លោក ឃឹម ប៊ុនឡែន ស្ថាបនិក និងជាប្រធានសហគមន៍ចម្ការស្តេចទុរេន កត់សម្គាល់ឃើញថា បច្ចុប្បន្នកសិករមានការពេញនិយមការដាំដុះទុរេន ប្រភេទពូជម៉ុនថង ឱខាក់ និងម៉ូសាងឃីង ដោយសារតែពូជទុរេនទាំងនេះមានរសជាតិឆ្ងាញ់ និងតម្លៃល្អនៅលើទីផ្សារ។ បើតាមការអះអាងរបស់អ្នកជំនាញរូបនេះ ពូជទុរេនដែលកសិករនិយមដាំបច្ចុប្បន្ន ដូចជា ម៉ុនថង និងម៉ូសាងឃីង ជាដើម ជាពូជនាំចូលពីក្រៅប្រទេស។ តែយ៉ាងណាកម្ពុជា ក៏មានពូជទុរេនផ្ទាល់ខ្លួនរបស់ខ្លួនផងដែរ គឺពូជឱខាក់ ដែលត្រូវបានកសិករនៅខេត្តកំពត ដាំជាង១០០ឆ្នាំមកហើយ ដែលទាមទារឱ្យមានការថែរក្សា និងអភិវឌ្ឍន៍បន្សុទ្ធពួជទុរេនឱ្យកាន់តែល្អប្រសើរបន្ថែមទៀត ដើម្បីសម្គាល់អត្តសញ្ញាណរបស់កម្ពុជា។
ស្រដៀងគ្នានេះ លោក ធឿន ប៊ុនហុង អ្នកបច្ចេកទេសផលិតកម្មដំណាំទុរេន នៃក្រុមហ៊ុន អង្គរហ្គ្រីន សង្កេតឃើញថា ពូជទុរេនដែលកំពុងពេញនិយមដាំដុះនៅកម្ពុជា នាពេលបច្ចុប្បន្ន មានដូចជា ម៉ុនថង ម៉ូសាងឃីង រី៦ និងភួងម៉ានី ព្រោះពូជទុរេនទាំងនេះមានលក្ខខណ្ឌពិសេសពីគ្នា។ បើតាមអ្នកជំនាញរូបនេះ ពូជទុរេនដែលកំពុងដាំដុះ និងពេញនិយមលើទីផ្សារកម្ពុជា នាពេលបច្ចុប្បន្ន មានប្រភពមកពីប្រទេសជិតខាង។ ការណ៍នេះជំរុញឱ្យអ្នកជំនាញរូបនេះស្នើឱ្យក្រសួងស្ថាប័នពាក់ព័ន្ធគួរបង្កើតអត្តសញ្ញាណពូជទុរេនក្នុងស្រុកឱ្យបានច្រើន ដើម្បីទាក់ទាញការចាប់អារម្មណ៍ពីទីផ្សារចិន និងទីផ្សារផ្សេងៗទៀត។
សូមបញ្ជាក់ថា ផ្លែទុរេនស្រស់របស់កម្ពុជា ត្រូវបានភាគីគយចិន បើកភ្លៀងខៀវឱ្យនាំចូលទីផ្សារចិន ក្រោមការគោរពតាមលក្ខខណ្ឌ និងភូតគាមអនាម័យ។ មុនឈានដល់ការនាំចេញជាផ្លូវការទៅចិនបាន អ្នកដាំ និងក្រុមហ៊ុននាំចេញត្រូវដាក់ពាក្យស្នើសុំចុះបញ្ជីចម្ការ និងរោងចក្រកែច្នៃ និងវេចខ្ចប់ផ្លែទុរេនស្រស់ទៅអគ្គនាយកដ្ឋានកសិកម្ម។ ក្រោយទទួលបានពាក្យស្នើសុំ អគ្គនាយកដ្ឋានកសិកម្ម នឹងចាត់មន្រ្តីជំនាញចុះណែនាំ និងវាយតម្លៃស្របតាមនីតិវិធីបច្ចេកទេសដូចមានកំណត់ក្នុងពិធីសារ រួចនឹងបញ្ជូនបញ្ជីឈ្មោះចម្ការ និងរោងចក្រកែច្នៃវេចខ្ចប់ផ្លែទុរេនស្រស់ទៅកាន់ភាគីគយចិន ដើម្បីគយចិន ចុះមកពិនិត្យនិងវាយតម្លៃបញ្ចប់មុននឹងឈានដល់ការនាំចេញជាផ្លូវការ៕
អត្ថបទ៖ បូ ដូឡា
