បើតាមអ្នកឧកញ៉ា ពុង ឃាវសែ ដែលជាអ្នកអភិវឌ្ឍន៍សាងសង់គម្រោងព្រលានយន្ដហោះថ្មីនេះ បានឲ្យដឹងថា ក្រុមហ៊ុនគ្រោងនឹងលក់បណ្ណបំណុលក្នុងតម្លៃសរុប ៣០០លានដុល្លារ ខណៈបច្ចុប្បន្ន លក់បាន៧០លានដុល្លារហើយ។ អគ្គនាយកទីផ្សារមូលបត្របានចាត់ទុកការលក់បណ្ណបំណុលនេះ គឺជាការកៀរគរវិនិយោគិនខ្មែរឲ្យចូលរួមចំណែកក្នុងការស្ថាបនាហេដ្ឋារចនាសម្ព័ន្ធជាប្រវត្តិសាស្ត្រមួយនេះរបស់កម្ពុជា។
នាពិធីចុះត្រួតពិនិត្យវឌ្ឍនភាពនៃការសាងសង់អាកាសយានដ្ឋានអន្តរជាតិភ្នំពេញថ្មីនៅព្រឹកថ្ងៃទី៩ ខែធ្នូ ឆ្នាំ២០២១ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ស្នើឲ្យគ្រឹះស្ថានធនាគារ និងមីក្រូហិរញ្ញវត្ថុចូលរួមទិញមូលបត្របំណុលរបស់ក្រុមហ៊ុន Cambodia Airport Investment ដែលបាននិងកំពុងបោះផ្សាយលក់សញ្ញាបណ្ណ ឬបណ្ណបំណុលរបស់ខ្លួន។ ការស្នើរបស់សម្តេចធ្វើឡើងក្នុងគោលបំណងដើម្បីឲ្យក្រុមហ៊ុនទទួលបានទុនបន្ថែមពីស្ថាប័នហិរញ្ញវត្ថុក្នុងស្រុក និងកាត់បន្ថយការខ្ចីបុលពីធនាគារក្រៅប្រទេស សម្រាប់ប្រើប្រាស់ក្នុងការសាងសង់ព្រលានយន្តហោះនេះ។ បើតាមការគូសបញ្ជាក់របស់សម្តេចតេជោ វាជារឿងកម្រណាស់ ដែលអ្នកវិនិយោគប្រើប្រាស់ទុនផ្ទាល់ខ្លួនសម្រាប់វិនិយោគ ដោយគ្មានការខ្ចីពីធនាគារ។
ពាក់ព័ន្ធការបោះផ្សាយលក់មូលបត្របំណុលនេះដែរ អ្នកឧកញ៉ា ពុង ឃាវសែ អគ្គនាយកក្រុមហ៊ុនសាជីវកម្មវិនិយោគក្រៅប្រទេសកម្ពុជា(OCIC)ដែលជាក្រុមហ៊ុនមេរបស់ក្រុមហ៊ុនសាងសង់ព្រលានយន្ដហោះអន្តរជាតិភ្នំពេញថ្មី បានអះអាងថា ក្រុមហ៊ុនសាងសង់ព្រលានយន្ដហោះអន្តរជាតិភ្នំពេញថ្មី (CAIC) គ្រោងបោះផ្សាយលក់បណ្ណបំណុលប្រមាណ៣០០លានដុល្លារអាមេរិក សម្រាប់ការសាងសង់ដំណាក់កាលទី១នេះ ខណៈបច្ចុប្បន្នការលក់សញ្ញាបណ្ណនេះប្រមូលទុនបានប្រមាណជាង៧០លានដុល្លារអាមេរិកហើយ នៅសល់តែជាង២០០ លានដុល្លារអាមេរិកទៀតប៉ុណ្ណោះ។ បើតាមអ្នកជំនួញដ៏ល្បីរូបនេះ មកទល់បច្ចុប្បន្នការស្ថាបនាព្រលានយន្តហោះ ដែលគ្រោងដាក់ឈ្មោះថាផ្លូវការ អាកាសយានដ្ឋានអន្តរជាតិតេជោក្រុងតាខ្មៅ មួយនេះ បានចំណាយដើមទុនអស់៣៧៥លានដុល្លារអាមេរិកហើយ និងគ្រោងចំណាយ៤៦៧លានដុល្លារអាមេរិកបន្ថែមទៀតនៅឆ្នាំ២០២២ ដោយ១ថ្ងៃត្រូវចំណាយជិត ១លាន៣សែនដុល្លារអាមេរិកឯណោះ។
អត្ថបទគួរអាន
ជុំវិញការស្នើឲ្យគ្រឹះស្ថានធនាគារ និងមីក្រូហិរញ្ញវត្ថុទិញមូលបត្របំណុលរបស់ ក្រុមហ៊ុនសាងសង់ព្រលានយន្ដហោះអន្តរជាតិភ្នំពេញថ្មីនេះដែរ ឯកឧត្តម ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជា យល់ឃើញថា ការស្នើនេះទំនងជាសម្តេចតេជោ ហ៊ុន សែន ចង់ឲ្យអ្នកវិនិយោគ ឬស្ថាប័នហិរញ្ញវត្ថុក្នុងស្រុកបានចូលរួមចំណែកក្នុងការសាងសង់អាកាសយានដ្ឋានអន្តរជាតិភ្នំពេញថ្មីនេះ ប្រសើរជាងការស្វែងរកប្រភពទុនពីក្រៅប្រទេស។
អាកាសយានដ្ឋានអន្តរជាតិភ្នំពេញថ្មីនេះ សាងសង់លើផ្ទៃដីប្រមាណ២ពាន់៦រយហិកតា ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល និងមួយផ្នែកស្ថិតនៅស្រុកបាទី ខេត្តតាកែវ។ បច្ចុប្បន្នព្រលានយន្តហោះដែលមានតម្លៃ១ពាន់៥រយលានដុល្លារអាមេរិកមួយនេះ សម្រេចការសាងសង់ដំណាក់កាលទី១ បានជាង២៧% ហើយ ដោយគ្រោងបញ្ចប់នៅអំឡុងឆ្នាំ២០២៣។ អាកាសយានដ្ឋាននេះជាប្រភេទ 4F ដែលមានសមត្ថភាពអាចឲ្យប្រភេទយន្តហោះហោះហើរចម្ងាយឆ្ងាយឆ្លងទ្វីបធុនយក្សដូចជា Airbus A380-800 និងប្រភេទ Boeing 747-800 អាចចុះចតបាន៕
None
