ទោះយ៉ាងណា ថ្នាក់ដឹកនាំមន្ទីរឧស្សាហកម្មខេត្តកែបរំពឹងថា ការផលិតអំបិលឆ្នាំនេះនឹងទទួលបានទិន្នផលអាចឆ្លើយតបនឹងតម្រូវការប្រើប្រាស់របស់ពលរដ្ឋ។ ឆ្លើយតបនឹងការបោះបង់ការផលិតអំបិលរបស់ពលរដ្ឋនេះដែរ មន្ត្រីជាន់ខ្ពស់នាយកដ្ឋានឧស្សាហកម្មរំពឹងថា រាជរដ្ឋាភិបាលនឹងមានការឧបត្ថម្ភធនដល់ពលរដ្ឋក៏ដូចជាកម្មករក្នុងផលិតកម្មអំបិល ដើម្បីលើកទឹកចិត្តឲ្យពួកគេបន្តអាជីពហាលក្រោមពន្លឺថ្ងៃមួយនេះ។
លោក ប៊ុន យោង ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តកែបបានគូសបញ្ជាក់ថា ការផលិតអំបិលនៅខេត្តកែបបានចាប់ដំណើរការហើយ ដោយបច្ចុប្បន្នមានពលរដ្ឋតែ៤០គ្រួសារស្មើនឹង៧ក្រុមប៉ុណ្ណោះបានបន្តអាជីពមួយនេះ ខណៈពលរដ្ឋ៥០គ្រួសារស្មើនឹង១៤ក្រុមបានបោះបង់ការផលិត។ ប្រធានមន្ទីររូបនេះអះអាងថា កត្តាដែលជំរុញឲ្យពលរដ្ឋទាំងនោះបោះបង់អាជីពហាលក្រោមកម្តៅថ្ងៃមួយនេះ គឺដោយសារពួកគេបារម្ភពីបញ្ហាអាកាសធាតុ គួបផ្សំតម្លៃពលកម្មឡើងថ្លៃ ក្រុមអ្នកផលិតមានវ័យចាស់ជរាមិនមានអ្នកចង់ស្នងតំណែង និងខ្វះខាតទុនសម្រាប់ផលិតជាដើម។ បច្ចុប្បន្នខេត្តកែបមានផ្ទៃដីផលិតអំបិលចំនួន៥៥៩ហិកតា។
តែយ៉ាងណាប្រធានមន្ទីរឧស្សាហកម្មខេត្តកែបរូបនេះរំពឹងថា ការផលិតអំបិលនៅខេត្តកែបនឹងទទួលបានទិន្នផលអាចឆ្លើយតបនឹងអាចឆ្លើយតម្រូវការប្រើប្រាស់របស់ពលរដ្ឋក្នុងខេត្តកែប ក៏ដូចជានាំចេញទៅលក់នៅខេត្តផ្សេងៗ ប្រសិនបើអាកាសធាតុអំណោយផលសម្រាប់ការផលិតនៅឆ្នាំនេះ។ កាលពីឆ្នាំ២០២២ កន្លងទៅខេត្តនេះផលិតអំបិលបានចំនួនតែជិត៣ពាន់តោនប៉ុណ្ណោះធ្លាក់ចុះជាង៧០%បើធៀបនឹងឆ្នាំមុនដែលមានជិត១ម៉ឺនតោន ដោយចំនួននេះបានរួមចំណែកតែ១០% ប៉ុណ្ណោះនៃតម្រូវការអំបិលទូទាំងប្រទេស។
ជាមួយគ្នានេះលោក ហួន សុរង្សី ប្រធាននាយកដ្ឋានកិច្ចការសិប្បកម្ម នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍រំពឹងថា រាជរដ្ឋាភិបាលនឹងមានគោលនយោបាយលើកទឹកចិត្ត និងឧបត្ថម្ភធនដល់កម្មករ ដែលបម្រើការងារក្នុងវិស័យផលិតអំបិលដែលរាជរដ្ឋាភិបាលចាត់ទុកជាផលិតផលយុទ្ធសាស្ត្រ ដើម្បីដោះស្រាយបញ្ហាកង្វះកម្លាំងពលកម្មក្នុងវិស័យមួយនេះ។
