ក្រុមហ៊ុនអាកាសចរណ៍អាមេរិក American Airlines បានបាត់បង់ប្រាក់ចំណូលជាង ១០០លានដុល្លារក្នុងមួយថ្ងៃ នៅគ្រាដែលវិបត្តិកូវីដ១៩ បានមកបង្អាក់ចរន្តនៃការហោះហើរជាសកល។
បើតាមរបាយការណ៍ បច្ចុបន្នភាពវិនិយោគសម្រាប់ត្រីមាសទីពីរឆ្នាំ២០២១ របស់ក្រុមហ៊ុនអាកាចរណ៍ American Airlines បានបង្ហាញថា ក្រុមហ៊ុនបានដឹកជញ្ជូនអ្នកដំណើរមាន ជាង ៤៤លាននាក់ក្នុងត្រីមាសទីពីរឆ្នាំនេះ ច្រើនជាង ៥ដង បើធៀបនឹងរយៈពេលដូចគ្នាកាលពីឆ្នាំ ២០២០។ ជាមួយគ្នានេះ ក្រុមហ៊ុនក៏បានកត់ត្រាពីការបង្កើតចរន្តសាច់ប្រាក់ឡើងវិញ ដែលទទួលបានពីការហោះហើរ ក្នុងរង្វង់ ១លានដុល្លារជារៀងរាល់ថ្ងៃ និង ធ្វើឲ្យសាច់ប្រាក់នៅទំនេរ (liquidity) សរុបមានដល់ជាង ២១ពាន់លានដុល្លារ។
អត្ថបទគួរអាន
តួលេខនេះ ត្រូវបានអ្នកវិភាគរបស់ក្រុមហ៊ុន បង្ហាញសុទិដ្ឋិនិយមថា ជាការស្តារឡើងវិញនៃវិស័យទេសចរណ៍ជំហានដំបូង ដោយសារតែទាំងអស់នេះ វាគ្រាន់តែជាតួលេខបានពីការហោះហើរនៅក្នុងស្រុកប៉ុណ្ណោះ ហើយគេក៏រំពឹងដែរថា វានឹងបន្តកើនឡើងថែមទៀតក្រោយសង្កេតឃើញពីនិន្នាការរឹងមាំនៃការកក់សំបុត្រការធ្វើដំណើរក្នុងជើងយន្តហោះប្រចាំថ្ងៃ។
គួរកត់សម្គាល់ថា មិនថាតែការហោះហើរក្នុងស្រុករបស់ក្រុមហ៊ុន American Airlines នោះទេ ដែលបានបង្ហាញពីសញ្ញាវិជ្ជមាន និយាយជារួម គឺតម្រូវការហោះហើរនៅទូទាំងប្រទេសអាមេរិកតែម្តង កំពុងតែមានសន្ទុះឡើងវិញ ក្រោយពីពលរដ្ឋអាមេរិកកាន់តែច្រើនបានចាក់វ៉ាក់សាំងបង្ការកូវីដ១៩ និង ស្របពេលដែលរដ្ឋ និង តំបន់កាន់តែច្រើននៅអាមេរិកក៏ផ្តើមដកចេញវិធានការរឹតបន្តឹងការធ្វើដំណើរផងដែរ។
គួរជម្រាបថា ភាគហ៊ុនរបស់ក្រុមហ៊ុនអាកាសចរណ៍ American Airline បានហក់ឡើងដល់ជិត ២៧% នៅឆ្នាំនេះ ហើយបានកើនតម្លៃ ២%ក្នុងមួយហ៊ុន ពោលគឺកើនដល់ជាង ២០ដុល្លារក្នុងមួយហ៊ុន ក្នុងទីផ្សារជួញដូរភាគហ៊ុននៅអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
