លោក ហៃ ហ៊ុនឡេង ប្រធានទីភ្នាក់ងារជាតិមុខរបរ និងការងារ បានថ្លែងថា ក្នុងដំណាក់កាលនេះតម្រូវការងារហាក់មិនសូវផុសផុលទេ ទាំងក្រុមហ៊ុនជ្រើសរើសបុគ្គលិក និងអ្នកដែលស្វែងរកការងារធ្វើ។
លោក ហៃ ហ៊ុនឡេង បញ្ជាក់ថា« ដោយសារក្រុមហ៊ុនភាគច្រើនរវល់តែរឿងព្យួរការងារ ដោយសារជួបវិបត្តិកូវីដ-១៩ ម្យ៉ាងវិញទៀតនៅមជ្ឈមណ្ឌលការងារនីមួយៗក៏ត្រូវផ្អាកសិនខ្លះដែរ ចំពោះការចុះឈ្មោះផ្សេងៗ ដោយតែមិនមានការអនុញ្ញាតឲ្យមានការជួបជុំច្រើន»។
ដោយឡែកក្រុមឯកជនមួយចំនួន ក៏បានជួបប្រទះបញ្ហាដូចគ្នានេះដែរ ។ ជាក់ស្តែងក្រុមហ៊ុន ខេម អេច អ (CamHr) ដែលជាក្រុមហ៊ុនល្បីល្បាញ និងមានបទពិសោធន៍យូរក្រែលដែរ ចំពោះការប្រឹក្សាយោបល់ និងផ្តល់ការងារគ្រប់វិស័យដល់ពលរដ្ឋកម្ពុជា ជាយូរឆ្នាំមកហើយនោះ បានឲ្យដឹងថា នៅអំឡុងពេលកូវីដ១៩នេះ អ្នកស្វែងរកការងារមានច្រើនជាងធម្មតា ជាពិសេសអ្នកស្វែងការងារផ្នែកវិស័យសេវាកម្មទេសចរណ៍ ដូច ផ្នែកសណ្ឋាគារ ភោជនីយដ្ឋាន កាស៊ីណូជាដើម ប៉ុន្តែមិនមានការជ្រើសរើសសម្រាប់បច្ចុប្បន្ននេះទេ។
អត្ថបទទាក់ទង!
បុគ្គលិកផ្នែកអភិវឌ្ឍន៍អាជីវកម្ម នៃក្រុមហ៊ុន ខេម អេច អ (CamHr)បានបញ្ជាក់ថា « វិស័យផ្សេងៗដូចជា ធនាគារ ផ្នែកផលិតចំណីអាហារ និងសំណង់ជាដើម មិនមានបញ្ហាអ្វីទេ តែបើផ្នែកបំរើសវាកម្ម ក្នុងវិស័យទេសចរណ៍ គឺស្ទើរតែគ្មានរើសនៅក្នុងដំណាក់កាលនេះ»។
ស្រដៀងគ្មាននេះដែរ បុគ្គលិកនៃទំនាក់ទំនងនៃក្រុមហ៊ុនប្រឹក្សាយោបល់ការងារមួយទៀត គឹ ក្រុមហ៊ុន Aplus Consulting បានបញ្ជាក់ថា សម្រាប់ការងារផ្នែកសេវាកម្មនេះ មិនត្រឹមតែគ្មានក្រុមហ៊ុនថ្មីមកចុះឈ្មោះផ្សព្វផ្សាយរកបុគ្គលិកនោះទេ ថែមទាំងក្រុមហ៊ុនដែលបានចុះឈ្មោះហើយ សុំលុបចោលនូវគម្រោងជ្រើសរើសទៀតផង។ បុគ្គលិកក្រុមហ៊ុន Aplus Consulting Co,ltd បានប្រាប់ថា «ដំបូងឡើយ មួយរយៈពេលនៃការផ្ទុះកូវីដ-១៩ គឺមិនសូវមានអ្នកស្វែងរកការងារ ឬក្រុមហ៊ុនរើសបុគ្គលិកទេ តែក្រោយពេលដែជំងឺនេះហាក់ធូរស្បើយជាងមុនបន្តិច ក៏ចាប់ផ្តើមការសភាពធម្មតាឡើងវិញជាបណ្ដើរៗ ទាំងលំហូរនៃក្រុមហ៊ុនរើសបុគ្គលិក ទាំងអ្នកស្វែងរកការងារធ្វើ»។
តែយ៉ាងណាមិញ បុគ្គលិកក្រុមហ៊ុន Aplus Consulting Co,ltd បានបញ្ជាក់ថា ការកើនឡើងវិញនេះ គឺចំពោះតែក្រុមហ៊ុន និងការងារលើវិស័យផ្សេងៗប៉ុណ្ណោះ ចំណែកការងារ លើវិស័យទេសចរណ៍វិញ ហាក់នៅមានការថមថយដដែល ដោយសារតែអាជីវកម្មពាក់ព័ន្ធនឹងវិស័យនេះ មានការបិទទ្វារ និងព្យួរការងារយ៉ាងច្រើន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