អត្ថបទគួរអាន
បើតាមការវាយតម្លៃរបស់លោក ហួន សុរង្សី បញ្ហាកង្វះកម្លាំងពលកម្មក្នុងផលិតកម្មអំបិលរបស់កម្ពុជា អាចបណ្តាមកពីប្រជាពលរដ្ឋ ដែលបម្រើការងារក្នុងវិស័យនេះបានផ្លាស់ទៅបម្រើការងារក្នុងវិស័យផ្សេងៗ ដែលក្នុងនាមកម្ពុជាជាប្រទេសកំពុងអភិវឌ្ឍន៍អាចជម្រើសការងារច្រើនសម្រាប់ពួកគេ។ កត្តានេះហើយ ដែលទាមទារឲ្យមានការយកចិត្តទុកដាក់ខ្ពស់ពីរាជរដ្ឋាភិបាលក្នុងការរក្សា និងគាំពារកម្លាំងពលកម្មក្នុងវិស័យផលិតអំបិលនៅកម្ពុជា។
បើតាមការគូសបញ្ជាក់របស់លោក ហួន សុរង្សី នៅឆ្នាំ២០២២ កម្ពុជាផលិតអំបិលបានប្រមាណ៤ម៉ឺនតោនប៉ុណ្ណោះ ខណៈកម្ពុជាមានតម្រូវការអំបិលសម្រាប់ប្រើប្រាស់ក្នុងរង្វង់១០ម៉ឺនតោនក្នុង១ឆ្នាំ។ តែយ៉ាងណាប្រធាននាយកដ្ឋានកិច្ចសិប្បកម្មរូបនេះអះអាងថា កម្ពុជានឹងមិនជួបបញ្ហាខ្វះអំបិលសម្រាប់ប្រើប្រាស់នោះទេ ខណៈបច្ចុប្បន្នកម្ពុជានៅសល់អំបិលដែលនាំចូលពីក្រៅប្រទេសជាង១ម៉ឺនតោនក្នុងស្តុក។
បើតាមការគូសបញ្ជាក់របស់លោក ប៊ុន យោង ដីស្រែអំបិលមាន៣ប្រភេទ ដោយប្រភេទទី១ជាដីកម្មសិទ្ធិរបស់រដ្ឋ រីឯប្រភេទទីពីរជារបស់រដ្ឋប្រគល់ឲ្យប្រជាពលរដ្ឋធ្វើ និងប្រភេទទី៣ជាដីកម្មសិទ្ធរបស់ឯកជន ដែលដីប្រភេទនេះប្រជាពលរដ្ឋអាចកែប្រែទៅធ្វើអ្វីផ្សេងបាន។ សូមរំលឹកថា កាលពីពេលកន្លងទៅថ្មីៗ ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានដាក់ចេញបទបញ្ជាមិនឲ្យមានការកែប្រែដីស្រែអំបិលសម្រាប់ការអភិវឌ្ឍន៍ផ្សេងៗ ក្រៅតែពីការផលិតអំបិលនោះទេ។
គួរបញ្ជាក់ថា បច្ចុប្បន្ននៅខេត្តកំពត និងកែបមានផ្ទៃដីផលិតអំបិលប្រមាណ៤.៥០០ហិកតា ដោយ១ហិកតាអាចផលិតអំបិលបានជាង២០តោនក្នុង១ឆ្នាំ ប្រសិនបើអាកាសធាតុអំណោយផល។ កាលពីឆ្នាំ២០១៨ កន្លងកម្ពុជាបាននាំចូលអំបិលពីចិន១ម៉ឺនតោន និងនៅឆ្នាំ២០១៩ បាននាំចូលអំបិលពីឥណ្ឌា និងចិនក្នុងរង្វង់៣ម៉ឺនតោន៕
