដេវីដ ម៉ល់ផាស (David Malpass) ជាមួយនឹងអាណត្តិជាក់លាក់មួយ ដើម្បីពន្លឿនការវិវត្តនៃស្ថាប័នដែលមានអាយុកាលជិត៧០ឆ្នាំមួយនេះ។
រដ្ឋមន្ត្រីហិរញ្ញវត្ថុសហរដ្ឋអាមេរិកលោកស្រី ជេណិត យេឡិន នៅសប្តាហ៍នេះបានអំពាវនាវឱ្យធ្វើការងារបន្ថែមទៀតដើម្បីធ្វើកំណែទម្រង់ធនាគារពិភពលោក និងធនាគារអភិវឌ្ឍន៍ពហុភាគីផ្សេងទៀតដោយនិយាយថា ការបង្កើនដើមទុនអាចនឹងត្រូវបន្តជជែកគ្នាលុះត្រាតែពួកគេបានធ្វើការផ្លាស់ប្តូរ ដើម្បីពង្រីកសមត្ថភាពរបស់ពួកគេដើម្បីជួយប្រទេសនានាក្នុងការដោះស្រាយការបម្រែបម្រួលអាកាសធាតុ និងបញ្ហាប្រឈមផ្សេងទៀត៕
អត្ថបទ៖ សុខ ជា
