ក្រុមអ្នកវិភាគនៅក្រុមហ៊ុន JP Morgan បាននិយាយនៅខែនេះថា ស្តុកប្រេងដែលរួមមានប្រេងឆៅ និងផលិតផលឥន្ធនៈ ឥឡូវនេះបានដើរតួនាទីដ៏សំខាន់ជាងប្រាក់ដុល្លារទៅទៀត នៅក្នុងការកំណត់តម្លៃប្រេង ដោយសារការដាក់ទណ្ឌកម្មរបស់បស្ចិមលោកទៅលើប្រទេសរុស្ស៊ីបានជំរុញឱ្យមានការជួញដូរប្រេងនៅក្នុងរូបិយណ្ណផ្សេងៗទៀតក្រៅពីប្រាក់ដុល្លារអាមេរិក។
លោក គ្រីស្តូហ្វឺ ហេន (Christopher Haines) អ្នកវិភាគនៅក្រុមហ៊ុន Energy Aspects បាននិយាយថា ពួកគេរំពឹងថា ស្តុកប្រេងនឹងកើនឡើងយ៉ាងខ្លាំងនៅក្នុងខែកក្កដា ហើយនៅត្រឹមចុងខែសីហាគេអាចនឹងបានឃើញការកសាងស្តុកប្រេង ដែលមានប្រហែលនឹកម្រិតឆមាសទីមួយនៃឆ្នាំនេះដែរ។
អ្នកវិភាគរូបនេះបានបន្ថែមថា បច្ចុប្បន្នទីផ្សារប្រេងកំពុងស្ថិតនៅក្នុងស្ថានភាពដ៏តឹងតែងនៃការផ្គត់ផ្គង់ប្រេង ហើយការកាត់បន្ថយទិន្នផលប្រេងរបស់ប្រទេសអារ៉ាប៊ីសាអូឌីតគឺជាការពន្លឿនពេលវេលាដ៏សំខាន់នៃ ការជំរុញឱ្យតម្លៃប្រេងកើនឡើងកាន់តែឆាប់រហ័ស។
ទីភ្នាក់ងារថាមពលអន្តរជាតិ (IEA) និងអង្គការនៃបណ្ដាប្រទេសនាំចេញប្រេង (OPEC) រំពឹងថា តម្រូវការប្រេងនឹងកើនឡើងលើសពីការផ្គត់ផ្គង់នៅឆ្នាំនេះ ដែលគេអាចនឹងត្រូវការប្រេងសរុបរហូតដល់ ៤០ម៉ឺនទៅ៥០ម៉ឺនបារ៉ែលក្នុងមួយថ្ងៃ ដែលភាគច្រើននឹងត្រូវការខ្លាំងនៅឆមាសទី២នៃឆ្នាំនេះ។
អត្ថបទគួរអាន
បើទោះជាស្តុកប្រេងពិភពលោកបានកើនឡើងក្នុងខែឧសភាដល់កម្រិតខ្ពស់បំផុតចាប់តាំងពីខែកញ្ញាឆ្នាំ២០២១ក៏ដោយ ប៉ុន្តែបើយោងតាមទីភ្នាក់ងារ IEA បានបង្ហាញថា ដោយសារតែមានតម្រូវការកើនឡើងខ្លាំងពីប្រទេសមិនមែនសមាជិក អង្គការសម្រាប់កិច្ចសហប្រតិបត្តិការ សេដ្ឋកិច្ច និងការអភិវឌ្ឍ (OECD) អ្នកវិភាគនិយាយថា សញ្ញានៃភាពតឹងតែងកំពុងតែលេចឡើងជាបណ្ដើរៗហើយជាពិសេសនៅក្នុងសហរដ្ឋអាមេរិកតែម្ដង។
ការធ្លាក់ចុះស្តុកប្រេងមានសភាពមិនដូចគ្នាទេ មកដល់ពេលនេះ ដោយស្តុកប្រេងនៅសហរដ្ឋអាមេរិក និងអឺរ៉ុបបានធ្លាក់ចុះ ប៉ុន្តែវាបានកើនឡើងនៅក្នុងប្រទេសចិន និងជប៉ុន។
ក្រុមអ្នកវិភាគនៅក្រុមហ៊ុន JP Morgan បាននិយាយថា វាហាក់ដូចជាថា ការកាត់បន្ថយដោយស្ម័គ្រចិត្តនូវផលិតកម្មប្រេងរបស់ប្រទេសទាំង៨នៃសមាជិកអង្គការ OPEC + នៅក្នុងខែមេសា បូករួមទាំងការកាត់បន្ថយឯកតោភាគីរបស់អារ៉ាប៊ីសាអូឌីតចំនួន១លានធុងបារ៉ែលក្នុង១ថ្ងៃ ដែលទើបតែចាប់ផ្តើមក្នុងខែកក្កដានេះកំពុងធ្វើឲ្យការផ្គត់ផ្គង់ប្រេងកំពុងថយចុះជាច្រើន។
ធនាគារ JP Morgan រំពឹងថា តម្លៃប្រេងស្តង់ដារគោល ដែលបានជួញដូរក្នុងកម្រិតខ្ពស់រយៈពេល៣ខែ ដែលមាន ៨៤ដុល្លារក្នុងមួយធុងបារ៉ែលនោះ នឹងកើនឡើងដល់ ៨៦ដុល្លារក្នុងមួយធុងបារ៉ែលនៅត្រឹមចុងត្រីមាសទី៣ មុនពេលវានឹងធ្លាក់ចុះមកវិញនៅត្រីមាសទី៤ជាពេលដែលស្តុកប្រេងចាប់ផ្តើមកើនឡើងវិញ។
ក្រុមហ៊ុន UBS បាននិយាយថា ខ្លួនរំពឹងថា តម្លៃប្រេងនឹងកើនឡើងដល់ចន្លោះពី ៨៥-៩០ដុល្លារក្នុងមួយធុងបារ៉ែលក្នុងរយៈពេលប៉ុន្មានខែខាងមុខទៀតនេះ៕
អត្ថបទ៖ សុខ ជា
