ម្ចាស់កសិដ្ឋាននេះ ក៏បានលើកទឹកចិត្តឲ្យប្រជាពលរដ្ឋនាំគ្នាចិញ្ចឹមគោពូជល្អៗ ដ្បិតវាមានតម្លៃខ្ពស់និងទីផ្សារល្អដែលអាចផ្តល់ប្រាក់ចំណេញខ្ពស់ដល់ពួកគេ។
ថ្លែងនៅក្នុងពិធីរៀបចំពិព័រណ៍ និងប្រកួតពូជគោកាលពីចុងសប្តាហ៍មុន ដែលមានការចូលរួមពីគោពូជមកពីខេត្តជាច្រើនទូទាំងប្រទេស ឧកញ៉ា ស្រី ចន្ធូ អគ្គនាយករងក្រុមហ៊ុន 7NG ដែលទើបទទួលបានពានស្ថាបនិកក្នុងវិស័យចិញ្ចឹមគោពីសមាគមចិញ្ចឹមគោនៅប្រទេសប្រេស៊ីល បានបង្ហាញពីផែនការ និងយុទ្ធសាស្ត្រក្នុងការអភិវឌ្ឍវិស័យចិញ្ចឹមគោពូជនៅកម្ពុជា។ ផែនការ និងយុទ្ធសាស្ត្រទាំងនោះ គឺលោកឧកញ៉ា គ្រោងនឹងបង្កើតស្ថានីយផលិតពូជគោ និងមជ្ឈមណ្ឌលផលិតហ្សែនសេនេទិច(ស្ពាម)ឲ្យបានច្រើនកន្លែង ដើម្បីផ្គត់ផ្គង់ការចិញ្ចឹមក្នុងស្រុក ឬនាំចេញទៅលក់នៅលើទីផ្សារអន្តរជាតិ។
ម្ចាស់កសិដ្ឋានចិញ្ចឹមគោ i7 រូបនេះបានគូសបញ្ជាក់ថា ការបង្កើតស្ថានីយផលិតកូនគោពូជ និងមេជីវិតនេះធ្វើឡើងក្នុងគោលបំណងកាត់បន្ថយថ្លៃដើមកូនគោពូជឲ្យមានតម្លៃសមរម្យ ដែលអាចលៃសមរម្យ ូជ និងមេជីវិតនេះ អនុញ្ញាតឲ្យប្រជាពលរដ្ឋមានលទ្ធភាពគ្រប់គ្រាន់ក្នុងការទទួលបានកូនគោពូជយកទៅចិញ្ចឹម។ លោកឧកញ៉ា ស្រី ចន្ធូជឿជាក់ថា បើមិនធ្វើបែបនេះទេប្រជាកសិករទំនងជាមិនអាចមានលទ្ធភាពទិញគោពូជល្អៗយកមកចិញ្ចឹមនោះទេ ព្រោះថា គោពូជមួយក្បាលដែលលោកនាំចូលពីបរទេសអាចមានតម្លៃចន្លោះពី ២ម៉ឺនដុល្លាររហូតដល់ជិត១០ម៉ឺនដុល្លារឯណោះ។
ជាមួយគ្នានេះ លោកឧកញ៉ា ស្រី ចន្ធូ លើកទឹកចិត្តឲ្យប្រជាជនកម្ពុជា ដែលចូលចិត្តនិងនិយមចិញ្ចឹមគោគួរងាកមកចិញ្ចឹមគោពូជជំនួសឲ្យគោក្តាម ឬគោគ្មានពូជច្បាស់លាស់ ដ្បិតគោពូជល្អមានតម្លៃខ្ពស់ និងទីផ្សារល្អ ដែលអាចផ្តល់ប្រាក់ចំណេញខ្ពស់។ បើតាមអ្នកជំនាញផ្នែកចិញ្ចឹមគោរូបនេះ នៅលើទីផ្សារបរទេសសាច់គោពូជល្អៗ១ខាំអាចមានតម្លៃរហូត១០០ដុល្លារ ដូច្នេះគេលក់សាច់តែ១គីឡូក្រាមអាចស្មើនឹងប្រជាជនកម្ពុជាលក់គោធម្មតាពីរក្បាលឯណោះ។ ប៉ុន្តែដើម្បីអាចទទួលបានតម្លៃខ្ពស់និងអាចឆ្លើយតបនឹងតម្រូវការទីផ្សារក្រៅប្រទេស ទាល់តែកសិករជ្រើសរើសពូជគោមកចិញ្ចឹម ដែលបានឆ្លងកាត់ការបន្សុទ្ធត្រឹមត្រូវ។
អត្ថបទគួរអាន
ជាមួយគ្នានេះ លោក ញ៉ុង ភារុន ម្ចាស់គោបាឥណ្ឌូប្រេស៊ីលកាត់ប្រាម៉ាន់ ដែលទទួលបានចំណាត់ថ្នាក់លេខ១ក្នុងការប្រកួតគោបាកម្រិត Class A បានបញ្ជាក់ថា បច្ចុប្បន្នគោរបស់លោកដែលមានអាយុប្រមាណ៩ឆ្នាំមានតម្លៃខ្លួនជាង១ម៉ឺនដុល្លារអាមេរិក។ ប៉ុន្តែកាលពីពីរបីឆ្នាំមុនគោរបស់លោកមានតម្លៃខ្លួនរហូតជាង២ម៉ឺនដុល្លារអាមេរិកឯណោះ។ លោកបន្តថា ក្រោមការបង្កាត់ពូជគោរបស់លោក កូនគោមួយក្បាលអាចលក់ចេញចន្លោះពី៤ពាន់ដុល្លារ រហូតដល់ជិត១ម៉ឺនដុល្លារ ខណៈគោបា១លើក គោរបស់លោកទទួលបានប្រាក់ឈ្នួលប្រមាណ៥០ម៉ឺនរៀល ឬលើសពីនេះ។
គួររំលឹកថា កាលពីចុងសប្តាហ៍មុនឧកញ៉ា ស្រី ចន្ធូ បានរៀបចំកម្មវិធីពិព័រណ៍ និងប្រកួតគោពូជឈ្មោលញីនៅតំបន់អភិវឌ្ឍន៍ 7NG វិហារសួគ៌ខេត្តកណ្តាល ដោយមានការចូលរួមពីគោពូជមកពីខេត្តផ្សេងៗគ្នាជាច្រើន។ គោលបំណងនៃការរៀបចំកម្មវិធីនេះ គឺដើម្បីចូលរួមចំណែកជួយលើកកម្ពស់ និងអភិវឌ្ឍន៍វិស័យកសិកម្ម ជាពិសេសវិស័យចិញ្ចឹមគោពូជនៅកម្ពុជា។ ការប្រកួតពូជគោញីឈ្មោលនេះ ដោយមានការចូលរួមដាក់ពិន្ទុ និងកាត់ក្តីពីអ្នកជំនាញមកពីប្រទេសថៃ និងប្រទេសប្រេស៊ីល។ ឧកញ៉ា ស្រី ចន្ធូ ក៏បានបង្ហាញពីគម្រោងរៀបចំព្រឹត្តិការណ៍នេះជាលក្ខណៈអន្តរជាតិនាពេលខាងមុខផងដែរ៕
None
