ការបង្ហាញចេតនាចង់ចូលរួមចំណែកជួយអភិវឌ្ឍគម្រោងទាំងពីររបស់ថ្នាក់ដឹកនាំ SMBC ធ្វើឡើងនាជំនួបពិភាក្សាការងារទ្វេភាគីជាមួយឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនកាលពីពេលថ្មីៗ។
នាជំនួបពិភាក្សាការងារជាមួយប្រតិភូសាជីវកម្មធនាគារ ស៊ូមីតូម៉ូ ម៉ិតស៊ុយ របស់ជប៉ុន កាលពីថ្ងៃទី៣០ ខែមករា ឆ្នាំ២០២៣ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានចាត់ទុកការអភិវឌ្ឍន៍ហេដ្ឋារចនាសម្ព័ន្ធដឹកជញ្ជូន និងភស្តុភារកម្ម គឺជាយុទ្ធសាស្ត្រចម្បងរបស់រាជរដ្ឋាភិបាលក្នុងការលើកកម្ពស់ការធ្វើពាណិជ្ជកម្ម និងសេដ្ឋកិច្ចកម្ពុជា ដែលកំពុងមានការយកចិត្តទុក ដាក់ខ្លាំង។ ជាមួយគ្នានេះ ឯកឧត្តមទេសរដ្ឋមន្ត្រី ក៏បានបង្ហាញពីសមិទ្ធផល និងគម្រោងហេដ្ឋារចនាសម្ព័ន្ធដឹកជញ្ជូន និងភស្ភុភារកម្ម ដែលកម្ពុជាសម្រេចបាន និងគ្រោងអភិវឌ្ឍន៍នាពេលអនាគតដល់ប្រតិភូធនាគារនេះផងដែរ។
ក្នុងនោះថ្នាក់ដឹកនាំក្រសួងសាធារណបានលើកឡើងពីគម្រោងផ្លូវល្បឿនលឿនភ្នំពេញ-ក្រុងព្រះសីហនុ ដែលបានដាក់ឲ្យដំណើរកាលពីអំឡុងខែវិច្ឆិកា ឆ្នាំ២០២២, គម្រោងផ្លូវល្បឿនលឿនភ្នំពេញ-បាវិត និងភ្នំពេញ-សៀមរាប ដែលបានសិក្សាចប់ និងគ្រោងសិក្សា, គម្រោងផ្លូវរថភ្លើងល្បឿនលឿនភ្នំពេញ-ប៉ោយប៉ែត ដែលរាជរដ្ឋាភិបាលកំពុងជំរុញឲ្យពន្លឿនការសិក្សា, គម្រោងអភិវឌ្ឍន៍កំពង់ផែនៅខេត្តព្រះសីហនុ និងខេត្តកំពត និងគម្រោងដឹកជញ្ជូន និងភស្តុភារកម្មជាច្រើនទៀត។
អត្ថបទគួរអាន
ជាមួយគ្នានេះលោក Rajeev Kannan នាយកប្រតិបត្តិសាជីវកម្មធនាគារ SMBC ប្រចាំតំបន់អាស៊ីប៉ាស៊ីស្វិក បានបង្ហាញការចាប់អារម្មណ៍ក្នុងការផ្តល់ហិរញ្ញប្បទានលើគម្រោងធំៗពីរនៅកម្ពុជា រួមមានគម្រោងកំពង់ផែទេសចរណ៍ខេត្តកំពត និងគម្រោងការអភិវឌ្ឍន៍ផែនការមេភស្តុភារកម្មនៅកម្ពុជា ដែលក្នុងផែនការមេនេះមានគម្រោងជាង៣៣២គម្រោងជាមួយនឹងទឹកប្រាក់ជាង ៤៨ពាន់លានដុល្លារ។
ពាក់ព័ន្ធគម្រោងកំពង់ផែទេសចរណ៍ខេត្តកំពត ឯកឧត្តម តុប សុភ័ក្រ រដ្ឋលេខាធិការ និងជាអ្នកនាំពាក្យនៃក្រសួងទេសចរណ៍បានអះអាងកន្លងមកថា កំពង់ផែនេះបានបញ្ចប់ការសាងសង់១០០% ហើយ នៅឡើយតែរង់ចាំការវិនិយោគពីក្រុមហ៊ុនឯកជន ដើម្បីដាក់ឲ្យដំណើរការតែប៉ុណ្ណោះ។ ទាំងមន្ត្រីជាន់ខ្ពស់ក្រសួងទេសចរណ៍ និងអ្នកជំនាញក្នុងវិស័យទេសចរណ៍សុទ្ធតែបានបង្ហាញសុទិដ្ឋិនិយមខ្ពស់ចំពោះកំពង់ផែនេះក្នុងការជួយទាក់ទាញភ្ញៀវទេសចរឲ្យមកកម្សាន្តនៅកម្ពុជា ជាពិសេសខេត្តកំពតតែម្តង។
ក្រៅពីគម្រោងហេដ្ឋារចនាសម្ព័ន្ធដឹកជញ្ជូន និងភស្តុភារកម្ម ឯកឧត្តមទេសរដ្ឋមន្ត្រី ស៊ុន ចាន់ថុល ក៏បានបង្ហាញពីគម្រោងជីកព្រែកតភ្ជាប់ទន្លេបាសាក់ទៅកាន់កំពង់ផែសមុទ្រនៃខេត្តកំពត និងគម្រោងជំរុញការប្រើប្រាស់រថយន្តអគ្គិសនីនៅកម្ពុជា ទៅកាន់ប្រតិភូសាជីវកម្មធនាគារ SMBCផងដែរ។
ពាក់ព័ន្ធគម្រោងជីកព្រែកតភ្ជាប់ពីទន្លេបាសាក់ទៅកំពង់ផែសមុទ្រខេត្តកំពត ឯកឧត្តមទេសរដ្ឋមន្ត្រី បានសង្កត់ធ្ងន់ថា គ្រមោងនេះត្រូវបានសិក្សាលម្អិតរួចរាល់ទាំងផ្នែកបច្ចេកទេស និងផ្លូវច្បាប់ និងគ្មានអ្វីជាការប៉ះពាល់នោះទេ ហើយប្រសិនបើកម្ពុជាអាចរកបានដៃគូអភិវឌ្ឍន៍ ដើម្បីធ្វើឱ្យគម្រោងនេះលេចចេញជារូបរាង នោះវានឹងក្លាយជាគម្រោងប្រវត្តិសាស្ត្រ ដែលនឹងផ្លាស់ប្តូរមុខមាត់កម្ពុជាទាំងមូលក្នុងវិស័យនាវាចរណ៍៕
