តាមការព្យាករដដែលនេះ កំណើនរបស់វិស័យទេសចរណ៍ ត្រូវបានរំពឹងទៀតថា នឹងកើនលើសកំណើនផលិតផលក្នុងស្រុកសរុបរបស់ពិភពលោកទៅទៀត។
តាមរបាយការណ៍របស់ក្រុមប្រឹក្សាទេសចរណ៍ និងការធ្វើដំណើរពិភពលោក (WTTC) បានចេញផ្សាយនៅថ្ងៃទី ២១ មេសា បានឲ្យដឹងថា ឧស្សាហកម្មទេសចរណ៍ ត្រូវបានរំពឹងថា នឹងវិលមករកកម្រិតដូចមុនពេលមិនទាន់មានកូវីដ១៩រាតត្បាតឡើងវិញ នៅឆ្នាំ២០២៣នេះ ដោយគេរំពឹងថា អត្រាកំណើននៅឆ្នាំ២០២៣ នឹងកើនលើសកំណើនពីឆ្នាំ២០២២ ដល់ទៅ ៥,៨% នៅគ្រាដែលកំណើនសេដ្ឋកិច្ចពិភពលោករំពឹងកើនឡើងត្រឹមតែ ២,៧%ប៉ុណ្ណោះ។ តាមរយៈកំណើនស្ទុះងើបឡើងវិញនៃឧស្សាហកម្មទេសចរណ៍នៅឆ្នាំក្រោយនេះ ត្រូវបានស្ថាប័នក្រុមប្រឹក្សាទេសចរណ៍ និងការធ្វើដំណើរពិភពលោកព្យាករទៀតថា នឹងអាចបង្កើតការងារថ្មីៗបានដល់១២៦លានកន្លែងផងដែរ។
គេនៅចាំបានថា កាលពីឆ្នាំ២០១៩ វិស័យទេសចរណ៍ គឺមានតំណាងឲ្យ ១ភាគ១០នៃទំហំផលិតផលក្នុងស្រុកសរុបរបស់ពិភពលោក និងទីផ្សារការងារ ប៉ុន្ដែ ជំងឺកូវីដ១៩បានបំផ្លាញឧស្សាហកម្មគ្មានផ្សែងមួយនេះ ក្នុងទំហំជាទឹកប្រាក់ប្រហែលជិត ១០ទ្រីលានដុល្លារ ហើយបានធ្វើឲ្យតម្លៃទិន្នផលនៃឧស្សាហកម្មនេះដាំក្បាលចុះពាក់កណ្ដាល និងធ្វើឲ្យមនុស្សប្រហែល៦២លាននាក់បានបាត់បង់ការងារ។
ប្រធានក្រុមប្រឹក្សាទេសចរណ៍ និងការធ្វើដំណើរពិភពលោក លោកស្រី ជូលៀ ស៊ីមសុន (Julia Simpson) បាននិយាយថា ការស្ទុះងើបឡើងវិញនៃវិស័យទេសចរណ៍ពិភពលោក នឹងមានការងើបឡើងជាមួយនឹងឥទ្ធិពលដ៏ខ្លាំងក្លា ហើយការស្ទុះងើបឡើងនេះ វាពិតជាពឹងផ្អែកខ្លាំងមែនទែន ទៅលើការបើកប្រទេសឡើងវិញរបស់រដ្ឋាភិបាលចិន។ លោកស្រីក៏បានអំពាវនាវ ឲ្យរដ្ឋាភិបាលប្រទេសទាំងអស់បើកព្រំដែនប្រទេសឲ្យមានការធ្វើដំណើរឡើងវិញផងដែរ។
អត្ថបទគួរអាន
យ៉ាងណាក៏ដោយចុះ គោលនយោបាយគ្មានកូវីដ១៩របស់ចិន នឹងការដាក់ចេញនូវវិធានការបិទខ្ទប់ទីក្រុងសំខាន់ៗនាពេលថ្មីៗនេះ ក៏បានធ្វើឲ្យរំខានដល់ពាណិជ្ជកម្មពិភពលោក និងការធ្វើដំណើរទាំងនៅក្នុងស្រុក និងអន្តរជាតិផងដែរ។
តាមការព្យាកររបស់ ស្ថាប័នក្រុមប្រឹក្សាទេសចរណ៍ និងការធ្វើដំណើរពិភពលោក ទំហំផលិតផលក្នុងស្រុកសរុបរបស់ឧស្សាហកម្មធ្វើដំណើរ និងទេសចរណ៍ នឹងសម្រេចបានដល់ជាង ៨,៣ទ្រីលានដុល្លារនៅឆ្នាំនេះ នឹងបន្ដកើនដល់ ៩,៦ទ្រីលានដុល្លារនៅឆ្នាំ២០២៣ ដែលជាការវិលទៅកម្រិតមួយស្មើនឹងពេលមិនទាន់មានកូវីដ១៩រាតត្បាតដែរ។
ការងារនៅក្នុងវិស័យទេសចរ ត្រូវបានព្យាករថា នឹងស្ទុះងើបឡើងដល់ ៣០០លានកន្លែងនៅក្នុងឆ្នាំនេះ នឹងបន្ដកើនដល់ ៣២៤លានកន្លែងនៅឆ្នាំ២០២៣ ជិតស្មើនឹងចំនួន៣៣៣លានកន្លែង ដែលធ្លាប់មានកាលពីឆ្នាំ២០១៩។
យ៉ាងណាមិញ សម្រាប់តែតំបន់អាស៊ីប៉ាស៊ីហ្វិកតែឯងប៉ុណ្ណោះ ឧស្សាហកម្មបដិសណ្ឋារកិច្ច នឹងមានទំហំផលិតផលក្នុងស្រុកសរុប កើនដល់ ៣,៤ទ្រីលានដុល្លារនៅឆ្នាំ២០២៣ កើនលើសទំហំ ៣,៣ទ្រីលានដុល្លារដែលធ្លាប់មានកាលពីឆ្នាំ២០១៩ទៅទៀត៕
None
