ប្រសិនបើផែនការបោះផ្សាយលក់មូលបត្រ (IPO) របស់ក្រុមហ៊ុន Betagro ពិតជាត្រូវបានធ្វើឡើងមែននោះ នោះវានឹងក្លាយជាការបោះផ្សាយលក់មូលបត្រដ៏ធំបំផុតទី២នៅក្នុងផ្សារមូលបត្រថៃ បន្ទាប់ពីក្រុមហ៊ុន ធានារ៉ាប់រង Thai Life ដែលបានបោះផ្សាយលក់មូលបត្រតម្លៃ១ពាន់លានដុល្លារ កាលពីខែកក្កដាកន្លងទៅ។ នេះបើតាមទិន្នន័យដែលបានបង្ហាញដោយសារព័ត៌មាន Bloomberg។
សន្ទស្សន៍ផ្សារភាគហ៊ុនគោលជាតិរបស់ថៃ បានកើនឡើងប្រហែល៣,៦% នៅក្នុងខែសីហានេះ ដែលជាកំណើនខ្ពស់ប្រចាំខែសម្រាប់ឆ្នាំនេះ ដោយសារតែមានតម្រូវការវិនិយោគច្រើនពីអ្នកវិនិយោគនៅក្រៅប្រទេស។
អត្ថបទគួរអាន
បើតាមប្រភពព័ត៌មានបានគូសបញ្ជាក់ថា ក្រុមហ៊ុន Betagro របស់ថៃ គ្រោងបោះផ្សាយលក់ភាគហ៊ុនដល់ទៅ ៥០០លានភាគហ៊ុនថ្មី ឬស្មើនឹង២៥%ភាគហ៊ុន នៃការពង្រីកដើមទុន ដោយក្រុមហ៊ុននេះ នឹងយកមូលនិធិទាំងនោះ សម្រាប់ប្រើប្រាស់ក្នុងការពង្រីកផលិតកម្មកសិដ្ឋាន និងចិញ្ចឹមសត្វនៅក្នុងប្រទេសថៃ រួមទាំងប្រទេសជិតខាងផងដែរ។
សូមបញ្ជាក់ថា ក្រុមហ៊ុន Betagroរបស់ថៃ បច្ចុប្បន្នក៏មានការវិនិយោគនៅកម្ពុជាដែរ ដូចជាការផលិតចំណីសត្វ និងកសិដ្ឋានចិញ្ចឹមជ្រូក និងមាន់ជាដើម។ ក្រៅពីកម្ពុជា ក្រុមហ៊ុននេះ ក៏មានវិនិយោគនៅប្រទេសឡាវ និងមីយ៉ាន់ម៉ាផងដែរ៕
