ជាការពិតណាស់ថា កាលពីដើមឆ្នាំ២០២៤ នេះ ប្រទេសជាច្រើននៅអាស៊ី ចង់បញ្ចុះអត្រាការប្រាក់ឱ្យនៅទាប ដើម្បីជំរុញកំណើនសេដ្ឋកិច្ចរបស់ពួកគេ ប៉ុន្តែប្រទេសទាំងនោះហាក់ស្ទាក់ស្ទើរមិនហ៊ានបញ្ចុះអត្រាការប្រាក់មុនសហរដ្ឋអាម៉េរិក ដែលជាមហាអំណាចសេដ្ឋកិច្ចទី១ របស់ពិភពលោកនោះឡើយ ខណៈដែលអត្រាការប្រាក់ស្ថិតក្នុងកម្រិតខ្ពស់បំផុតមិនធ្លាប់មានក្នុងរយៈពេល២៣ឆ្នាំមកនេះ។
ក្រោយពីធនាគារកណ្ដាលអាម៉េរិក បញ្ចុះអត្រាការប្រាក់យ៉ាងច្រើនរហូតដល់ទៅ០,៥០% កាលពីពេលកន្លងទៅថ្មីៗនេះ ធនាគារកណ្តាលនានានៅអាស៊ី នៅពេលនេះមានភាពបត់បែនកាន់តែច្រើនក្នុងការបញ្ចុះអត្រាការប្រាក់ ប៉ុន្តែធនាគារទាំងនោះ នៅតែមានការប្រុងប្រយ័ត្នខ្ពស់ ដោយមិនហ៊ានបញ្ចុះអត្រាការប្រាក់ដោយតក់ក្រហល់នោះឡើយ។
ក្រុមអ្នកជំនាញសេដ្ឋកិច្ចព្យាករថា បណ្ដាធនាគារនៅអាស៊ី នឹងបញ្ចុះអត្រាការប្រាក់សន្សឹមៗ ដោយពួកគេនឹងបន្តឃ្លាំមើលយ៉ាងយកចិត្តទុកដាក់ចំពោះស្ថានការណ៍ខាងក្រៅដូចជា ការបោះឆ្នោតនៅសហរដ្ឋអាម៉េរិក និងភាពមិនប្រាកដប្រជាផ្នែកសេដ្ឋកិច្ចជាដើម។
អត្ថបទគួរអាន
ប្រទេសភាគច្រើននៅអាស៊ីអាគ្នេយ៍ រួមទាំងឥណ្ឌូនេស៊ី ដែលជាសេដ្ឋកិច្ចធំបំផុតនៅក្នុងតំបន់ ត្រូវបានព្យាករថា នឹងបញ្ចុះអត្រាការប្រាក់សន្សឹមៗ។ ហើយប្រទេសនានាដូចជា ម៉ាឡេស៊ី និងឥណ្ឌា ជាដើមបានពន្យារពេលបញ្ចុះអត្រាការប្រាក់ដោយតក់ក្រហល់ដោយសារតែអតិផរណា និងស្ថានភាពសេដ្ឋកិច្ចមានស្ថិរភាព។ ហើយប្រទេសកូរ៉េខាងត្បូង ដែលប្រឈមនឹងក្ដីបារម្ភអំពីបញ្ហាបំណុលគ្រួសារ ក៏ត្រូវបានព្យាករថា នឹងបញ្ចុះអត្រាការប្រាក់ដោយប្រុងប្រយ័ត្នផងដែរ។
ទន្ទឹមនេះ ធនាគារកណ្តាលរបស់ប្រទេសចិន កំពុងរងសម្ពាធឱ្យបញ្ចុះអត្រាការប្រាក់ ខណៈដែលហានិភ័យអប្បផរណា (Deflation) កើនឡើង។ ប៉ុន្តែទោះបីជាសេដ្ឋកិច្ចចិន មានសញ្ញាធ្លាក់ចុះយ៉ាងណាក៏ដោយ ក៏ក្រុមអ្នកបង្កើតគោលនយោបាយចិន ហាក់មានការស្ទាក់ស្ទើរមិនហ៊ានបញ្ចុះអត្រាការប្រាក់យ៉ាងគំហុកនោះដែរ។
សូមបញ្ជាក់ថា ប្រទេសមួយចំនួនដូចជា ឥណ្ឌូនេស៊ី និងហ្វីលីពីន បានបញ្ចុះអត្រាការប្រាក់រួចហើយ ខណៈដែលប្រទេសផ្សេងៗទៀតត្រូវបានព្យាករថា នឹងបញ្ចុះអត្រាការប្រាក់ដោយសន្សឹមៗ ហើយនេះឆ្លុះបញ្ចាំងពីស្ថានភាពសេដ្ឋកិច្ចផ្សេងៗគ្នានៅទូទាំងតំបន់៕
None
