របាយការណ៍បង្ហាញថា កាលពីឆ្នាំ២០១៩ គ្រាដែលមិនទាន់មានកូវីដ១៩ វិស័យទេសចរណ៍ក្នុងតំបន់អាស៊ានបានទាក់ទាញទេសចរសរុបប្រមាណ ១៤៣លាននាក់ រកចំណូលបាន ប្រមាណជិត ៤០០ពាន់លានដុល្លាអាមេរិក ហើយបើសម្រាប់កម្ពុជាយើង វិស័យទេសចរណ៍តំណាងឲ្យមួយភាគបីនៃផលិតផលក្នុងស្រុកឬ GDP ខណៈវិស័យនេះដែរតំណាងឲ្យ មួយភាគប្រាំនៃ GDP របស់ប្រទេសថៃ។ ប៉ុន្តែនៅឆ្នាំ២០២០ ចាប់តាំងពីកូវីដ១៩ផ្តើមវាយប្រហារខ្លាំងឡើងៗ ទេសចរណ៍អាស៊ានដាំក្បាលចុះ ៨១% ដោយបានទាញទម្លាក់ចំនួនភ្ញៀវទេសចរមកត្រឹម ២៦លាននាក់ប៉ុណ្ណោះ។ នេះបើយោងតាមរបាយការណ៍របស់អាស៊ាន។
ហេតុដូច្នេះហើយ ទោះបីប្រទេសខ្លះនៅអាស៊ាន នៅតែបន្តមានការឆ្លងរាលដាល ខ្លះចាក់វ៉ាក់សាំងបានច្រើន ខ្លះចាក់បានតិច ក៏ពួកគេត្រូវ សង្វាតរកវិធីសាស្ត្ររៀងៗខ្លួន ដើម្បីបើកប្រទេសទទួលយកទេសចរបរទេស ដើម្បីជាការចាប់ផ្តើមក្នុងការស្តារវិស័យនេះឡើងវិញ។
តើប្រទេសណាខ្លះក្នុងតំបន់អាស៊ាន កំពុងធ្វើការលើរឿងនេះ?
យើងផ្តើមនិយាយពីបញ្ហានេះ ដោយក្រឡេកមើលកម្ពុជាមុនគេ។ កម្ពុជា ទោះមិនបានបង្ហាញច្បាស់ថា នឹងបើកទទួលយកភ្ញៀវទេសចរបរទេសលើកដំបូងឡើងវិញ នៅថ្ងៃណាខែណាក៏ពិតមែន ប៉ុន្តែរាជរដ្ឋាភិបាលកម្ពុជា កំពុងធ្វើការយ៉ាងសស្រាកសស្រាំ ក្នុងការរៀបចំផែនការ ត្រៀមទទួលយកទេសចរបរទេសដែលបានចាក់វ៉ាក់សាំងរួច នៅចុងឆ្នាំ២០២១នេះហើយ។ កន្លងមករាជរដ្ឋាភិបាលកម្ពុជា បានកំណត់ថា ដើម្បីសម្រួលដល់អ្នកដំណើរចូលមកកម្ពុជា នាពេលបើកប្រទេសពេញលេញឡើងវិញ អ្នកទាំងនោះតម្រូវឱ្យធ្វើចត្តាឡីស័ក ត្រឹមរយៈពេល ៧ថ្ងៃ ប៉ុណ្ណោះ។អត្ថបទគួរអាន
ប្រទេសថៃកំណត់យកថ្ងៃទី១វិច្ឆិកាបើកទទួលទេសចរបរទេស
រដ្ឋាភិបាលក្រុងបាងកក បានប្រកាសកាលពីពេលថ្មីៗនេះថា ប្រទេសថៃនឹងបើកឱ្យទេសចរបរទេស ដែលបានចាក់វ៉ាក់សាំងរួច មកពីប្រទេសមានហានិភ័យទាប អាចចូលមកប្រទេសថៃបាន ដោយមិនចាំបាច់ធ្វើចត្តាឡីស័កនោះឡើយ ចាប់ពីថ្ងៃទី១ខែវិច្ឆិកាឆ្នាំនេះតទៅ ប៉ុន្តែពួកគេត្រូវធ្វើតេស្ត PCR ដើម្បីធានាសុវត្ថិភាព។
