បើតាមឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងនៅក្នុងសេចក្ដីប្រកាសព័ត៌មានថា គម្រោងនេះ នឹងផ្ដោតជាសំខាន់ក្នុងការបំពេញ ខ្សែច្រវាក់តម្លៃផលិតកម្ម និងកសិផលដោយចាប់ផ្តើមពីចំណុច A ដល់ Z តែម្ដង ដើម្បីបង្កើនតម្លៃបន្ថែមដល់ផលិតផលកសិកម្ម កាត់បន្ថយឈ្មួញកណ្តាល ពង្រីក និងពង្រឹងវិស័យកែច្នៃ វេចខ្ចប់ ឃ្លាំងស្តុក ការរក្សាទុកដាក់ក្នុងបន្ទប់ត្រជាក់ និងការដឹកជញ្ជូនប្រកបដោយជំនាញ បច្ចេកទេស និងការធានាគុណភាព សុវត្តិភាព អនាម័យ និងភូតគាមអនាម័យ និងជាពិសេសកាត់បន្ថយការនាំចេញវត្ថុធាតុដើមផងដែរ ដែលក្នុងនោះ ដូចជា ដំឡូង ស្រូវ ស្វាយ និងស្វាយចន្ទីជាដើម។
អត្ថបទទាក់ទង!
លោក ថេហ្ស៊ី យូអ៊ីដា ប្រធានក្រុមការងារគម្រោង នៃធនាគារអភិវឌ្ឍន៍អាស៊ី បានឲ្យដឹងដែរថា ម្រោងនេះ នឹងគ្របដណ្តប់លើខេត្តគោលដៅចំនួន ៦ មានខេត្ត ត្បូងឃ្មុំ ព្រះវិហា កំពង់ចាម កំពង់ធំ សៀមរាប និង ខេត្តឧត្តមានជ័យ។
ក្រៅពីនេះទៀត ឯកឧត្តម វេង សាខុន ក៏បានស្នើឲ្យ ធនាគារ អភិវឌ្ឍន៍អាស៊ី ជួយលើកកម្ពស់ការកសាងសមត្ថភាពរបស់កសិករ សហគមន៍ និងវិស័យឯកជន ដោយផ្តោតលើការកសាងភាពជាដៃគូវាងអ្នកផលិត និងអ្នកកែច្នៃ ដោយអនុវត្តតាមផលិតកម្មកសិកម្មតាមកិច្ចសន្យា និងការធ្វើទំនើបកម្មកសិកម្មជាដើម។
ទាក់ទងនឹងហិរញ្ញប្បទាននេះដែរ លោក យ៉ង់ ប៉ាក់ នាយកក្រុមហ៊ុន អេហ្គ្រីបាឌី ដែលជាក្រុមហ៊ុនផ្ដល់សេវាកម្មកសិកម្មនៅកម្ពុជា សម្ដែងការស្វាគមន៍ចំពោះហិរញ្ញប្បទានពីធនាគារអភិវឌ្ឍន៍អាស៊ីនេះ ហើយលោកសង្ឃឹមថា ហិរញ្ញប្បទាននេះនឹងត្រូវបានយកទៅប្រើប្រាស់ចំគោលដៅប្រកបដោយប្រសិទ្ធភាព។
លោក យ៉ង់ ប៉ាក់ ថ្លែងដូច្នេះថា ៖ «កន្លងមក យើងសង្កេតឃើញថា កសិករហាក់ទទួលផលពីគម្រោងពុំសូវបានច្រើនដូចតាមការរំពឹងទុកឡើយ។ ដូច្នេះ យើងសូមអំពាវនាវឲ្យរាជរដ្ឋាភិបាល និងភាគីពាក់ព័ន្ធ ធ្វើយ៉ាងណា រិះរកវិធី ឬប្រព័ន្ធណាមួយដែលប្រើប្រាស់បច្ចេកវិទ្យាទំនើបក្នុងការគ្រប់គ្រងគម្រោងរបស់ខ្លួន ដែលអាចធានាបាននូវតម្លាភាព ប្រសិទ្ធភាព និងលទ្ធផលប្រសើរ ជាពិសេស ពិតជាបានផ្ដល់អត្ថប្រយោជន៍ពិតៗ ដល់កសិករនៅមូលដ្ឋាន»។
លោក យ៉ង់ ប៉ាក់ បន្ថែមថា សព្វថ្ងៃ ក្រុមហ៊ុនអេហ្គ្រីបាឌី បាននិងកំពុងជួយសម្របសម្រួលដល់ចង្វាក់តម្លៃផលិតកម្មកសិកម្មដល់កសិករ ចាប់តាំងពីទុន ការសម្របសម្រួលបច្ចេកទេស រហូតដល់ការលក់ចេញ។ ក្រុមហ៊ុនធ្វើការជាមួយនឹងកសិករ គ្រឹះស្ថានហិរញ្ញវត្ថុ រោងម៉ាស៊ីនកិនសស្រូវ នៅក្នុងបណ្ដាខេត្តចំនួន ៦ ក្នុងប្រទេសកម្ពុជា ដែលសុទ្ធសឹងជាខេត្តផលិតស្រូវអង្ករធំៗ៕
None
