ក្រុមហ៊ុនផ្គត់ផ្គង់ឱ្យក្រុមហ៊ុន Apple នៅវៀតណាម ត្រូវការកម្មករជាង១០ម៉ឺននាក់ឆ្នាំនេះ

ក្រុមហ៊ុន Foxconn ដែលជាអ្នកផ្គត់ផ្គង់ដ៏ធំបំផុតរបស់ក្រុមហ៊ុន Apple ត្រូវការបុគ្គលិកចំនួន១ម៉ឺន៥ពាន់នាក់សម្រាប់ទ្រទ្រង់ដំណើរការរោងចក្ររបស់ខ្លួននៅក្នុងសួនឧស្សាហកម្ម ឌីញ ត្រាម (Dinh Tram) និងសួនឧស្សាហកម្ម ឆួង ចូ (Quang Chau (IPs)) ក្នុងឆមាសទីមួយឆ្នាំនេះ និងត្រូវការកម្មករចំនួន១ម៉ឺន២ពាន់នាក់ទៀតនៅក្នុងឆមាសទីពីរ។

ចំណែកក្រុមហ៊ុន New Wing Interconnect Technology ជាក្រុមហ៊ុនបុត្រសម្ព័ន្ធរបស់ក្រុមហ៊ុន Foxconn មានមូលដ្ឋាននៅសួនឧស្សាហកម្ម វ៉ាន ទ្រុង អាយភី (Van Trung IP) នឹងជួលកម្មករចំនួនជិត៣ម៉ឺននាក់នៅឆ្នាំនេះ។

ទន្ទឹមនេះ ក្រុមហ៊ុនបុត្រសម្ព័ន្ធរបស់ក្រុមហ៊ុន Foxconn មួយទៀត គឺក្រុមហ៊ុន Fukang Technology នៅក្នុងសួនឧស្សាហកម្ម ឆួង ចូ អាយភី នឹងត្រូវការកម្មករជាង១ម៉ឺន៣ពាន់នាក់ថែមទៀតនៅឆ្នាំនេះ និងមានក្រុមហ៊ុនមួយចំនួនទៀតផងដែរ។ រោងចក្រទាំងអស់នេះទាមទារឱ្យកម្មករត្រូវមានអាយុចាប់ពី១៨ ដល់៤០ឆ្នាំ ដែលបានរៀនចប់ថ្នាក់វិទ្យាល័យ និងមានសុខភាពល្អបរិបូណ៌។

បើតាមលោក ង្វៀន វ៉ាន ហួ (Nguyen Van Hue) នាយកមជ្ឈមណ្ឌលការងារនៅខេត្តបាក់ហ្គៀង (Bac Giang) បានឱ្យដឹងថា ក្រុមហ៊ុនទាំងអស់នឹងផ្តល់ប្រាក់ខែគោលចំនួន៥លានដុង ប្រហែល២០៣ដុល្លារអាម៉េរិក ប្រាក់ធានារ៉ាប់រងសង្គម និងអត្ថប្រយោជន៍ផ្សេងៗទៀត។ កាលពីឆ្នាំមុនរោងចក្រជាច្រើនបានកាត់បន្ថយបុគ្គលិក ប៉ុន្តែឆ្នាំនេះរោងចក្រនានាកំពុងតែព្យាយាមរក្សាកម្លាំងពលកម្មរបស់ខ្លួន និងស្វែងរកកម្លាំងពលកម្មបន្ថែមទៀតក្រោយមានការបញ្ជាទិញកាន់តែច្រើន៕