ក្នុងកិច្ចប្រជុំកំពូលអាស៊ានបូកបី លើកទី២៩ នៅហ្វីលីពីន ក្រុមមេដឹកនាំបានជំរុញឱ្យប្រទេសនានាប្រែក្លាយការប្ដេជ្ញាចិត្តទៅជាសកម្មភាពជាក់ស្តែង ដើម្បីការពារអាជីវកម្ម ធានាការផ្គត់ផ្គង់ស្បៀងអាហារ និងថាមពល ព្រមទាំងកាត់បន្ថយផលប៉ះពាល់ដល់ជីវភាពប្រជាជន។ នេះបើយោងតាមសារព័ត៌មាន ABS-CBN ចុះផ្សាយនៅថ្ងៃទី១៧ ខែវិច្ឆិកា។
ប្រធានាធិបតីហ្វីលីពីន លោក ហ្វឺឌីណង់ ម៉ាកូស បានលើកឡើងថា កិច្ចសហប្រតិបត្តិការក្នុងតំបន់ត្រូវតែផ្តល់អត្ថប្រយោជន៍ជាក់ស្តែងដល់ប្រជាជន ជាពិសេសអ្នកដែលកំពុងរងផលប៉ះពាល់ពីការឡើងថ្លៃស្បៀងអាហារ និងថាមពល ព្រមទាំងការធ្លាក់ចុះប្រាក់ចំណូល។ លោក ក៏បានជំរុញឱ្យពង្រឹងយន្តការហិរញ្ញវត្ថុ និងសន្តិសុខស្បៀងអាហារក្នុងតំបន់ផងដែរ។
ចំណែកនាយករដ្ឋមន្ត្រីជប៉ុន លោកស្រី សាណាអិ តាកាអ៊ិឈិ បានបញ្ជាក់ជាថ្មីពីការគាំទ្ររបស់ជប៉ុន ចំពោះគោលនយោបាយឥណ្ឌូ-ប៉ាស៊ីហ្វិកសេរី និងបើកចំហ ព្រមទាំងអំពាវនាវឱ្យពង្រីកកិច្ចសហប្រតិបត្តិការលើស្ថិរភាពហិរញ្ញវត្ថុ សន្តិសុខស្បៀងអាហារ ការឆ្លើយតបនឹងគ្រោះមហន្តរាយ និងការប្រយុទ្ធប្រឆាំងឧក្រិដ្ឋកម្មជាបណ្ដាញ។
ប្រធានាធិបតីកូរ៉េខាងត្បូង លោក លី ជេម្យុង (Lee Jae Myung) បានចាត់ទុកកិច្ចសហប្រតិបត្តិការ
អាស៊ានបូកបីថា ជាគំរូសម្រាប់ប្រទេសដែលមានប្រវត្តិ និងបទពិសោធអភិវឌ្ឍន៍ខុសៗគ្នាក្នុងការរួមគ្នាដោះស្រាយបញ្ហាប្រឈម។ លោកបានជំរុញឱ្យសមាជិកពង្រឹងភាពជាដៃគូបន្ថែមទៀត ខណៈកិច្ចសហប្រតិបត្តិការនេះនឹងឈានដល់ខួបលើកទី៣០នៅឆ្នាំក្រោយ។
ដោយឡែករដ្ឋមន្ត្រីក្រសួងកសិកម្មចិន លោក ចាង ជូ (Zhang Zhu) បានអំពាវនាវឱ្យបណ្ដាប្រទេសក្នុងតំបន់បង្កើនសាមគ្គីភាព ស្របពេលមានជម្លោះភូមិសាស្ត្រនយោបាយ កំណើនសេដ្ឋកិច្ចយឺត និង
ហានិភ័យកាន់តែខ្លាំងលើការផ្គត់ផ្គង់ស្បៀងអាហារ និងថាមពល។ លោកបានសង្កត់ធ្ងន់ថា ការជឿទុកចិត្តគ្នាទៅវិញទៅមក គឺជាមូលដ្ឋានគ្រឹះនៃកិច្ចសហប្រតិបត្តិការក្នុងតំបន់។
សូមបញ្ជាក់ថា កិច្ចសហប្រតិបត្តិការអាស៊ានបូកបី គឺជាក្របខណ្ឌដែលប្រមូលផ្តុំប្រទេសសមាជិក
អាស៊ានជាមួយចិន ជប៉ុន និងកូរ៉េខាងត្បូង ដើម្បីពង្រឹងស្ថិរភាព និងរួមគ្នាដោះស្រាយបញ្ហាប្រឈមក្នុងតំបន់៕
ដោយ: តែម សុខុម