ក្រុមហ៊ុនលក់ទំនិញតាមអនឡាញដ៏ធំរបស់អាមេរិក គឺក្រុមហ៊ុនអាម៉ាហ្សូនគ្រោងនឹងបើកដំណើរការអាជីវកម្មក្នុងប្រទេសវៀតណាមខាងមុខនេះហើយ។ បើតាមការឲ្យដឹងពីក្រុមហ៊ុន ការនាំចេញទំនិញតាមរយៈ Amazon ទៅវៀតណាមក្នុងលក្ខណៈបោះដុំនៅក្នុងឆ្នាំនេះ មានទំហំទឹកប្រាក់ប្រមាណ ១លានដុល្លារអាមេរិក ដែលចំនួននេះ មានការកើនឡើង ៣ដងបើធៀបនឹងឆ្នាំទៅមិញ។
យ៉ាងណាមិញ ក្រុមហ៊ុន Amazon បានបដិសេធក្នុងការឆ្លើយតបទៅអ្នកសារព័ត៌មានពីចំនួនអ្នកលក់បន្តដែលបានកម្មង់ទំនិញពី Amazon ក្នុងទឹកប្រាក់ដ៏ច្រើនបែបនេះ ប៉ុន្តែភាគីក្រុមហ៊ុនគ្រាន់តែបានបញ្ជាក់ថា ទំនិញដែលអ្នកលក់បន្តនៅវៀតណាមនិយមទិញនាំចូលមក មានដូចជា សម្ភារៈផ្ទះបាយ ផលិតផលធ្វើដោយដៃ បរិក្ខារគេហដ្ឋាន និងសម្លៀកបំពាក់ជាដើម។
ដោយហេតុថា នៅក្នុងប្រទេសវៀតណាមបច្ចុប្បន្នកំពុងមានតម្រូវការច្រើនក្នុងការបញ្ជាទិញតាមរយៈពាណិជ្ជកម្មអេឡិចត្រូនិក ដែលវាបានអនុញ្ញាតឲ្យអាជីវករនៅវៀតណាមអាចផ្ញើរទំនិញទៅកាន់អតិថិជននៅក្រៅប្រទេសបានងាយស្រួលជាងមុន។ លើសពីនេះទៀត វៀតណាមជាប្រទេសអ្នកផ្គត់ផ្គង់សម្លៀកបំពាក់ គ្រឿងសមុទ្រ និងគ្រាប់កាហ្វេដ៏ធំមួយដែរក្នុងសកលលោក ហេតុនេះនៅថ្ងៃអនាគតក្រុមហ៊ុន Amazon នឹងដើរតួនាទីសំខាន់ក្នុងការនាំយកទំនិញទាំងនោះទៅទូទាំងពិភពលោក។
អត្ថបទទាក់ទង!
ក្រឡេកមើលក្រុមហ៊ុនរបស់ចិន Alibaba ឯណោះវិញ ក៏បាននិងកំពុងប្រឹងប្រែងពង្រីកទីផ្សាររបស់ខ្លួននៅក្នុងប្រទេសវៀតណាមដូចគ្នាដែរ។ ជាក់ស្តែង ក្រុមហ៊ុនរបស់មហាសេដ្ឋីចិន Jack Ma មួយនេះ បានបង្ហាញពីមហិច្ឆតារបស់ខ្លួនក្នុងការជួយឲ្យអាជីវកម្មខ្នាតតូច និងមធ្យមនៅក្នុងប្រទេសវៀតណាមប្រមាណ១ម៉ឺនអាជីវកម្មអាចដាក់លក់ផលិតផលរបស់ពួកគេនៅលើគេហទំព័ររបស់ ក្រុមហ៊ុនអាលីបាបា នៅឆ្នាំ២០២៥ ក្រោយពីតំណាងក្រុមហ៊ុនយក្សរបស់ចិនមួយនេះ ទើបតែបានចុះអនុស្សរណៈយោគយល់គ្នាមួយជាមួយនឹងភ្នាក់ងារលើកកម្ពស់ពាណិជ្ជកម្មរបស់វៀតណាមកាលពីខែមីនាកន្លងទៅ។
សូមបញ្ជាក់ថា ជំងឺកូវីដ១៩បានអនុញ្ញាតឲ្យក្រុមហ៊ុនបរទេសធំៗ និងក្រុមហ៊ុនក្នុងស្រុកនៅវៀតណាមធ្វើប្រតិបត្តិការបានងាយស្រួលជាងមុន លើអាជីវកម្មតាមប្រព័ន្ធអ៊ីធឺណេត។ ជាមួយគ្នានេះ បើការសិក្សាពីសមាគមពាណិជ្ជកម្មអេឡិចត្រូនិកវៀតណាមបានបង្ហាញថា ២២%នៃអាជីវកម្មនៅវៀតណាមបានផ្លាស់មកធ្វើប្រតិបត្តិការនៅលើអនឡាញវិញក្នុងឆ្នាំ ២០២០ ធៀបនឹងរយៈពេលដូចគ្នា កាលពីឆ្នាំ២០១៥ ដែលមានតែ ១៣%ប៉ុណ្ណោះ៕
None
