ប្រមុខការទូតចិនរូបនេះ បានប្រាប់ទៅកាន់អ្នកសារព័ត៌មានថា ប្រទេសតំបន់អាស៊ីអះអាងថាពួកគេ នឹងមិនក្លាយជាក្តារអុកសម្រាប់ការប្រកួតប្រជែងរវាងមហាអំណាចធំៗឡើយ ហើយប្រទេសអាស៊ីក៏មិនមែនជាកូនជឹងយកទៅប្រឈមមុខដាក់គ្នា ជំនួសមហាអំណាចធំៗនោះដែរ។ លោក វ៉ាង យីបញ្ជាក់ថាពលរដ្ឋ គួរតែរស់នៅក្នុងសន្តិភាព ស្ថិរភាព ជាមួយការអភិវឌ្ឍក្នុងតំបន់។
«អាស៊ីបដិសេធ មិនធ្វើជាក្តារអុកក្នុងល្បែងនៃពួកមហាអំណាចឡើយ» នេះជាអ្វីដែលលោកវ៉ាង យី ទីប្រឹក្សារដ្ឋចិនថ្លែងប្រាប់អ្នកយកព័ត៌មានក្រោយបញ្ចប់ដំណើរទស្សនកិច្ច នៅប៉ាគីស្ថាន អាហ្វហ្គានីស្ថាន ឥណ្ឌា និងប្រទេសនេប៉ាល់។
បេសកកម្មទៅកាន់អាស៊ីខាងត្បូងរបស់មន្ត្រីជាន់ខ្ពស់ចិនរូបនេះ បានកើតឡើងនៅពេលដែលឥទ្ធិពលនៃវិបត្តិសង្គ្រាមនៅអ៊ុយក្រែនកំពុងរីករាលដាលឥតឈប់ឈរ ហើយសន្តិភាព និងការអភិវឌ្ឍពិភពលោកកំពុងប្រឈមមុខនឹងបញ្ហាប្រឈមថ្មី។ ដំណើរទស្សនកិច្ចទាំង៤ប្រទេស ដែលខ្លះជាលក្ខណៈភ្ញាក់ផ្អើល មិនបានព្រៀងទុកផងនោះ បានកើតឡើងនៅពេលដែលទីក្រុងប៉េកាំងកំពុងព្យាយាមស្វែងរកការគាំទ្រ ប្រឆាំងនឹងការតាមដានយ៉ាងតឹងរ៉ឹងពីសំណាក់សហរដ្ឋអាមេរិក និងសម្ព័ន្ធមិត្តលោកខាងលិច ជុំវិញភាពមិនច្បាស់លាស់របស់ទំនាក់ទំនងចិននិងរុស្ស៊ី ជុំវិញបញ្ហាសង្គ្រាមនៅអ៊ុយក្រែន។
អត្ថបទគួរអាន
ក្រោយបានជួបជាមួយមន្ត្រីជាន់ខ្ពស់ជាច្រើននៃបណ្តាប្រទេសក្នុងតំបន់ លោក វ៉ាង យី បានបង្ហាញពីទំនាក់ទំនងល្អដោយបានអះអាងដូច្នេះថា៖ ចិនដឹងយ៉ាងច្បាស់អំពីបំណងប្រាថ្នាដ៏មុតមាំរបស់បណ្តាប្រទេសអាស៊ីខាងត្បូងក្នុងការរក្សាសន្តិភាពក្នុងតំបន់ និងពន្លឿនការស្តារសេដ្ឋកិច្ចឡើងវិញបន្ទាប់ពី កូវីដ១៩។ ប្រទេសនៅអាស៊ី ក៏ដូចជានៅអាស៊ីខាងត្បូង សង្ឃឹមថានឹងពង្រឹងទំនាក់ទំនងជាយុទ្ធសាស្ត្រ ព្រមទាំងពង្រឹងកិច្ចសហប្រតិបត្តិការ ដែលមានផលប្រយោជន៍ទៅវិញទៅមកជាមួយប៉េកាំង។
យ៉ាងណាក៏ដោយ អ្នកតាមដានព្រឹត្តិការណ៍នានា បាននិយាយថា ដំណើរទស្សនកិច្ចភ្លាមៗ និងខ្លះទៀតមិនបានព្រៀងទុក ដែលមិនធ្លាប់មានពីមុនមកផងនោះ គឺពិតជាមិនមែនជារឿងធម្មតាឡើយសម្រាប់ប៉េកាំង។ វាទំនងជាបានជំរុញដោយសារតែការភ័យខ្លាច របស់ទីក្រុងប៉េកាំង ចំពោះភាពឯកោខាងផ្នែកការទូត បន្ទាប់ពីលោកខាងលិចចោទប្រកាន់ថា ចិនបានជួយជ្រោមជ្រែងរុស្ស៊ីឈ្លានពានអ៊ុយក្រែន។ ប៉េកាំងច្រានចោលការចោទប្រកាន់ម្តងហើយម្តងទៀត ដោយអះអាងថា ខ្លួនចង់ឃើញភាគជម្លោះដោះស្រាយដោយសន្តិវិធី៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
