ការស្ថាបនាតភ្ជាប់ផ្លូវដែករវាងចិន និងឡាវបានចាប់ផ្តើមតាំងពីខែធ្នូឆ្នាំ ២០១៦ ហើយគ្រោងនឹងបញ្ចប់ និងចដាក់ឲ្យដំណើរការនៅខែធ្នូ ឆ្នាំនេះ។ ខណៈដែលផ្លូវដែកត្រូវបានសាងសង់ជិតរួចរាល់ ប្រទេសចិន នៅសប្ដាហ៍មុននេះបានបញ្ជូនទូរថភ្លើងដើរដោយថាមពលអគ្គិសនី មកដល់ប្រទេសឡាវរួចហើយ ដោយខ្សែរថភ្លើងរវាងចិន និងឡាវនេះ គឺជាការវិនិយោគរួមគ្នារវាងប្រទេសទាំងពីរ ទាំងការសាងសង់ និងប្រតិបត្តិការ។
ឯកអគ្គរដ្ឋទូតចិនលោក ជាំង សៃឌុង (Jiang Zaidong) បាននិយាយនៅក្នុងពិធីប្រគល់ទូរថភ្លើងមកឲ្យប្រទេសឡាវ កាលពីចុងសប្ដាហ៍មុននេះថា ប្រទេសឡាវបានទទួលរថភ្លើងទំនើបដំបូងគេបង្អស់នៅក្នុងប្រវត្តិសាស្ត្ររបស់ខ្លួន ដែលជាវឌ្ឍនភាពមួយក្នុងការសម្រេចការសាងសង់ផ្លូវដែកចិន-ឡាវ ហើយវាក៏ជាសមិទ្ធផលដ៏សំខាន់នៃការភ្ជាប់យុទ្ធសាស្ត្ររវាងប្រទេសទាំងពីរ ក្នុងគំនិតផ្តួចផ្តើមខ្សែក្រវ៉ាត់និងផ្លូវផងដែរ។
ជាមួយនឹងការបើកដំណើរការផ្លូវដែកចិន-ឡាវនាពេលឆាប់ៗនេះ វានឹងជួយកាត់បន្ថយពេលវេលាធ្វើដំណើរកាន់តែខ្លីជាងមុន ពោលគឺការធ្វើដំណើរពីទីក្រុងវៀងចន្ទន៍ទៅព្រំដែនចិន-ឡាវនឹងត្រូវកាត់បន្ថយពីពេលវេលា ២ ថ្ងៃ មកនៅត្រឹមតែ ៣ ម៉ោងប៉ុណ្ណោះ ហើយសម្រាប់ការធ្វើដំណើរពីទីក្រុងវៀងចន្ទប្រទេសឡាវ ទៅទីក្រុងគួនមីងប្រទេសចិនវិញ គឺប្រើពេលវេលាត្រឹមតែ១យប់ប៉ុណ្ណោះ ។
អត្ថបទគួរអាន
កិច្ចការនេះ ត្រូវបានគេចាត់ទុកថា ជាការអភិវឌ្ឍលោតផ្លោះក្នុងការតភ្ជាប់ផ្លូវដែករវាងប្រទេសទាំងពីរ។ ពេលនេះឡាវបានបោះជើងឈានចូលយុគសម័យថ្មីនៃការដឹកជញ្ជូនតាមផ្លូវដែកហើយ ព្រោះថាផ្លូវដែកឡាវ-ចិននឹងនាំមកនូវភាពងាយស្រួលក្នុងការធ្វើពាណិជ្ជកម្ម និងការធ្វើដំណើររវាងប្រទេសទាំងពីរ។
យ៉ាងណាមិញ ពលរដ្ឋឡាវក៏បានបង្ហាញពីអារម្មណ៍រីករាយ ព្រមទាំងជឿជាក់ថាផ្លូវដែកនឹងផ្តល់អត្ថប្រយោជន៍យ៉ាងច្រើនដល់ប្រទេសឡាវដូចជាការជំរុញវិស័យទេសចរណ៍ ការដឹកជញ្ជូនទំនិញ សេវាកម្មសាធារណៈ ជាពិសេសទាក់ទាញការវិនិយោគកាន់តែច្រើនពីបរទេស៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
