ក្រុមហ៊ុនចិនជាង១៥០នឹងមកស្វែងរកឱកាសវិនិយោគនៅកម្ពុជា ខណៈក្រុមហ៊ុនមួយគ្រោងបោះទុនជាង១ពាន់លានដុល្លារលើការផលិតសំបកកង់រថយន្ត

អ្នកជំនាញក្នុងវិស័យកៅស៊ូ ជឿជាក់ថា ប្រសិនក្រុមហ៊ុននេះពិតជាមានវត្តមាននៅកម្ពុជាមែននោះ វានឹងជួយធ្វើឱ្យទីផ្សារកៅស៊ូក្នុងស្រុកនឹងកាន់តែមានភាពល្អប្រសើរថែមទៀត ជាពិសជួយកាត់បន្ថយការពឹងផ្អែកខ្លាំងលើទីផ្សារខាងក្រៅ។

ថ្លែងនាឱកាសជួបសំណេះសំណាលជាមួយបងប្អូនសហគមន៍ខ្មែរដែលកំពុងរស់នៅក្នុងប្រទេសអូស្រ្តាលី និងនូវែលហ្សេឡង់កាលពីពេលថ្មីៗ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា នៅប៉ុន្មានថ្ងៃខាងមុខនេះនឹងមានក្រុមវិនិយោគិនចិនជាង១៥០ក្រុមហ៊ុនមកសិក្សាស្វែងរកឱកាសវិនិយោគនៅកម្ពុជា។

បើតាមការអះអាងរបស់ សម្តេចធិបតី នៅក្នុងចំណោមវិនិយោគិនចិនជាង១៥០ក្រុមហ៊ុននោះ គឺមានក្រុមហ៊ុនមួយគ្រោងនឹងបោះទុនវិនិយោគក្នុងទំហំជាង១ពាន់លានដុល្លារអាមេរិក ក្នុងការវិនិយោគលើការផលិតសំបកកង់រថយន្តនៅកម្ពុជា។

លោក ម៉ែន សុភ័ក្រ្ត ប្រធានសមាគមអភិវឌ្ឍន៍កៅស៊ូកម្ពុជាបានចាត់ទុកការប្រកាសរបស់សម្តេចធិបតីខាងលើ គឺជាដំណឹងដ៏ល្អមួយសម្រាប់អ្នកពាក់ព័ន្ធក្នុងវិស័យកៅស៊ូនៅកម្ពុជា ពិសេសវានឹងធ្វើឱ្យអ្នករកស៊ីក្នុងវិស័យនេះកាន់តែមានជំនឿទុកចិត្ត ដ្បិតថាវានឹងជួយជំរុញឱ្យទីផ្សារកៅស៊ូនៅកម្ពុជាកាន់តែមានភាពរីកចម្រើនថែមទៀត។

សម្រាប់អ្នកជំនាញរូបនេះ កាលណាមានរោងចក្រទិញផលិតផលកៅស៊ូដោយផ្ទាល់នៅក្នុងស្រុកនោះ វានឹងជួយកាត់បន្ថយការចំណាយ និងពេលវេលាក្នុងការធ្វើពាណិញ្ជកម្មទៅក្រៅប្រទេស ក៏ដូចជាជួយកាត់បន្ថយការពឹងផ្អែកខ្លាំងទៅលើទីផ្សារខាងក្រៅផងដែរ។

ជាក់ស្តែង បន្ទាប់ពីមានរោងចក្រផលិតសំបកកង់រថយន្តចំនួន៣ បានបើកដំណើរការនៅកម្ពុជាមក លោក ម៉ែន សុភ័ក្រ្ត កត់សម្គាល់ឃើញថា រោងចក្រទាំងនោះក៏បានស្រូបទាញ និងធានានូវការទិញផលិតផលកៅស៊ូដោយផ្ទាល់នៅក្នុងស្រុកបានមួយចំណែកផងដែរ។

ពាក់ព័នឹងការវិនិយោគនេះដែរ សម្តេចធិបតី ហ៊ុន ម៉ាណែត ក៏បានប្រកាសស្វាគមន៍វិនិយោគិនគ្រប់ជាតិសាសន៍ទាំងអស់ដែលមានបំណង់ចង់វិនិយោគនៅកម្ពុជា ពោលគឺមិនមែនស្វាគមន៍តែវិនិយោគិនចិននោះទេ ដោយកម្ពុជានៅតែប្រកាន់ភ្ជាប់នូវគោលនយោបាយលើកទឹកចិត្តស្មើគ្នាដល់បណ្ដាអ្នកវិនិយោគគ្រប់ជាតិសាសន៍ទាំងអស់។

ការអះអាងបែបនេះរបស់សម្តេចធ្វើឡើង គឺបន្ទាប់ពីមានការលើកឡើងថា ប្រមុខរាជរដ្ឋាភិបាលកម្ពុជាទាក់ទាញ និងស្វាគមន៍តែវិនិយោគិនចិន ឬប្រទេសណាមួយប៉ុណ្ណោះ។ យ៉ាងណាមិញ បើតាមសម្តេចធិបតី តាមរយៈការដើរទាក់ម៉ូយពីគ្រប់ទិសទី ចាប់តាំងពីរដ្ឋាភិបាលថ្មីបានចូលកាន់តំណែងនៅក្នុងរយៈពេល៦ខែមកនេះ កម្ពុជាទទួលបានគម្រោងវិនិយោគចំនួន១៧២គម្រោង ដែលមានទំហំវិនិយោទុនប្រមាណជិត៤ពាន់លានដុល្លារ៕