តំណាងក្រុមហ៊ុន Hondo Group ដែលជាក្រុមហ៊ុនវិនិយោគលើគម្រោងរោងចក្រផលិតសម្បកកង់រថយន្ដ Celimo Tires បានអះអាងថា រោងចក្រនេះ នឹងមានប្រតិបត្តិការនៅមុនចុងឆ្នាំ២០២២ខាងមុខ ដោយវាមានសមត្ថភាពផលិតសម្បកកង់រថយន្ដបានដល់ទៅ ៦លានសម្បកកង់ក្នុងមួយឆ្នាំ និងអាចបង្កើតការងារបានដល់ទៅ ១ពាន់៦រយកន្លែងផងដែរ។ សម្បកកង់រថយន្ដ ដែលផលិតនៅក្នុងរោងចក្រនេះ នឹងត្រូវបានលក់ទៅកាន់ទីផ្សារសហរដ្ឋអាមេរិក និងប្រទេសប្រេស៊ីលជាដើម។
អត្ថបទគួរអាន
លោក ឡុង ឌីម៉ង់ អភិបាលរងខេត្តព្រះសីហនុបានអះអាងថា តំបន់សេដ្ឋកិច្ចពិសេសក្រុងព្រះសីហនុ បានទាក់ទាញសហគ្រាស និងស្ថាប័នឯកជនចំនួន ១៧០ក្រុមហ៊ុនមកពីប្រទេសចិន អឺរ៉ុប សហរដ្ឋអាមេរិច អាស៊ីអាគ្នេយ៍ និងតំបន់ផ្សេងទៀត បង្កើតការងារជិត៣ម៉ឺនកន្លែង។ បើគិតចាប់ពីខែមករា ដល់ខែវិច្ឆិកា ឆ្នាំ២០២១ ទំហំទឹកប្រាក់នៃការនាំចេញ នាំចូលរបស់សហគ្រាសតំបន់សេដ្ឋកិច្ចពិសេសមួយនេះមានដល់ទៅជាង២ពាន់លានដុល្លាអាមេរិក កើនឡើងជាង ៤០%ធៀបរយៈពេលដូចគ្នានៃឆ្នាំកន្លងទៅ។ តំបន់សេដ្ឋកិច្ចពិសេសក្រុងព្រះសីហនុ ផ្ដល់ផលប្រយោជន៍ និងការងារយ៉ាងច្រើនដល់ខេត្តព្រះសីហនុ កាត់បន្ថយការធ្វើចំណាកស្រុក និងភាពក្រីក្រ ហើយវាក៏ដើរតួនាទីជាអ្នកបើកច្រកពាណិជ្ជកម្ម និងកិច្ចសហប្រតិបត្តិការទូលំទូលាយផ្នែកពាណិជ្ជកម្មអន្តរជាតិក្នុងតំបន់ និងពិភពលោកផងដែរ។
បើតាមអភិបាលរងខេត្តព្រះសីហនុ បច្ចុប្បន្នខេត្តព្រះសីហនុមានតំបន់សេដ្ឋកិច្ចពិសេសចំនួន ១១ បានចុះបញ្ជីនៅក្រុមប្រឹក្សាអភិវឌ្ឍន៍កម្ពុជា ក្នុងនោះ តំបន់សេដ្ឋកិច្ចពិសេសក្រុងព្រះសីហនុបានសម្ពោធដាក់ដំណើរការតាំងពីឆ្នាំ២០០៨មកម្ល៉េះ៕