ផែនការជំហានដំបូង យ៉ាងហោចណាស់មានប្រទេសចំនួន ១០ ដែលថៃនឹងដាក់បញ្ចូលក្នុងបញ្ជីឈ្មោះប្រទេសហានិភ័យទាប រួមមាន ចិន អាល្លឺម៉ង់ សិង្ហបុរី អង់គ្លេស និង សហរដ្ឋអាមេរិក ជាដើម ខណៈប្រទេសផ្សេងទៀតនឹងត្រូវបន្ដដាក់បញ្ចូលជាបន្ដបន្ទាប់នៅត្រឹមថ្ងៃទី ១ ខែធ្នូឆ្នាំ ២០២១។
ប្រទេសវៀតណាមពន្យាពេលបើកកោះភូគុក ឬកោះត្រល់ ទៅខែវិច្ឆិកា
វៀតណាម ធ្លាប់មានគម្រោងបើកកោះភូគុកម្តងរួចមកហើយ នៅខែតុលានេះ ប៉ុន្តែដោយសារការចាក់វ៉ាក់សាំងដល់ពលរដ្ឋក្នុងតំបន់ដ៏មានសក្តានុពលរបស់វៀតណាមមួយនេះ នៅមិនទាន់សម្រេចបានតាមគោលដៅ ជាហេតុធ្វើឲ្យអាជ្ញាធរកោះភូគុកត្រូវបង្ខំចិត្តលើកពេល បើកទទួលយកទេសចរចាក់វ៉ាក់សាំងរួច មកត្រឹមខែវិច្ឆិកាក្រោយនេះវិញ។ នេះបើតាមការចុះផ្សាយដោយសារព័ត៌មានរ៉យទ័រ។
មិនដូចវៀតណាមនោះទេ ឥណ្ឌូនេស៊ី ដែលជាប្រទេសមានអ្នកឆ្លងកូវីដ១៩ច្រើនជាងគេនៅអាស៊ាន និង ទោះករណីឆ្លងប្រចាំថ្ងៃបានថយចុះបន្តិចបន្តួចក្តី ក៏ឥណ្ឌូនេស៊ីនៅតែជំនះបើកកោះបាលី ទទួលយកទេសចរណ៍ឡើងវិញផងដែរ។
ឥណ្ឌូនេស៊ីកាលពីចុងសប្តាហ៍មុននេះ បានសម្រេចបើកទ្វារកោះបាលី ទួលយកទេសចរអន្តរជាតិឡើងវិញហើយ បន្ទាប់ពីការរាលដាលដ៏ខ្លាំងក្លានៃជំងឺកូវីដ១៩ បានបង្ខំចិត្តប្រទេសនេះ បិទតំបន់ទេសចរណ៍ដ៏មានសក្តានុពលមួយនេះអស់ពេលជាង១៨ខែ។
គួរជម្រាបថា ក្រៅពីប្រទេសទាំង៤ នៅអាស៊ានដែលបានរៀបរាប់ខាងលើ ក៏មានដែរ ប្រទេសហ្វីលីពីន និងម៉ាឡេស៊ី ដែលបាននិងកំពុងគិតគូរពីគម្រោងបើកទទួលទេសចរអន្តរជាតិដែលបានចាក់វ៉ាក់សាំងរួចនេះ។ ជាក់ស្តែង ម៉ាឡេស៊ី បានបោះជំហានដំបូងដោយនឹងបង្កើតផែនការស្តារវិស័យទេសចរណ៍ ថ្មីមួយដែលផ្តោមសំខាន់ដំបូងលើទេសចរណ៍ក្នុងស្រុក៕
None
