លោក ហ្វីលីប៉ូ ហ្គ្រានឌី (Filippo Grandi) ឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួនបានលើកឡើងថា មនុស្សរហូតដល់ទៅជាង១១៧លាននាក់ បានរត់ភៀសខ្លួនដោយសារកត្តាសង្គ្រាម ការធ្វើទុក្ខបុកម្នេញ និងអំពើហិង្សាជាដើម។ ឧត្តមស្នងការរូបនេះ បានគូសបញ្ជាក់ថា សង្គ្រាមនៅតែជាកត្តាដ៏ចម្បងដែលជំរុញឱ្យចំនួនជនភៀសខ្លួនកើនឡើងខ្លាំងបែបនេះ។
តាមរយៈរបាយការណ៍របស់ខ្លួនស្តីពីនិន្នាការសកលនៃការភៀសខ្លួនដោយបង្ខំ អង្គការសហប្រជាជាតិទទួលបន្ទុកជនភៀសខ្លួនបាននិយាយថា ចំនួនជនភៀសខ្លួនបានកើនឡើងជាលំដាប់ក្នុងរយៈពេល១២ឆ្នាំចុងក្រោយនេះ។ អង្គការនេះ បានប៉ាន់ប្រមាណថា ចំនួនជនភៀសខ្លួនបានបន្តកើនឡើងក្នុងរយៈពេល៤ខែដើមឆ្នាំ២០២៤ នេះ ហើយចំនួននេះទំនងជាបានកើនលើស១២០លាននាក់ហើយគិតត្រឹមដំណាច់ខែមេសា កន្លងទៅ។
សំដៅដល់ហានិភ័យនៃការផ្ទុះសង្គ្រាមថ្មីៗ លោក ហ្វីលីប៉ូ ហ្គ្រានឌី (Filippo Grandi) ដែលជាឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន បានលើកឡើងថា ប្រសិនបើនយោបាយភូមិសាស្ត្រអន្តរជាតិ គ្មានការប្រែប្រួលជាដុំកំភួនទេនោះ ចំនួនជនភៀសខ្លួននឹងបន្តកើនឡើងឥតឈប់ឈរ៕
ដោយ: តែម សុខុម
