ភ្នាក់ងារឃ្លាំមើលអឺរ៉ុបថា ២០២៣ ជាឆ្នាំដែលមានអាកាសធាតុក្តៅបំផុត ក្នុងប្រវត្តិសាស្ត្រមនុស្សជាតិ

សេវាទទួលបន្ទុកបម្រែបម្រួលអាកាសធាតុរបស់សហភាពអឺរ៉ុប ឬហៅថា C3S បាននិយាយនៅក្នុងរបាយការណ៍មួយថា សីតុណ្ហភាពសកលជាមធ្យមក្នុងខែមិថុនា កក្កដា និងសីហា គឺ ១៦,៧៧ អង្សាសេ ដែលបានកើនឡើងក្នុងកំណត់ត្រាមិនធ្លាប់មាន ធៀបនឹងឆ្នាំ២០១៩ មានតែ ១៦,៤៨ អង្សាសេ។ បើតាមលោកស្រី Samantha Burgess អនុប្រធាន C3S បានអះអាងថា «រយៈពេលបីខែ ដែលយើងជួបប្រទះនឹងអាកាសធាតុក្តៅបែបនេះ គឺជាពេលវេលាក្តៅបំផុតក្នុងប្រវត្តិសាស្ត្រមនុស្សជាតិ ក្នុងរយៈពេលប្រហែល១២ម៉ឺនឆ្នាំកន្លងមកនេះ»។
សីតុណ្ហភាពផ្ទៃសមុទ្រខ្ពស់ជាសកលបានដើរតួនាទីយ៉ាងសំខាន់ក្នុងការដុតកម្ដៅពេញមួយរដូវក្ដៅ ដោយរលកកម្ដៅសមុទ្របោកបក់ភាគច្រើនទៅលើមហាសមុទ្រអាត្លង់ទិកខាងជើង និងសមុទ្រមេឌីទែរ៉ាណេ។ យោងតាមរបាយការណ៍នោះបន្ថែមថា សីតុណ្ហភាពសកលជាមធ្យមក្នុងរយៈពេលប្រាំបីខែដំបូងនៃឆ្នាំ២០២៣ ជាកំណត់ត្រាក្តៅបំផុតទីពីរ ដែលទាបជាងកំណត់ត្រាទី១ កាលពីឆ្នាំ២០០៦ ត្រឹមតែ ០,០១អង្សាសេប៉ុណ្ណោះ»។ ប៉ុន្តែលោកស្រី Samantha Burgess គូសបញ្ជាក់ថា បើក្រឡេកមើលកំដៅ ដែលយើងមាននៅក្នុងមហាសមុទ្រផ្ទៃ ត្រឹមដំណាច់ឆ្នាំ២០២៣នេះ នឹងក្លាយជាឆ្នាំដែលក្តៅបំផុតក្នុងកំណត់ត្រាមនុស្សជាតិ។

អគ្គលេខាធិការអង្គការសហប្រជាជាតិ លោក Antonio Guterres ធ្លាប់បានព្រមានរួចមកហើយថា គ្រោះថ្នាក់នៃអាកាសធាតុបានចាប់ផ្តើមហើយ។ អ្នកវិទ្យាសាស្ត្របានព្រមានជាយូរមកចំពោះការប្រើប្រាស់ឥន្ធនៈហ្វូស៊ីល ដែលបាន និងកំពុងធ្វើឲ្យអាកាសធាតុប្រែប្រួលគ្រប់ជ្រុងជ្រោយនៃផែនដី លឿនជាងអ្វីដែលមនុស្សទប់ស្កាត់បាន។ យោងតាមអ្នកវិទ្យាសាស្ត្រ មហាសមុទ្របានស្រូបយកប្រមាណ ៩០% នៃកំដៅលើស ដែលផលិតដោយសកម្មភាពរបស់មនុស្ស ចាប់តាំងយុគសម័យឧស្សាហកម្មបានផ្ទុះឡើង។
កំដៅលើសនេះនៅតែបន្តកកកុញជាឧស្ម័នផ្ទះកញ្ចក់ ដែលភាគច្រើនបានមកពីការដុតប្រេង ឧស្ម័ន និងធ្យូងថ្ម ដែលបង្កើតឡើងនៅក្នុងបរិយាកាសរបស់ផែនដី។ សីតុណ្ហភាពកាន់តែខ្ពស់ទំនងជានាំមកនូវបាតុភូតអាកាសធាតុ El Nino ដែលវានឹងធ្វើឱ្យកំដៅទឹកនៅភាគខាងត្បូងប៉ាស៊ីហ្វិក កន្លែងផ្សេងទៀត មានសីតុណ្ហភាពក្តៅជាងនេះទៅទៀតនៅចុងឆ្នាំ និងដល់ឆ្នាំក្រោយ៕