វិញ្ញាបនបត្រស្តង់ដារសុវត្ថិភាពអន្តរជាតិ PCI-DSS, ISO/IEC 27001:2022 និង ISO/IEC 27701:2019 គឺផ្តោតលើសុវត្ថិភាពប្រព័ន្ធព័ត៌មានវិទ្យា សន្តិសុខតាមប្រព័ន្ធអ៊ីនធើណែត សុវត្ថិភាពទិន្នន័យ និងការការពារព័ត៌មានឯកជនភាពរបស់អ្នកប្រើប្រាស់សេវាធនាគារ។ វិញ្ញាបនបត្រទាំងពីរ ដែលធនាគារ អេស៊ីលីដា ទទួលបាននេះ ត្រូវបានផ្ដល់ជូនដោយ ក្រុមហ៊ុន ControlCase ដែលជាក្រុមហ៊ុនកម្រិតពិភពលោក ផ្តល់នូវស្តង់ដារសុវត្ថិភាពកម្រិតអន្តរជាតិ និងសេវាកម្មអនុលោមភាព ដែលធនាគារបានបន្តអនុវត្តដោយជោគជ័យនូវស្តង់ដារសុវត្ថិភាពទាំងនេះ អស់រយៈពេលជាងមួយទសវត្សរ៍មកហើយ។
លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា បានគូសបញ្ជាក់ថា តាំងពីដើមរៀងមក ការអភិវឌ្ឍហេដ្ឋារចនាសម្ព័ន្ធធនាគារឌីជីថល របស់អេស៊ីលីដា ត្រូវបានធ្វើឡើងក្រោមការគិតគូរខ្ពស់បំផុត លើការគ្រប់គ្រងបណ្ដាញសុវត្ថិភាព ជាពិសេសព័ត៌មានឯកជនភាពរបស់អ្នកប្រើប្រាស់។ ជាមួយនឹងការផ្ដោតលើការអភិវឌ្ឍប្រព័ន្ធសន្ដិសុខសុវត្ថិភាពនេះហើយ ទើបធ្វើឲ្យអេបរបស់អេស៊ីលីដា មកទល់ពេលនេះ មិនទាន់មានជនខិលខូចណាមួយ (Hacker) អាចចូលលួចយកទិន្នន័យបាននៅឡើយទេ។ ទោះយ៉ាងណា លោកបណ្ឌិត អ៊ិន ចាន់នី អះអាងថា ធនាគារ អេស៊ីលីដា នៅតែបន្ដប្រកាន់ខ្ជាប់នូវការពង្រឹងប្រព័ន្ធសុវត្ថិភាពកាន់តែខ្ពស់ និងបន្ដធ្វើបច្ចុប្បន្នភាពនូវមុខងារថ្មីៗនៃសេវាធនាគារឌីជីថល ទំនើបទាន់សម័យ សម្រាប់បំពេញតម្រូវការអ្នកប្រើប្រាស់។
ធនាគារ អេស៊ីលីដា ថ្មីៗនេះទើបតែបានធ្វើបច្ចុប្បន្នភាពនូវអេបធនាគារបស់ខ្លួន គឺ អេស៊ី ស៊ូភើអេប ដែលផ្ដល់នូវសុវត្ថិភាពខ្ពស់បំផុតដល់អ្នកប្រើប្រាស់ ជាមួយមុខងារប្រើប្រាស់យ៉ាងសម្បូរបែប ដូចជា អាចធ្វើការបញ្ជាទិញមូលបត្រនៅលើផ្សារមូលបត្រកម្ពុជា, អាចធ្វើការបង់ថ្លៃសេវាកម្មផ្សេងៗទាំងជាមួយស្ថាប័នរដ្ឋ និងឯកជន ដោយឥតគិតថ្លៃ, បញ្ចូលលុយទូរសព្ទ, អាចធ្វើការទិញទំនិញនៅលើ Cambodia Market ជាដើម។ល។
ក្រៅពីនេះ អេស៊ី ស៊ូភើអេប ក៏នាំមកនូវរូបរាងថ្មីដ៏ទាក់ទាញ ដែលតម្រូវតាមសេចក្ដីត្រូវការរបស់អ្នកប្រើប្រាស់ទូទៅគ្រប់វ័យ និងគ្រប់រដូវកាល ព្រមទាំងផ្សាភ្ជាប់ជាមួយទំនៀមទម្លាប់ វប្បធម៌របស់ប្រជាពលរដ្ឋខ្មែរផងដែរ។
គិតមកទល់ពេលនេះ អេស៊ី ស៊ូភើអេប មានអ្នកប្រើប្រាស់ជាង ៤លាននាក់ហើយ និងជាអេបធនាគារ ដែលស្ថិតនៅជាមួយអ្នកប្រើប្រាស់គ្រប់ពេលវេលា ប្រៀបដូចជាកាបូបលុយ ឬ ធនាគារនៅក្នុងដៃដូច្នេះដែរ៕
