អ្នកជំនាញ អះអាងថា ប្រទេសថៃ ជាប្រទេសក្បែខាងកម្ពុជា និងជាប្រទេសដែលស្ថិតនៅសហគមន៍សេដ្ឋកិច្ចជាមួយកម្ពុជា ដូចនេះទំនាក់ទំនងពាណិជ្ជកម្មវវាងកម្ពុជា-ថៃ នៅតែរក្សាបាននូវកំណើនវិជ្ជមាននៅឆ្នាំនេះ ក៏ដូចជាឆ្នាំបន្តបន្ទាប់ទៀតផងដែរ។
យោងតាមរបាយការណ៍របស់ស្ថានទូតព្រះរាជាណាចក្រកម្ពុជាប្រចាំចក្រព្រះរាជាណាចក្រថៃឡង់ដ៏ បានបង្ហាញថា ការដោះដូរពាណិជ្ជកម្មទ្វេភាគីរវាងកម្ពុជា និងប្រទេសថៃ នៅរយៈពេល១១ខែ ក្នុងឆ្នាំ២០២២ មានទំហំទឹកប្រាក់សរុបប្រមាណជាង ៩ពាន់លានដុល្លារ មានការកើនឡើង ជាង២៦% ប្រៀបទៅនឹងរយៈពេលដូចគ្នា ឆ្នាំ២០២១ ។ ក្នុងនោះការនាំចេញរបស់កម្ពុជាទៅថៃ សម្រេចបានទឹកប្រាក់ជាង ១ពាន់លានដុល្លា កើនឡើងជាង ២៧% បើធៀបនឹងតម្លៃ ៨១៤លានដុល្លា នៃឆ្នាំ២០២១ ខណៈការនាំចូលពីថៃ សម្រេចបានទឹកប្រាក់ជាង ៨ពាន់លានដុល្លារអាមេរិក កើនឡើង ២៥.៩% បើធៀបនឹងតម្លៃ ៦,៤៨ពាន់លានដុល្លារ នៃឆ្នាំ២០២១។
ពាក់ព័ន្ធនឹងទំនាក់ទំនងពាណិជ្ជកម្មវវាងកម្ពុជា-ថៃនេះដែរ ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានយល់ឃើញថា ក្រោយពីរាជរដ្ឋាភិបាលបានគ្រប់គ្រងស្ថានភាពជំងឺកូវីដ១៩ បានជោគជ័យ បានបើកដំណើរការច្រកព្រំដែន និងសេដ្ឋកិច្ចលើគ្រប់វិស័យឡើងវិញ ជាពិសេសការជំរុញពាណិជ្ជកម្មរវាងកម្ពុជា-ថៃនាពេលបច្ចុប្បន្ន មានការកើនឡើងគួរឱ្យកត់សម្គាល់ ដែលនៅតែរក្សាបាននូវកំណើនវិជ្ជមាន។ ឧកញ៉ា លឹម ហេង បន្ថែមថា កត្តាដែលនាំឱ្យទំនាក់ទំនងពាណិជ្ជកម្មវវាងកម្ពុជា-ថៃនៅឆ្នាំនេះ ក៏ដូចជានៅឆ្នាំបន្តបន្ទាប់នៅតែមានភាពល្អប្រសើរនោះ គឺប្រទេសថៃជាប្រទេសដែលស្ថិតនៅក្នុងសហគមន៍សេដ្ឋកិច្ចជាមួយគ្នា ដែលជាកត្តាជំរុញតភ្ជាប់ទៅនឹងសហគមន៍សេដ្ឋកិច្ចអាស៊ានដូចគ្នា ហើយប្រទេសថៃ និងកម្ពុជា ក៏ស្ថិតនៅក្នុងកិច្ចព្រមព្រាង RCEP ជាមួយគ្នាផងដែរ មិនតែប៉ុណ្ណោះ ប្រទេសថៃក៏ជាប្រទេសក្បែរខាងកម្ពុជា ដែលធ្វើឱ្យការធ្វើពាណិជ្ជកម្មការនាំចេញនាំចូលមានភាពល្អប្រសើរ ជាពិសេសការនាំចេញផលិតផលកសិកម្មរបស់កម្ពុជាដែលមិនទាន់កែច្នៃទៅកាន់ប្រទេសថៃតែម្តង។
អត្ថបទគួរអាន
សូមបញ្ជាក់ថា កន្លងមកទំនិញដែលកម្ពុជា បាននាំចេញទៅប្រទេសថៃ មានដូចជា ផលិតផលកសិផល វត្ថុធាតុដើម វាយនភណ្ឌ និងត្បូងថ្មមានតម្លៃ ហើយបានទិញចូលវិញនូវទំនិញផលិតផលសម្រេចដូចជា ត្រី សាច់ ម្ហូបអាហារ និងភេសជ្ជៈ ជីសរីរាង្គ គ្រឿងសំអាងគ្រឿងតុបតែងផ្ទះ ឧបករណ៍អេឡិចត្រូនិក រថយន្ត និងគ្រឿងបន្លាស់ សម្ភារៈការិយាល័យ និងសំណង់ ជាដើម។
គួរជម្រាបថា នៅរយៈពេល១១ខែ ក្នុងឆ្នាំ២០២២ ការដោះដូរពាណិជ្ជកម្មរវាងកម្ពុជា ជាមួយទីផ្សារអន្តរជាតិ សម្រេចបានទំហំទឹកប្រាក់សរុបជាង ៤៨ពាន់លានដុល្លារ មានការកើនឡើង ១២% បើធៀបនឹងរយៈពេលដូចគ្នានៅឆ្នាំ២០២១។ ក្នុងនោះ ការនាំចេញទំនិញកម្ពុជាទៅកាន់ទីផ្សារអន្តរជាតិមានទំហំទឹកប្រាក់ជាង ២០ពាន់លានដុល្លារ កើនឡើង១៨% និងការនាំចូលពីទីផ្សារអន្តរជាតិមកវិញមានចំនួនជិត ២៧ពាន់លានដុល្លារ កើនឡើង៩% ។ នេះបើយោងតាមរបាយការណ៍ដែលបង្ហាញដោយអគ្គនាយកដ្ឋានគយនិងរដ្ឋាករកម្ពុជា៕
