តម្លៃភាគហ៊ុន និងប្រេងនៅអាស៊ី នៅតែបន្ដកើនឡើង បន្ទាប់ពីនៅអាមេរិកហក់ឡើងខ្ពស់

ជាមួយគ្នានេះ តម្លៃប្រេង​បាន​​ហក់ឡើងខ្ពស់បំផុត​ដែរ ក្នុងរយៈពេល ១៣​ខែកន្លងចុងក្រោយនេះ ដោយសារតែ​មានសុទ្ធិដ្ឋិនិយម​លើ​ការវិលត្រឡប់មកវិញ​​នូវតម្រូវការប្រើប្រាស់​ប្រេង​នៅក្នុង​ពិភពលោក។

សន្ទស្សន៍​ភាគហ៊ុន នៅក្នុង​តំបន់អាស៊ីប៉ា​​ស៊ីហ្វិក ក្រៅពីប្រទេសជប៉ុន បានកើនឡើងជាង ០,៣% ។ សន្ទស្សន៍ផ្សារហ៊ុន​នៅកូរ៉េខាងត្បូង ក៏បានកើនឡើងជិត ​១%ដែរ ខណៈដែ​ល​សន្ទស្សន៍​ផ្សារហ៊ុន​ចិនបាន កើនជិត ០,៥% និងហុងកុង កើនជាង ០,២%។ 

រីឯ នៅផ្សារហ៊ុន​ជប៉ុនវិញ ក៏បានកើនឡើងជាង ០,៣% ផងដែរ។ ក្រុមអ្នកជំនាញ បាននិយាយថា កញ្ចប់ថវិកាជំរុញ​សេដ្ឋកិច្ច​របស់អាមេរិកជិត ២ទ្រីលានដុល្លារ និង​ភាវិជ្ជមាន​នៃដំណឺង​វ៉ាក់សាំង​នៅតែជា​កម្លាំងមួយជំរុញឲ្យទីផ្សារ​ភាគហ៊ុន និងប្រេង​បន្ដ​កំណើន​។

តម្លៃប្រេង បន្តបកើនឡើង​ ដោយទីផ្សារ​ប្រេងឆៅនៅអង់គ្លេស​​បានកើនឡើងជាង ០,៥% បន្ថែមទៀត ខណៈដែលនៅអាមេរិក ក៏មានការកើនឡើង ជាង ០,៦% ផងដែរ ពោលគឺ តម្លៃប្រេង​នៅ​អង់គ្លេស​មានតម្លៃជាង ៦០ដុល្លារក្នុងមួយធុងបារ៉ែល ខណៈដែល​នៅអាមេរិក​មានក្នុងរង្វង់​ប្រមាណ ៥៨ដុល្លារអាមេរិក​ក្នុងមួយធុងបារ៉ែល៕